泰亞箂海南雞專門店
兩個人醫吓肚,  和你Taste,  東南亞菜

泰亞箂海南雞進駐新蒲崗工業區 $50雞飯包1:1超滑雞肉



呢間泰亞箂海南雞專門店首店位於荔枝角,上年末於新蒲崗開設分店,令新蒲崗呢個小區都有得食海南雞飯,以致新蒲崗再添少少黃色,以小區或工業區嚟講,新蒲崗都算多良心店咯!

電視台ViuTV節目曾經點名話泰亞箂海南雞飯好食,即管去試試有無伏。眼見小店以泰式海南雞為主,餐牌內都係泰式小食、飯麵、飲品,無堂食,只有外賣,適合拍拖兩個人叫吓外賣。

招牌海南雞飯 $50,飯量剛好,油飯望落類似白飯,並非落咗黃薑嘅油飯,但飯粒內含雞油香,微鹹中帶微甜,更有少量薑絲、香茅襯托,飯粒乾爽,唔會黏住,略嫌食到底比較油。而雞肉以生菜墊底,減低油膩感,最估唔到係雞肉份量都幾多,同飯量比例係1:1,上層係雞髀肉,下層係雞胸肉,大概都係random分配,雞皮爽彈,雞肉剛熟,每舊算厚身,有雞味,無骨落地,的確啖啖肉!雞髀肉超嫩滑,雞胸肉亦唔嚡口,比較難得係雞皮同雞肉之間有一層薄薄啫喱狀。不過,記者覺得大廚最大問題只係刀功,雞肉切口唔齊,甚至起角,又或未完整分割兩舊雞肉,美觀度欠奉,如果換過把刀應該會好好多。

只得一種泰式醬汁配搭雞飯,內有薑、蒜味,亦有辣椒,入口帶微微辛辣感,整體味道酸辣,感覺重有幾種香料味,醬汁濃厚,令辣汁幾惹味,雞肉蘸上醬汁後,鹹鮮味中帶辛辣味。配料只有少量青瓜、一粒蕃茄仔,青瓜爽脆,但蕃茄仔帶重酸。加$3有嘢樽裝飲品,包含青檸冰、龍眼冰、椰汁冰或罐裝汽水,龍眼冰細細支,適合一個人食飯,入口偏甜,但似自家製感覺,都算適宜配搭雞飯,可解膩感。

延伸閱讀﹕新蒲崗街坊小店碟頭飯大大碟 原舊鯇魚腩上枱有驚喜

延伸閱讀﹕人人思想共鳴!新蒲崗角落西餐廳 每日10款午市套餐任揀

延伸閱讀﹕拒中國製! 新蒲崗廣場藏心思小店 重光弁当款款便當精緻有特色

E.A.Tips﹕

(1)由采頤花園巴士站行過去,大概只係5至10mins。

(2)除咗雞飯,重有豬手飯、咖哩蟹肉飯,甚至泰式湯粉;半隻海南雞$88,一隻海南雞$168,價錢可圈可點,尚算中等。

泰亞萊海南雞專門店

新蒲崗大有街14號萬星工業大廈地下C2號舖
11:00 – 19:00,星期日及假期休息
3709 2023

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!