2020-12-02

新蒲崗街坊小店碟頭飯大大碟 原舊鯇魚腩上枱有驚喜

濃姐茶餐廳


被討論區網民推介嘅濃姐茶餐廳,位處新蒲崗,呢間街坊小店以大件夾抵食為主,平平哋$30幾都有得食,甚至送埋湯,快餐都係$40幾咋,兩個人$100有找!餐廳雖然同茶記無分別,以為碟頭飯係求其嘢?原來並不能以貌取飯,實際上一碟飯內藏驚喜!

室內雖然間隔分明,但過多紙皮箱放上當眼位置,有啲礙眼,加上燈光昏暗、涼風微弱,感覺雜亂,出面仲有人食煙,絕對係一間街坊茶記。不過,菜式大眾化之餘,亦係街坊價錢,既有小菜、招牌滾湯、又有炒飯、碟頭飯、甚至中式扒餐,幾抵食。

先叫一碟韭黃叉燒炒蛋飯 $43,屬典型碟頭飯,叉燒尚算軟身,炒蛋比較滑溜,淋上豉油更有港式風格。白飯份量充足,炒蛋完全包裹白飯,叉燒數量都唔少,女仔可能會太大碟,拍拖去開心Share亦係好選擇。

特別推介係新鮮蒸鯇魚飯 $43,估唔到會原舊鯇魚腩上枱,成大舊鯇魚腩配大碗白飯,蒸魚配白飯,十足十一個套餐。鯇魚唯一不足就係有1、2塊魚鱗,魚皮、魚肉都好軟滑,嫩滑有魚味。加上點綴嘅蔥花、菜圃等,略帶鹹香味,再淋上豉油,鮮甜魚汁同豉油撈白飯的確一流!

E.A.Tips﹕

(1)凍飲加$3,仲有椰汁紅豆冰、奶茶紅豆冰跟餐加$7,可以一試。
(2)室內比較侷促,帶備小風扇會更好。
(3)有網民提醒最好避免叫奶茶、咖啡,叫阿華田、好立克會較好。
(4)今次唔建議坐卡位,圓櫈睇落比較整潔。
(5)揸車嚟最好泊喺越秀廣場出面咪錶停車位,比較方便。

延伸閱讀﹕新蒲崗時光倒流價定食 香蔥豚肉卷肉汁豐腴大驚喜 仲有Yell Card抽!

濃姐茶餐廳

新蒲崗崇齡街91-93號安強大樓地舖
05:00 – 21:30(星期日休息)
2326 0186

Please Like & Follow & Subscribe /
歡迎讚好、追蹤、訂閱

       

2 thoughts on “新蒲崗街坊小店碟頭飯大大碟 原舊鯇魚腩上枱有驚喜

Comments are closed.