3低本地遊,  兩個人旅吓行,  和你Taste

【3低本地遊】大埔林村低碳生活一日遊 去溫室市集/行農場/睇瀑布

個人瀏覽過





今次行遠少少去到大埔林村,林村以林錦公路貫穿,可由林村直達嘉道理農場,而林村不單係旅遊點,亦可以去到睇瀑布,同時隱藏咗一個又一個神秘綠色溫室、市集,可以拍拖兩個人實踐一下低碳生活,夜晚出返市區更可以歎居酒屋美食。

第一站﹕Pattern

搭巴士入林村前,先喺出面醫吓肚先!靠近太和、大埔市中心有唔少餐廳,呢間美式餐廳Pattern狀似咖啡店,以意粉、焗飯、漢堡、牛扒、沙律為主,通通都係飽肚之選。餐廳為家庭式,價錢合理,用料實在,當中墨魚汁意粉係幾出色。

延伸閱讀﹕大埔家庭式小店CP值高 濃墨魚汁意粉出色

第二站﹕Botanic Union

乘搭64K巴士入林村,可以搵到一間好有新鮮感嘅植物小店,店內以溫室設計,種滿多肉植物,種類繁多,一盆又一盆嘅盆栽擺滿每個角落,打造綠色空間,同時形成超天然靚靚打卡位,被綠色植物包圍,感覺超療癒。眾多植物當中,以仙人掌、空氣草最搶眼,呢個種滿綠色植物嘅小小植物花園以Botanic Union命名,遠離市區,絕對係忘憂好地方,充滿異國感,似足城市中的綠洲! 至於買唔買佢啲植物,編輯唔會叫大家唔好去,但消費選擇權喺大家手上,查吓背景自行決定。

延伸閱讀﹕大埔林村神秘溫室綠色空間打卡 異國植物小花園度假風滿滿

第三站﹕大埔林村

雖然被稱為林村,但其實村內並非以林姓最多,反而建村有逾700年嘅鍾屋村嘅鍾姓先係始祖,涵蓋新村、坪朗、大菴山、寨乪等,其他如陳、張、黃等都係主要姓氏。位於放馬莆村嘅林村鄉公所創於1954年,為最高行政機構,林村天后廟由清代乾隆乞今有逾200年歷史,係大埔最具規模古廟之一,而林村公立學校就係一間已經被荒廢嘅學校,已改為村校博物館,但一般人似乎行唔到入去。至於林村許願樹更加係眾所周知嘅旅遊點,相傳可心想事成,吸引唔少外國同大陸遊客慕名而至,許願樹原為大樟樹,後枯萎變通心樹,不過倒塌後就以膠樹頂替,繼續形式上為善信祈福。

第四站﹕Biophilia

大埔林村另一個叫Biophilia嘅溫室,曾於2020年11月至12月開放聖誕市集,以環保為主,加插聖誕打卡位,可以挑選聖誕樹裝飾品、瓷盤器皿、花朵等,亦可以買棵聖誕樹返屋企。另外,溫室內亦有其他唔同品種嘅盆栽植物可供選擇,用作粉飾家居非常適合。

延伸閱讀﹕大埔林村火紅綠色聖誕 Biophilia限時市集打卡兼DIY聖誕樹

第五站﹕嘉道理農場暨植物園

行完溫室花園,繼續搭車可以去到另一個更大嘅花園,鍾意大自然嘅朋友一定會去嘉道理農場暨植物園,不單被山林環抱,而且內有山谷清溪、菜園、梯田農圃,十足十大型農莊,可以一嚐田園生活。山區方向仲有9條生態徑,可以尋幽探秘,除咗睇植物,仲可以睇動物、昆蟲,而行2hrs亦可以行到552公尺嘅觀音山頂,盡情飽覽山下景色。

延伸閱讀﹕嘉道理農場暨植物園睇太陽花 一嚐短暫田園生活

第六站﹕梧桐寨瀑布

而嘉道理農場暨植物園不遠處,仲有大帽山嘅梧桐寨瀑布,係行山人士熱點之一,絕對係附近幾個景點當中最啱消暑嘅地方。梧桐寨瀑布係戶外一個清涼點,為全港最大瀑布,亦被稱為帽山群瀑,係香港四大自然奇景之一。而梧桐寨瀑布又分為7條瀑布,當中井底瀑、中瀑(馬尾瀑)、主瀑、散髮瀑就係主要checkpoint,主瀑流水更有30米高,傾盆而下,震撼力強。由梧桐寨村口作起點,經過萬德苑,行到梧桐寨瀑布需要20mins,路段蜿蜒曲折,再行上山徑,紆迴而上,又需要20mins,路段雖然有一定斜度,但沿途一直會聽到流水聲,行到瀑布時感覺到水聲澎湃奔騰,畫面壯觀,坐低休息乘涼夠晒Chill,悶氣一掃而空。

延伸閱讀﹕夏日清涼消暑遊 大埔林村行梧桐寨瀑布洗滌心靈

第六站﹕溏串小町

折返太和市中心,可以去搵呢間日式居酒屋歎吓,編輯當日去食午市套餐,未知晚市套餐幾錢,不過單睇餐牌留意各款壽司、刺身、燒物、串燒等都唔貴,屬親民價。以午市套餐為例,每樣都份量充足,絕對足夠飽肚,包括定食、丼飯,私心推介串燒豬五花腩。

延伸閱讀﹕大埔小巷和食居酒屋秒到日本 午市套餐豐儉由人 啖啖超滿足全蟹豪華爆丼!


E.A.Tips :

(1) 乘搭巴士64K可以穿梭以上所有行程,全程$8.9,不過如果去林村,只需俾半程車資$6.2,因為分段收費,落車要到車頭拍多次卡。


Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!