2021-04-10

南丫島發電廠旁秘密觀景地 大灣肚沙灘直視絕美日落



入到南丫島,如果要搵沙灘行吓,大多數人都會去洪聖爺灣泳灘,今次為大家推介附近另一個更值得遊覽嘅沙灘,名為大灣肚沙灘(唔係大灣區),可近距離仰望發電廠三支煙囪,更可以從該處直視超靚日落景,兩個人於沙灘漫步,拍拖睇日落都夠晒浪漫啦!

南丫島向來係一個令人感到悠閒嘅小島,沙灘、小山丘都係必去之地,相比市區煕來攘往嘅車輛、人潮,環境特別舒適,生活節奏緩慢,似足外國小村落。

從洪聖爺灣離開,走入排媒機道,可沿路直達大灣肚沙灘,行到沙灘會發現最大分別係外藉人士明顯比本地人多,沙灘盡頭就係南丫發電廠,可以清晰望到三支煙囪標誌,所以又被稱為發電廠沙灘。事實上,南丫島曾經係塑膠工業區,更有發電廠座落島內西邊位置,同田園氣息嘅小島風景形成強烈對比。

大概係毗連發電廠,大灣肚沙灘沙粒唔算幼細,甚至染得灰灰黑黑,水質亦未算好,不過唔少人都會帶同寵物到此沙灘散步,令沙灘變成狗仔天堂。海中心會見到唔少漁船停泊,加上背後日落靚景,絕對係手殘都影到靚相。

由石灘行到沙灘,盡頭有南丫島發電廠,發電量僅次青山發電廠,由香港電燈所有,近80年代起為南丫島居民,甚至香港島、鴨脷洲居民提供電力,現時擴建部分改以天然氣為主要燃料,減低環境污染。

當日走過大灣肚沙灘盡頭,發現有一大群外藉居民於沙灘舉行Party,原來佢哋間中就會有「Lamma Fun Day」,一大班朋友開心玩樂,睇到都覺得Chill。有外藉居民甚至主動邀請路過嘅記者一同參與Party,不過最終未有參與,外藉居民更舉起大拇指對路過嘅記者講「Five Demands」,著實令人感動。

E.A.Tips﹕

(1)由中環渡輪碼頭或香港仔乘搭渡輪可到達南丫島,一般會乘搭榕樹灣小輪,另可乘搭索罟灣小輪,但榕樹灣碼頭比較接近大灣肚沙灘,船程約為25至35分鐘。

(2)從榕樹灣碼頭行到大灣肚沙灘,腳程大概係15至20分鐘。

(3)由洪聖爺灣泳灘行到大灣肚沙灘,只需步行5分鐘即達。

(4)洪聖爺灣泳灘設施充足,亦有救生員,為康文署正式泳灘,落水比較安全,記得帶齊游泳用品。而大灣肚沙灘就唔係正式泳灘,唔建議落水,散步、影相、Hea吓比較適宜。
(5)狗主們謹記唔好縱容狗仔於沙灘內大小二便,要保持沙灘清潔。
(6)自己垃圾請自己帶走,唔好污染海灘。

大灣肚沙灘

香港南丫島
24hours

南丫發電廠

南丫島波羅咀

Please Like & Follow & Subscribe /
歡迎讚好、追蹤、訂閱