2021-04-10

新蒲崗時光倒流價定食 香蔥豚肉卷肉汁豐腴大驚喜 仲有Yell Card抽!

小春日和


新蒲崗日式定食小店小春日和喺4月裝修完重新開業,堅持做良心店,雖然貌似只係家庭式打理,人手有限,但環境企理,裝潢陳設加入乾花做裝飾,有慢活咖啡店感覺。

小店位處小巷內,唔太搶眼,基本以定食為主,款式唔算多,大概只係十零款,價錢絕對超值,低至$43,雖然目前係2020年,但一份定食嘅價錢竟然停留喺40零蚊,而且嘢飲唔使加錢,非常難得!

雖然係一個超抵價錢,但食物無將貨就價,份量充足,每份定食套餐包含沙律、飲品同主食,前菜係野菜沙律,爽脆生菜、鮮茄同粟米粒配搭胡麻醬汁幾開胃。定食同時配熱飲或湯,小編選擇咗咖啡自家製菊花茶,咖啡味道香濃,菊花茶有菊花清香之餘亦有蜜糖香甜味,微甜,天然菊花茶香好解渴。

日式咖哩豬扒定食 $45 可睇得出大廚係對煮食有知識嘅人,無論醬汁配搭定食物煮法,都係有sense之人。炸豬扒非常香脆,皮脆肉嫩,份量充足,表皮脆卜卜,而豬扒保持軟嫩,仍有juicy感。雖然當日下晝得返一個飯,店主話要轉烏冬,但錯有錯著,烏冬並非普通質素,爽滑煙韌,湯底亦有日式醬油湯底感覺,再加入些微紫菜碎,味道更香濃。

香蔥豚肉卷定食 $47 係小編推介,豚肉卷內包裹住京蔥粒、椰菜,以慢煮方式炮製,將肉汁鎖緊,肉香亦唔會散走,豚肉肥瘦均勻,入口同時有軟腍香口嘅豚肉,亦有爽口京蔥、椰菜,帶有蔬菜鮮甜味,既增添層次感,同時亦可減低油膩感,絕對係中上水準之作!豚肉卷可配搭沙律醬或醬油,醬油略帶微鹹,而沙律醬就好開胃。飯粒為珍珠米,尚算煙韌,僅舖有少量芝麻點綴,無咩特別。而咖哩汁就另上,唔會直接淋上豬扒表面,令本來脆炸嘅感覺瞬間消失。

至於蟹肉忌廉薯餅 +$20 係其中一款小食,相比雞翼、炸蝦同普通薯餅,呢款喺坊間比較少見。薯餅內以蟹肉忌廉為餡料,薯餅比平時更creamy,啖啖蟹肉香,加咗忌廉可令質感滑溜,同薯餅融合,的確幾有驚喜。

另外,臨走仲可以喺門口玩埋Yell Card機,似足童年必玩嘅Yes! Card機,擺入銀仔後扭動即可抽卡,不過今次係抽香港特別版小卡,非常特別,不妨拍拖俾幾蚊兩個人玩吓啦!

E.A.Tips﹕

(1)店內座位唔多,建議盡量避開食飯時間去,會無咁擠逼,或者直接叫外賣。
(2)Yell Card機每抽一次需要兩個$1,想玩吓就記得準備定散紙啦,不過無都可以問店員唱錢嘅。

延伸閱讀﹕新蒲崗老區隱藏$46燒味飯 9款滋味健康燉湯任揀

延伸閱讀﹕新蒲崗街坊小店碟頭飯大大碟 原舊鯇魚腩上枱有驚喜

小春日和

地址﹕新蒲崗康強街32-34號康強洋樓地下4A號舖
營業時間﹕12:00 – 21:00
電話﹕6192 6992

Please Like & Follow & Subscribe /
歡迎讚好、追蹤、訂閱