西營盤直上龍虎山歷史遺跡松林炮台超有頹廢風

對於行山程度只係初階嘅朋友，最好就係行啲簡單啲嘅山，上山只需45分鐘嘅龍虎山，附近居民都會去晨運、散步或遛狗，亦係西區呼吸新鮮空氣嘅好地方。

龍虎山位處西區，靠近香港大學站，上山路唔難行，除咗部份路段較陡峭外，大部份路都幾平坦，當中香港歷史地標松林炮台亦喺龍虎山郊野公園內，附近亦有一大片草地，係港島區少有擁大草地嘅晨運徑，同時龍虎山亦有路可以直通太平山山頂方向，可以行去出名可以高空拍攝香港嘅盧吉道。

從山上俯視，可以見到英國人昔日居住嘅城市。龍虎山晨運徑靠近西環石塘咀同堅尼地城，非常接近民居，一般係附近居民散步、晨運或遛狗嘅地方，上山路線唔算太汗流浹背，上山路亦係以前松林炮台嘅軍路，適合拍拖兩個人散步而行，順道欣賞開埠初期嘅遺迹。

松林炮台係英屬香港時期嘅一個炮台，係最高嘅香港炮台，位置海拔有307米，歷史遺跡喺龍虎山郊野公園開闢成松林廢堡歷史徑，教授大家相關歷史。炮台嘅槍炮痕跡依然可以見到，大炮有兩口徑6吋，炮彈重100磅，射程有7英里咁遠，炮床、營房亦完整保存。

從炮台向前繼續走，可以見到松林碉堡，地堡亦隱藏地下營房同看台，附近都有茂密樹蔭。彈藥庫旁邊軍路已廢棄，成為郊遊路線之一，對面仲有一片神秘嘅大草地，喺港島區少有見到一大片草地嘅地方。

松林炮店同地堡都係歷史遺跡，環境滿滿頹廢風，可以安全情況下影到高質素嘅相，既可以查看歷史，又可以打卡，非常適合作拍拖郊遊地。

E.A.路線﹕
西營盤 > 經旭龢道 > 克頓兗晨運徑入口上山 > 經克頓道休憩處 > 維多利亞城界石 >龍虎山郊野公園 > 松林炮台 > 向蒲飛路方向落山 >直達堅尼地城地面

E.A.Tips﹕
（1）帶備充足飲料、食糧，以免中暑。
（2）位置接近民居，記得要保持安靜，況且要尊重山友，唔好隨便喧嘩或大聲播放音樂。
（3）見到龍虎山郊野公園路牌後，會見到分岔路，中間有條小路，沿路上樓梯就會到達松林炮台。

難度﹕2星
景觀﹕4星

去程﹕
本來可以喺香港大學站出，經過逸夫教學樓同百周年花園就可以去到大學道嗰邊入口，步程只係5分鐘嘅事，其後沿克頓道上山就OK。不過，目前抗疫期間大學唔開放，未知係咪可以穿過，所以穩陣起見都係由西營盤步行過去，一路沿上山路行，途中會經過聖士提反女子中學、城西公園、屋蘭士街休憩處，一路上樓梯轉入旭龢道，向右邊方向直行到尾會見到分岔路，左邊就係郊遊徑入口，一般會有唔少人著運動裝行呢條路，腳程比較香港大學站耐，所需時間約15至20分鐘。唔想行太耐，可以乘搭城巴13號或綠色小巴3號直達郊遊徑入口附近。

回程﹕
可以向蒲飛路方向落山，比較快捷方便，經過返克頓道落山，會經過不時有野豬出沒覓食嘅中草藥園附近，兜過好幾個S形落山路同好陡斜嘅樓梯就可以直達地面，會見到油站同城巴巴士站，穿過隧道仲可以步行去地鐵堅尼地城站。