2020-08-04
Botanic Union

大埔林村神秘溫室綠色空間打卡 異國植物小花園渡假風滿滿



Botanic Union
{"popup_fix":"false"}

去Cafe打卡去得多,拍拖想搵啲有新鮮感嘅小店?今次就介紹一間位處大埔嘅植物小店,店主栽種一盆又一盆多肉植物,每個角落用心擺設,都係天然靚靚打卡位。

當中以仙人掌最搶眼,仲有各款熱帶植物、容易打理嘅空氣草,可惜小編搵唔到夏天必備嘅驅蚊草,不過呢個栽種眾多綠色植物嘅小花園遠離市區,周末探訪吓的確可以暫時忘憂,感覺好療癒。

全新小小植物花園以Botanic Union命名,位處大埔林村角落,係一間主打多肉植物小店,店主提供一個綠色空間,陳列架、地上都栽種咗唔同種類嘅盆栽同各種植物擺設,種類繁多。有興趣嘅朋友亦可以購買,店主仲會熱情介紹各款植物,甚至教埋你打理方法同小技巧。

一室綠油油嘅畫面,絕對係市區難以見到嘅一片綠洲,綠色空間有種異國感,疫情期間未能去旅行,都可以出外走走去抖吓氣,喘息一下,感受幾分旅行感覺。店主絕對係熱愛種植之人,對每種植物都細心栽種,佈置用心,天然溫室絕對可持續發展。

同時,店主將每個角落打造成天然打卡位,兩個人可以慢慢行逛,甚至影吓相。溫室內外亦擺放有吊床、韆鞦、木椅等比少女們打卡,四周被植物環繞,輕易映襯出清新感、文青感,同時可以享受片刻寧靜,空虛心靈亦得以填補,點都好過行商場。

交通﹕乘搭64K巴士,較寮下落車,折返去坑溪里進入,Google地圖內可以直接搜尋BOTANIC UNION Limited 莆町有限公司。

e.a.tips
(1)夏天比較多蚊,而且陽光猛烈,建議搽定太陽油、噴定蚊怕水。
(2)小店內無冷氣,只有少量大風扇,室溫頗高,最好自備小風扇、紙巾。
(3)若乘搭大埔墟至元朗方向嘅64K巴士,由大埔上車,落車位置靠近林村,而64K為雙向分段收費,特別建議落車時去車頭再拍一次八達通卡,可平幾蚊,否則需要繳付全程車資 (更多資料參考)。
(4)場地入場費全免,可自由參觀、拍照。唯僅記不打擾店員正常工作及需尊重他們安排。
(5)小店提供免費團隊預約參觀導覽,到時會有專人介紹各種植物,據悉歡迎各類植物藝術創作、園藝工程及設計、工作坊或團體預約企業參觀,詳情請參閱官方Facebook

Botanic Union

地址﹕ 林村較寮下65號
營業時間﹕ 10:00–18:00
電話﹕ 5222 3314
地址﹕ 林村較寮下65號
營業時間﹕ 10:00–18:00
電話﹕ 5222 3314

Please Like & Follow & Subscribe /
歡迎讚好、追蹤、訂閱