下一站「封區」！海事處突封閉西環碼頭港版天空之鏡打卡勝地頓變回憶

西環碼頭係海邊垂釣同跑步嘅好地方，更加係本地人攝影發燒友好去處，亦係唔少人嘅打卡點，尤其係全海景嘅港版天空之鏡，加上日落斜照更吸睛，咸蛋黃狀夕陽配合得天衣無縫。不過，最近海事處就以防疫為由，封閉西環碼頭，並於入口處加設木板，甚至上鎖，嚴禁非工作人員嘅公眾進入，西環碼頭風景瞬間絕跡，公眾嘅市區後花園似乎又消失一個。網民反應呈兩極，一方面有人鬧政府只係借疫情做事，實際監控；另一方面又有人指碼頭原為工作地點，此舉係由於公眾唔自律而造成，到底係政府與民為敵，定係以往市民進入西環碼頭時嘅行為太過火呢？

原本西環碼頭係一個公共空間，係一個卸貨碼頭，只被稱為西區貨物起卸區，碼頭並無作規劃，只有一片大海旁空地，零圍牆、無圍欄，2013年曾於「香港公共空間大獎」榮獲「由市民開創的空間－大獎」。西環可眺望九龍、尖沙嘴一帶風景，而碼頭因地面凹陷，加上落雨出現一個又一個水窪，水窪倒影輕易形成天空之鏡，照片輕易營造唯美感，令碼頭極速演變為攝影人士同公眾打卡嘅好地方。

而西環碼頭可享全海景，海天一色，充滿線條美，日落西山時，每日可見夕陽消失於水平線，最啱拍拖兩個人影吓相，於日落餘輝下吹吓海風、散吓步。而附近貨櫃堆疊下，亦滿滿層次感，近年成為少女們打卡勝地。

打卡勝地唔係永久，日前海事處就以木板圍封西環碼頭，更將門口上鎖，只限工作人士進入，並以防疫為由，全面禁公眾入內。中西區區議員葉錦龍接獲消息後於Facebook批評，海事處從未諮詢過中西區區議會同當區區議員，僅單方面推行措施，做法實在令人難以接受。

不過，亦有網民直指唔少害群之馬破壞環境，隨處亂扔垃圾，一地啤酒樽，西環碼頭本來係工作地方，有啲人喧嘩又騷擾他人。更有網民揭露可怕之事，係由於曾經有人以暴力傷害守護碼頭的狗隻，包含放火、野餐、爬貨櫃、踩單車，甚至幫船主狗隻絕育、打斷狗腳、冷血虐畜，令一地狗血。

到底係海事處借疫情做事，定市民唔檢點、唔自律就真係不得而知。記者日前訪西環碼頭視察，已經見到多個行人出入閘口被封閉，加設木板圍封碼頭出入口，更安裝鎖頭，碼頭外圍張貼最新通告，表示由3月1日（昨日）起會實施新措施，只限操作裝卸貨物工作人員進入，而凡進入西環碼頭嘅人都需要出示有效安全卡同工作證，並必須安裝安心出行同掃瞄二維碼，若未能出示有效證件，就需要聯絡碼頭內商戶證明為相關工作人員，至於公眾人士就嚴禁進入。