[sig_post_pv label=””] 個人瀏覽過
西環去邊影相好？如果仲答西環碼頭或西環泳棚就Out啦！西環有一個特色遊樂場，以渠管設計，似足一個又一個水管堆疊而成，可以大玩爬水管同捉伊人（編按﹕非捉伊因），望落恍如叮噹/多啦A夢空地場景！
以捐山窿公園 We Park命名嘅遊樂場位處西環，令人諗起細個經常玩嘅集體遊戲火車捐山窿，小公園靠近西環碼頭同海濱長廊，去年先開幕，由本地年輕設計師同學生設計，配合70年代葵涌石籬邨懷舊渠管遊樂設施作設計概念，重新包裝後，設計成創意休憩用地，適合拍拖打卡或親子玩樂，情侶兩個人可以影吓相，父母可以緬懷吓舊時，小朋友亦可以捐嚟捐去一展身手。
一個又一個水管堆疊起來，狀似叮噹/多啦A夢入面嘅空地場景，只欠一個技安/胖虎開演唱會。水管並非全部一式一樣，而係有大有細，可以成個人瞓入去抖涼，水管有全圓同半圓狀，除咗平放水管，部份水管更加傾斜擺放，有幾分凌亂美之餘，亦似足瀡滑梯。水管布局既可俾小朋友探險，簡單設計亦好有文青感，可俾少女盡情打卡，好過去碼頭或泳棚排隊影相啦！
【Like Facebook 緊貼最新資訊，一個Like一個鼓勵，支持原創文章，向Content Farm說不。】
據了解，公園係同中西區民政處、智樂兒童遊樂協會（Playright）合作，以簡單就是快樂為主題。而渠管不遠處仲有幾個桃紅色嘅貨櫃，原來係兒童美術創客館等，主題有衣服、文字、玩具同建築，方便舉辦活動，介紹本地文化用途。而海濱長廊亦貫穿西環至金鐘，連接西環碼頭、中山紀念公園、東邊街北等，全長逾千米。
延伸閱讀﹕西環低調家庭式餅店 超萌Pepe連登豬蛋糕最平98蚊
延伸閱讀﹕西環碼頭貨櫃打卡 跑步散步一流
延伸閱讀﹕西環鐘聲泳棚 未必排隊先影到靚相嘅……
E.A.Tips﹕
（1）由西營盤向海邊方向行，去到西環副食品批發市場，再向右方行，行到盡頭會見到入口，其實公園就喺市場後面，位置亦靠近電車車廠，屬中西區海濱長廊西區副食品批發市場段。
（2）另一方面可由西環碼頭方向行過去，沿海濱長廊一直行，會見到指示牌，行5至10分鐘就到達公園。
（3）公園係公眾地方，並非閣下獨有，打卡還打卡，請尊重其他人。
（4）真渠管遊樂裝置已獲安全認證的，雖然可以放心玩，但爬高爬低都要特別小心。
（5）公園免費開放公眾入場，不過謹記唔好喧嘩。
（6）陽光普照時，下晝時間太陽比較猛烈，最好搽定防曬，要補充水份，或者間中行入渠管內遮遮蔭。
豐物道海濱 – 捐山窿公園 We Park
中西區海濱長廊、西營盤豐物道海濱休憩用地
07:00–22:00
中西區區節網頁：www.playfuldistrict.hk/
在〈文青感滿滿！ 西環小公園水管打卡 神還原叮噹/多啦A夢場景〉中有 11 則留言
留言功能已關閉。