2021-01-27

慈雲山年輕人美食蒲點 大碗鰻丼有咩係美中不足?

慈雲山年輕人美食蒲點 大碗鰻丼有咩係美中不足?


慈雲山既屬小區,亦屬老區,區內人口逐漸老化,餐廳大多都以街坊口味為主導,少有配合年輕市民嘅小店,慈雲山毓華里就有一間以日式美食同串燒為主嘅小餐廳,吸引唔少90後、00後幫襯,套餐重有珍珠奶茶送,睇落性價比極高,但記者發現食物材料上有一個問題。

餐廳貌似一間家庭式餐廳,但翻查資料,係由2位90後年輕人創業,餐牌內主打嘅都係年輕市民鍾意食嘅日式小食,風味獨特,而且兩個人去食,價錢亦屬合理範圍。

咖哩吉列豬扒飯 $52 以大塊豬扒舖滿咖哩飯,豬扒厚切,炸成金黃色,炒粉唔厚,豬扒仍有肉汁,淋上開胃醬汁,令炸物更滋味。炸豬扒僅放白飯表面,入口依舊香脆,未有被咖哩汁浸軟,的確有心思。

一碗丼飯基本份量充足,亦好足料,比如原條滑蛋鰻魚飯 $68 就以大條鰻魚上枱,鰻魚幾肥美,質感軟嫩,醬汁鹹中帶甜,幾濃郁,底層有輕微蛋香味,撈飯一流。

部份即日套餐甚至送珍珠奶茶,但餐牌部份套餐+$5先有,奶茶偏甜,但珍珠都夠煙韌,而一杯珍珠奶茶同出面茶飲份量差唔多,夠晒飲。

睇咗成篇,睇埋相都未搵到有咩問題?而家開估啦!餐廳菜式味道上雖然有水準,但就忽略選材問題,竟然唔用珍珠米,改用絲苗米。珍珠米本來入口煙韌,配搭日式丼飯好適合,但廣東絲苗米形狀尖細,比較乾爽,入口偏硬,僅適合配搭炒飯或煲仔飯等廣東菜,缺乏珍珠米嘅飽滿同軟糯感,所以白飯選材上需要略為扣分。

延伸閱讀﹕無人山徑你夠唔夠膽行? 山腳睇寮屋區遺址 慈雲山東南坡直通沙田坳道

E.A.Tips﹕

(1)平日午市以學生客為主,套餐大概$46至$52一餐。

(2)午市可朝早10:30前預先Whatsapp叫午市套餐,唔使等咁耐。

(3)據悉外賣自取有9折優惠,膠盒另加$1。

(4)foodpanda外賣較耐,可以揀lingduck或openrice或打電話送貨或自取,但要叫滿$80兼屬慈雲山範圍。
(5)拍拖去食最好避開食飯時間,以免人流過多,等候時間過長。

延伸閱讀﹕新蒲崗時光倒流價定食 香蔥豚肉卷肉汁豐腴大驚喜 仲有Yell Card抽!

延伸閱讀﹕新蒲崗老區隱藏$46燒味飯 9款滋味健康燉湯任揀

延伸閱讀﹕真正平民食堂 加藤屋20蚊牛肉飯超抵食

蒲點

慈雲山毓華里28號萬寶大廈地下6號舖
星期一至日 12:00 – 21:00;公眾假期、公眾假期前夕 12:00 – 21:00
5313 0365

Please Like & Follow & Subscribe /
歡迎讚好、追蹤、訂閱

       

One thought on “慈雲山年輕人美食蒲點 大碗鰻丼有咩係美中不足?

Comments are closed.