大埔太和PATTERN

大埔家庭式小店CP值高 濃味墨魚汁意粉出色



靠近太和同大埔市中心嘅美式餐廳Pattern,以意粉、焗飯、漢堡、牛扒同沙律為主,大部份都係飽肚之選,午餐50零蚊就有交易,價錢相宜,款式多多,用料實在,當中屬於拍拖初期噩夢嘅墨魚汁意粉係幾出色。

招牌、牆身均以黃色為主,室內裝潢陳設簡單,開放式廚房設計,食物即叫即做,上枱速度快,有家庭式小店嘅感覺,有幾分窩心。

帶子黑松露野菌忌廉意粉 $74 上枱時出晒煙,意粉好乾爽,質感滑溜,煙韌有咬口,表面灑上微量芝士碎、沙律菜點綴,令賣相多咗幾分層次感。醬汁偏濃稠,好Creamy,有輕微黑松露香,帶子數量合理,菇菌份量唔少,但味道略淡。不過,疫情期間餐廳唔除得口罩試味,味道時濃時淡係可以原諒嘅。

至於板燒龍脷配煙三文魚墨魚汁意粉 $71 就係加分作,墨魚汁意粉向來係初期約會嘅噩夢,食墨魚汁意粉會輕易食到成嘴都係,似足中毒,要顧上儀態就唔可以點選,絕對係單身一個人、或拍拖中期至後期先可以食嘅菜式。味道比忌廉意粉明顯較濃味,醬汁更黏稠,好Creamy,無腥味,墨魚份量似乎唔少,意粉同樣乾爽,軟硬適中,掛汁力強,黑漆漆嘅墨魚汁意粉隱藏少量菇菌,同樣有少量芝士碎、沙律菜點綴,意粉份量充足,午餐可裹腹。煙三文魚略帶鹹香味,龍脷魚柳就微微鮮甜味,質感嫩滑,值得一試。

夏天熱辣辣,加上食完鹹嘢,最爽係飲返杯冰涼梳打水,味道正常,唔算太甜。夏日Fiesta以黃色為主調,係熱情果口味,而粉紅波斯貓就以紅色為主調,係草莓口味。

e.a.tips
(1)室內座位唔多,比較適合兩個人至四個人小聚。
(2)飲品採用環保不鏽鋼飲管,可沖洗循環再用。
(3)餐牌中有蛋奶素食物選擇,而且數目唔少,比一般Cafe多,適合素食人士。
(4)跟餐本身有免費餐飲,梳打手等要加錢。

延伸閱讀﹕大埔林村神秘溫室綠色空間打卡 異國植物小花園渡假風滿滿

Pattern

地址﹕ 太和大埔太和路15號太和中心13號地舖
營業時間﹕ 星期一全日休息;星期二至五 12:00 – 16:00、17:30 – 22:00;星期六至日及公眾假期 11:30 – 16:00、17:30 – 22:00
電話﹕ 2638 1220

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!