2021-01-27

PMQ日系咖啡店轉移西環 改良親子丼打卡度高

nggy& / 吾子廚房


西環有唔少文青咖啡店,良心咖啡店更加比比皆是,間間都咁上下樣,一樣以Cafe為賣點,要吸引客人就要加啲創意諗頭。當中西環第二街、靠近西營盤街市有一間全新咖啡店,前身位處上環PMQ元創坊,今次進駐西環,設計同樣以日系為主,除咗日式食物,甚至有榻榻米座位!

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】

門口以nggy&命名嘅吾子廚房,樓高2層,趟門旁邊有一扇偌大窗戶,透視室內日式庭園為藍本嘅座位。室內以淺灰、原木為主色調,裝潢簡潔,櫥窗、木櫃有少量陳設、貨品可擇。盡頭有一道樓梯通往上層,盡頭座位更有榻榻米設計嘅座位可以打卡,和式風格設計係有幾分親切感,好愜意,似茶室,大概都係食環境多,掛住「家鄉」日本嘅話,可以拍拖去吓呢類咖啡店。

木盤、木餐具貫徹簡約主題風格,食物大多係成本唔高嘅簡單材料,於擺盤同食物設計上都有花過心思,包括偽蛋包飯、月見浮雲親子丼,有一定吸睛度,的確可以影吓相嘅。

Signature Drinks都有幾款選擇,味醂燉蘋果梳打 $58、糖漬香橙冰紅茶 $48就係其中作品,前者係有落過功夫,蘋果味好突出,粒粒軟淋淋蘋果粒有香甜味,而味醂本來係一款日式料理調味品,似料酒,味道甘甜,加入飲品當中係一個好嘗試,店員提醒要輕輕攪勻先好飲,不過略嫌兩者混合偏甜;至於後者就係普通一杯冰紅茶加入香橙粒粒,相對入口較清甜,相對前者有Refresh感覺,只係兩杯都太多冰粒。

主食兩個人Share一碗月見浮雲親子丼$118,上枱一望,丼飯非常吸睛!套餐配合日式味噌湯、小碟前菜同水果,味噌湯不過不失,水果只係2粒火龍果,零驚喜。反而前菜係小白菜,混合Wasabi為配料,小小一條菜有微辣清新味,陣陣辛辣刺鼻感傳出,相對幾驚喜。而主食以意大利飯為基底,混有淡淡類似鰹魚汁嘅醬汁,飯面將蛋黃同蛋白分開,打發蛋白後變成蛋白泡,質感軟綿,的確貌似天上一朵朵浮雲,有輕盈感;而半熟蛋黃放置正中間,狀似月光,將蛋黃同飯粒撈勻後,蛋黃汁液滲透飯粒,入口微黏,蛋白溶化更會令飯粒變濕潤。親子丼本來意指滑蛋雞肉飯,改良後嘅親子丼的確幾有新意,滑蛋變成蛋白蛋黃分離吸睛位,飯粒中間隱藏嫩滑煎雞肉,略嫌雞肉有幾分過熟兼成碗飯上枱偏涼。

甜品選擇焙茶覆盆子魔法蛋糕$68,價錢偏貴,但偏細,大概食嘅人都係相機食先,據悉係前身PMQ嘅招牌甜品之一,魔法蛋糕本來亦係日本流行甜品,由法國人創作。一個蛋糕有3層質感,呢款同時包含焙茶、覆盆子口味,狀似梳乎厘、蛋糕、奶凍混合體,一層輕盈、一層結實、一層柔軟,有茶味,奶油感唔重,茶味有微微餘韻,蛋糕內雖然微紅,但覆盆子味唔重,蛋糕表面一粒覆盆子帶酸甜味,貌似純粹點綴。

延伸閱讀﹕西環低調家庭式餅店 超萌Pepe連登豬蛋糕最平98蚊

延伸閱讀﹕文青感滿滿! 西環小公園水管打卡 神還原叮噹/多啦A夢場景

延伸閱讀﹕西營盤直上龍虎山 歷史遺跡松林炮台超有頹廢風

E.A.Tips﹕

(1)留意餐廳只收Cash,無加一服務費,人均低消為$80,必須有充足現金先好去。

(2)試業期間建議預先網站預約或IG預約,Walk-in未必有位,平日下晝時間會較少人。

(3)Instagram有即時回應,時間限定為09:00至23:00。

(4)客人較多時,用餐時間會限時90mins,記得Book完位要守時。基本會分4個時段,包括每90mins一個時段,時段分別為12:00起至13:30、15:00同16:30。
(5)門口有一個打卡座位,偌大窗戶靠近馬路,樓上有更多座位,可自由選擇,上樓梯後會見到木枱櫈,盡頭更有日式設計座位,需要除鞋入座,要坐就最好著返對靚襪先去。
(6)食物比較快涼,唔係暖笠笠狀態,所以最好盡快食,唔好影咁耐相。
(7)店員會俾個號碼座,睇完餐牌可以先喺下層落單,講號碼,然後上層就座,等約10至15mins就會有人送上食物同飲品。
(8)主食為堂食限定,無得外賣。

nggy & 吾子廚房

西環西營盤第二街6-8號德明樓地下A號舖
星期一 12:00 – 18:00;星期二全日休息;星期三至日 12:00 – 18:00
ig: nggyn.com

Please Like & Follow & Subscribe /
歡迎讚好、追蹤、訂閱

       

One thought on “PMQ日系咖啡店轉移西環 改良親子丼打卡度高

Comments are closed.