慈雲山其實真係可以上山，從慈雲山邨配水庫遊樂場既可從高位遠眺海景，亦可以沿山路直通沙田坳道，而黃大仙配水庫遊樂場旁邊就係沙田坳道，可以直上獅子山方向，兩個配水庫遊樂場都位處慈雲山，倚靠山邊，屬真正無人山徑，可以兩個人散吓步拍拖閒遊。
兩個配水庫遊樂場都硬地足球場等設施，比較陳舊，不過尚算廣闊，黃大仙配水庫遊樂場內有舊式配水庫設施，據悉九龍皇帝行宮曾經喺附近，而慈雲山邨配水庫遊樂場更加可以從背後小山徑上山，從高點享受附近一帶市區景，甚至可以眺望維港海景。
慈雲山邨配水庫遊樂場背後有一道隱蔽山徑，旁邊有觀音廟，位置為慈雲山東南面山坡，可由此路直通往沙田坳道法藏寺附近，甚至連接獅子山、飛鵝山、雞胸山，小山路鮮有人提及，除咗經過慈正邨、各廟宇，重要經過墳場，據稱位置好重陰氣，百無禁忌兼唔畏懼嘅人先適合行走。
除此之外，山腳底重有一處幾特別嘅廢棄地方，可見此地有唔少破舊階磚，甚至舊渠、屎坑，通通已明顯被拆卸。事實上，呢度係昔日鑽石山寮屋區遺址，政府廿年前早以低層寮屋生活環境惡劣為由進行清拆，將居民安置於公屋內。而寮屋區接近電纜塔底、山溪，佔地唔小，不時有老人家喺度捉棋。政府原意清拆後作重建發展，惟至今未有任何動工，舊式寮屋區小屋蹤跡隨處可見，成為上咗年紀人士嘅捉棋之地。
E.A.Tips﹕
（1）如想去足球場或跑步，比較建議去附近蒲崗村道體育館，既有超闊緩跑徑，亦有大型足球場、看台，更有沖洗設備，而慈雲山邨配水庫遊樂場則連洗手間都無，反而黃大仙配水庫遊樂場都有洗手間。
（2）慈雲山邨配水庫遊樂場背後係墳場，山徑亦需經過墳場，要尊重先人，保持安靜，除非閣下百無禁忌，否則小山徑其實未必適合一般人行。
（3）可乘搭3D或3M巴士路線，於慈雲山（南）巴士總站或蒲崗村道學校村落車。
（4）從Google地圖只見綠色虛線，路線唔清晰，未必個個適合行，比較適合膽大又有經驗嘅山友去行。
（5）從慈雲山毓華街行到盡頭，經過德愛中學、中華基督教會協和書院、救世軍卜維廉中學，可沿路上慈雲山邨配水庫遊樂場同寮屋區遺址。
慈雲山邨配水庫遊樂場
慈雲山樂華街 
07:00-18:00 
2321 1022
黃大仙配水庫遊樂場
竹園沙田坳道 / 九龍慈雲山雙鳳街 07:00-18:00 2321 1022
在〈無人山徑你夠唔夠膽行？ 山腳睇寮屋區遺址 慈雲山東南坡直通沙田坳道〉中有 1 則留言
留言功能已關閉。