連鎖店往往擁有方便呢個因素，加上背後集團資金充裕，價錢Set得較低，吸引貪小便宜嘅客人，但事實上好多人又會大呻食物水準參差，甚至點名炸雞太「小」，咁到底點解唔拍拖兩個人另覓其他更好選擇呢？編輯今次走到慈雲山，發現一間開業多年、以炸雞同Pizza為主嘅外賣店，水準不俗，而價錢極低，只係一個街坊價，帶到留下公園野餐，自製High Table歎外賣你試過未？小店8月即將會於同區有新店，加入堂食服務，最值得欣賞係外賣自取比堂食平，兩款小食套餐多數$40有找！
慈雲山呢間話明叫「孖寶薄餅屋」，英文為「Pizza Mario」，咁就當然係以Pizza、炸雞為主嘅小店，由兩夫婦開設，年紀較大，食物款式竟然明顯為後生仔而設，加上學生優惠，一直以來受附近學校村唔少學生哥歡迎。編輯查看餐牌，每一項都寫明兩個價錢，似乎係為隔離新店而設，堂食比外賣貴幾蚊，呢樣係我哋最欣賞嘅地方。另外，編輯最認同小店嘅地方係，有時候唔一定黐滿文宣先叫同路人，等同我哋默默做事，一樣唔太受到賞識，良心圈嘅失敗不僅在於被打壓，而係自己人互相猜疑。
雖然舊舖位處毓華里，大概由2010年開業至今，但即將於今年8月初開業嘅新店竟然位於蒲田里，並且稱為第二分店，到底點解會咁近開一間店呢？編輯未有進一步查詢，大膽估計係租約未滿，遲啲會完全搬舖，反正遲早就會知道。新店位置係樓梯之間，而店舖明顯較為四正，的確同時方便堂食與外賣客人。
離小店不遠處，就係蒲崗村道公園，靠近學校村，位置係鑽石山與慈雲山之間，公園本來係舊時政府嘅鑽石山石礦場，原來到2010年先逐步重新開放。公園分成1期、2期兩邊，最大特色係有一道超長嘅空中高架單車徑，闊6米，長1公里，單車徑之下就係普通休憩地方。
店內食物固然以Pizza、炸雞為主，此外芝士薯蓉、菠蘿焗飯、法式田螺、炸薯條等都係受歡迎嘅選擇，今次挑選兩款抵食單人套餐，包括肉醬意粉+炸雞1件（堂食$46、外賣自取$39），以及薄餅一角+雞翼2件（堂食$44，外賣自取$37），單單從價錢已經睇到，呢間係尊重外賣嘅食店。
意粉上舖滿蕃茄肉醬，千層麵就聽過，但打開盒蓋，恍如千層肉醬意大利粉，肉醬、茄醬、意粉份量真係好多。一份肉醬意粉放滿成個飯盒，份量極多，幾乎滿瀉！而意粉並非乾爭爭，肉醬、蕃茄汁同樣舖滿飯盒，又唔會太多，適可宜止，足夠黏滿每啖意粉。意粉爽滑彈牙，蕃茄肉醬不單多茄醬，茄味香濃，而且多肉粒，味道調得恰到好處，意粉酸甜鹹度適中。
炸雞、2隻炸雞翼基本係同一個做法，上手時仍然熱焫焫，炸雞即炸係特別香脆可口，脆皮鬆脆，唔算好厚，脆漿似乎亦有獨特調味料，難得係雞髀肉嫩滑，而且有肉汁，連雞翼都有酥香感，香料又真係點睛之筆，可以用香味四溢嚟形容，絕對係邪惡！而且炸雞有一隻手掌咁大，而非只係手指咁細，亦唔係糜爛嘅肉質，更加唔係乾巴巴硬皮，編輯放低10蚊，邊個夠膽話某K字頭連鎖店好食啲嘅，可以企出嚟對質。
一人套餐講明Pizza 就係其中一角，一塊Pizza大概係6吋Pizza嘅四份之一，Pizza唔係正式意大利薄批，反而比較似港式Pizza，批底似麵包，只係烤過後有微脆感，Pizza上亦非舖滿各款材料，只係得芝士、茄醬，如果鍾意Pizza料多可能會失望，因為Pizza真係比較單一，只係蕃茄醬底嘅芝士薄餅，Pizza上舖滿芝士，芝士下又黏滿茄醬，而芝士經烤焗後微溶，醇厚可口，微酸茄醬汁與芝士鹹香混合，價廉物美嘅味道就係如此簡單。
E.A.Tips :
❷ 高架單車徑開放時間為08:00至22:30，單車租借時間則為10:00至19:00，星期六日延至20:00。
❸ 外賣自取有8折優惠，絕對平過堂食。
❹ 逢星期三只售單人套餐，無其他供應。
❺ 第二分店即將開業，位置為慈雲山蒲田里1,5,7號慈樂大廈地下2號舖，即慈祥大廈後門，設有堂食，食品一樣，外賣平啲，於2022年8月1日開業。
❻ 二人精選套餐Combo for Two $122，外賣自取$104，包含 6吋迷你批標準風味薄餅一個(特色風味加$8)、任選一款$60 特色焗飯或意粉、春卷4件。
❼ 薯條汁可選墨西哥風味肉醬汁或滿地可風味牛肉汁。
❽ 公園內有高架單車道、小輪車場、單車場，當中小輪車場需要先通過技術評核，兼且得到「BMX 單車場使用許可證」方可使用。
孖寶薄餅屋
慈雲山毓華里28號萬寶大廈1A舖
星期一至二11:00 – 21:30；
星期三11:00 – 14:00；
星期四至日11:00 – 21:30
2320 9188
蒲崗村道公園
九龍鑽石山蒲崗村道140號
24hours
2320 6140