Lala Mama's Cafe and Grocery

南丫島隱藏版咖啡店 Lala Mama’s真放空慢活之家

[sig_post_pv label=””] 個人瀏覽過



南丫島最出名係食海鮮,步出碼頭,走過榕樹灣大街,已經見到一間又一間海鮮酒家,而市中心僅有7間良心小店,大部份都靠近榕樹灣大街,只有2間遠離市中心,並非位處大路,而靠近小巷內,貌似與世隔絕,以下呢間非常隱蔽嘅Cafe就係其中之一。

餐廳由2015年起開設,似童話故事中藏於森林嘅小木屋,戶外以露天茶座設計,室內以木質為主調,不單有木製餐枱,連木櫈都似學校採用嘅木櫈,設計簡樸而有格調,內含唔少可以打卡嘅元素,旁邊一面木牆,部份室內精品似外國所購,木櫃右下方更隱藏自家製梅酒。不過,記者認為更特別之處,係餐廳配合南丫島節奏,屬可以真正感受慢活嘅Cafe。

而用餐客人當中,大多都係島內居民,傾談內容亦略有深度,值得思考,並非香港市區Cafe客人圍埋講是非嘅質素。餐廳屬小店形式,空間唔大,店主為島內居民,食物即叫即煮,並非快餐,加上室內環境寧靜,於餐廳內用餐時,會輕易隨環境形成放空狀態,值得兩個人周末拍拖放鬆身心。

從餐牌可見,以輕食為主,店主似乎非常提倡素食主義,素食選擇佔多,非常健康,但亦有一般葷食選擇。當中Deluxe $128 全日早餐包含蛋、煙燻三文魚、英式鮮肉腸或加$10要三文魚腸,另有煙肉、有機蘑菇、蕃茄、炒薯粒、洋蔥、焗豆、法國小麵包。可選任何製法嘅蛋,炒蛋無特別調味,質感滑溜;鮮肉腸的確新鮮,有別於平常坊間All Day Breakfast嘅肉腸,特別有鮮味、有咬口;薯仔粒熱辣辣幾香口,只係略嫌焗豆冷冰冰; 最特別係法國小麵包,有別於一般All Day Breakfast,外脆內軟,聞得到獨特酵母味,呢種French Roll小麵包比平常硬身嘅法國麵包的骰,但稍稍軟身更易入口。

Spanish $88 屬於素菜美食之一,以三隻蛋製作Omelette,蛋皮稍乾身,但內裏都軟身,大概係火喉控制未完美,內餡有炒香過嘅薯粒、洋蔥、三色椒,有微微黑椒香味。Spanish同時亦伴有法國小麵包,貌似大部份餐點都配有呢款小麵包。

等待時間雖然稍長,但亦可以慢食,真正享受用餐樂趣。臨尾歎埋一杯咖啡或呷一杯熱茶,踢走城市中嘅疲憊感,咖啡有平常家中咖啡豆研磨咖啡粉再沖泡嘅口味,Earl Grey熱茶亦好解渴。再從書櫃中隨意揀一本書翻閱,甚或自己帶本書細看,書櫃大多係煮食書、歷史書、漫畫書、旅遊書,即使因無得去旅行而揀本旅遊書,都夠晒寫意,任Hea都無人理,唔需要刻意安排行程,先係真正享受島上慢活嘅環境。

室內空間雖然唔大,但內裏似乎隱藏咗唔少娛樂設施,包含卡啦OK,甚至藏於中央、表面為木製餐枱嘅麻雀枱,貌似平常居民玩樂之地,似足一個家,私人地方Casual得嚟,感覺更有幾分似城市中嘅Party Room。

延伸閱讀﹕南丫島發電廠旁秘密觀景地 大灣肚沙灘直視絕美日落


E.A.Tips﹕
(1)餐廳位置比較神秘,藏於村內,從榕樹澳碼頭起步,經榕樹澳大街轉入南丫島家樂徑,沿途會見到唔少街邊小店售賣手工藝精品,行近沙埔舊村、沙埔新村分岔路口前,大概係兄弟士多對面,會見到有餐廳擺放出嚟嘅易拉架,需沿旁邊小路走進,可直入隱藏於內嘅餐廳。

(2)門口必經小路會有狗隻,需要小心,不過唔算野狗,尚算安全。

(3)餐廳等候時間、用餐時間都頗長,室內只有一人負責煮,而且通通即叫即煮,出餐較慢,入門到出門隨時動輒2hours有多,唔適合趕時間之人,有時間先好去。

(4)建議平日去用餐,但餐廳逢星期一、四會休息,而周末下晝2點後已經難以接待客人。

(5)餐具、Tap Water等需要自取,除咗送餐,大多係自助方式,比較自由,亦需自行到櫃台處向店主明言埋單。


延伸閱讀﹕賣靚啡撐本土 梅窩海邊咖啡店Caffe Paradiso 軟包似upgrade版「豬柳強」?

延伸閱讀﹕賣飾物嘅木系文青咖啡店 長洲島中坊研歎小清新Brunch

延伸閱讀﹕只有3個選擇 坪洲極神秘嘅海邊咖啡店Secret Cafe

Lala Mama’s Cafe and Grocery

南丫島沙埔舊村27號地下
09:30 – 18:30
9759 2553

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!