兩個人影吓相,  神秘之地,  離島

【南丫島一日遊】碼頭皇冠郵筒起步!20分鐘步程經神風洞闖索罟灣蘆鬚城村神秘沙灘 長期擁一級水質假日全灘僅廿人?

瀏覽次數: 16
個人瀏覽過





夏日炎炎,暑氣逼人,天上艷陽高照,烈日當空,多行幾步都汗如雨下,身體變得灼熱,想驅走酷暑悶熱嘅天氣,最佳答案必然係拍拖兩個人去水上活動啦!7月已到達尾聲,你又開始咗下水禮未呢?香港有唔少水上活動,近年獨木舟、直立板等都變成熱門水上玩樂活動,西貢等地係熱門落水好去處,連沙灘都開始多人,今次編輯就推介一個躲藏於離島嘅好地方,位處南丫島,不單係一個康文署正式泳灘,長期擁一級水質,位置正對西面,可以觀賞夕陽西下景色,但星期日下晝時間16:00 全個泳灘人數只有20人,絕對係本地隱藏版沙灘!

南丫島係全港4大島嶼之一,由於島形狀似「丫」字,同時位處南端,故此被稱為南丫島。島內對外交通唔多,只依靠渡輪或街渡,兩者都可以直接抵達,而一般人能夠上岸嘅碼頭只有榕樹灣、模達灣、索罟灣,當中榕樹灣係最鮮為人知嘅碼頭,無論餐廳定景點都係比較多;模達灣就離索罟灣不遠,既無商店,連手機訊號都非常微弱,就只有小村落,以外藉人士居住為主;至於索罟灣,一般人流較榕樹灣少,但較模達灣多,如果要穿梭榕樹灣至索罟灣,就需要走上1至1.5小時嘅山路,又或者乘搭街渡到香港仔,然後前往另一個碼頭,收費當然係逐程計算,目前係無直接渡輪或街渡穿越兩個碼頭。

從香港仔街渡碼頭乘搭街渡,大概30分鐘船程就會抵達南丫島,若要前往索罟灣,必先經過模達灣。講到夏天必然要前往嘅地方,一定係沙灘!事實上,模達灣北面都有沙灘,不時有居住附近嘅外藉人士前往,只不過並唔係康文署正式泳灘。南丫島全島內只有兩個沙灘係康文署正式泳灘,一個係最為人熟悉、位於榕樹灣嘅洪聖爺灣泳灘,另一個就係位處索罟灣,離碼頭僅有不足20分鐘步程,但就偏偏比較少人留意到。

第一站﹕南丫島皇冠郵筒

船隻抵達索罟灣之前,可以清楚目睹湛藍海灣上嘅前索罟灣水泥廠,索罟灣位處南丫島東面,曾經被英國人稱為「Picnic Bay」,索罟灣小區內景點唔多,故此大多數人經山路經過,少有逗留,部份停留嘅人都只係停留索罟灣海鮮酒家用餐,皆因索罟灣以海產聞名,碼頭對出亦有眾多漁排,但編輯唔會講任何嘢,食唔食就由讀者自行決定。

甫踏出索罟灣碼頭,如果你係英屬香港居民,索罟灣第一街十字路口街頭,最先映入眼簾嘅一定係現時南丫島區內唯一現存嘅皇冠郵筒,背後為索罟灣警崗、南段公共圖書館。編號256嘅殖民時代皇冠郵筒,為圓柱形設計,筒身偏幼,目前已經被髹上碧綠色,係典型英式鑄鐵郵筒,中央位置刻有「GR」美術字體,意指郵筒屬於英皇佐治五世年代。

不過,今次南丫島郵筒背後並無任何英國製造商嘅名稱,據了解,若郵筒底部並無刻有製造商名稱嘅話,好大可能係由香港製造。另外,有指南丫島郵筒旁邊本來有一部自動售賣郵票機,而呢種郵票機被俗稱為揹仔郵筒,只係現時已經見唔到。

第二站﹕索罟灣天后宮

穿過一堆海鮮餐廳,2至3分鐘後就會到達一個大空地,一端抬頭可見天后廟,係南丫島內3間天后廟嘅其中1間。索罟灣本身有逾300年歷史,而由於索罟灣村民早期依靠捕魚為生,天后娘娘被奉為「海神」,漁民用作祈求平安豐收、出海順利,故海邊有一間天后宮。位於索罟灣嘅天后廟可追塑至1828年,大概係清朝時期,屹今有逾194年歷史,只不過2004年曾經因被焚燬而重建,但旁邊仍有聚寶盆、古鐘。

至於點解會叫索罟灣?翻查資料時方才發現,有傳係由於舊時村民依靠捕魚為生,多數會以繩索作為捕魚工具,連接小艇、沙灘,再以魚網包圍,只要拉緊繩索,收緊魚網,就能夠捕獲魚群。小島係一個海灣,以前魚網又叫做「罟」,而「索罟」就係指收起魚網嘅動作,故此就叫做「索罟灣」,係一個眾所周知嘅本地漁港。

第三站﹕神風洞

依循榕樹灣山徑方向前行,第一個分岔路口只需要直行,因為左邊係通往石排灣、東澳方向,一直前行會先經過神風洞,離天后宮只係5至10分鐘步程。呢個小洞穴係同日治時期歷史有關,日軍佔領香港之後,曾經於岸邊預備大量被稱為「震洋艇」嘅自殺式小艇,以作反攻,二戰後曾有殘骸遺留小島上。神風洞既然位處海邊,沿途固然有無敵海景,都算係一段休閒路線,位置係索罟灣與蘆鬚城之間嘅南丫島家樂徑之上,其實都係一個戰時遺跡。至於點解會叫做「神風洞」,原來呢個洞穴係二戰期間日軍嘅基地之一?

事實上,係同歷史上嘅「神風特攻隊」有關,又叫「震洋特攻隊」,本來日軍喺20幾個山洞內早已預備好特攻快艇,因為呢啲「震洋艇」本身必須有人駕駛,係一種日本當年出名嘅特攻摩托艇,但艇上係裝滿烈性炸藥,只要從山洞駛出,再撞擊盟軍船艦兼引爆炸藥,用作突擊,就能夠令盟軍死傷慘重,故此係一種自殺式攻擊。只不過,美軍早一步摘下原子彈,令日軍投降,所以最終其實呢種「震洋艇」其實無乜實際效用,後來英軍更將快艇銷毀,只係剩低神風洞。

目前,神風洞入口有山石,而洞內更有唔少積水,從洞口可以清晰聽見洞穴內水滴落下時滴答滴答嘅清脆聲音,洞口至盡頭深度大概有廿米,洞穴荒廢多年後,其實都難以想像原來曾經係戰時軍事據點之一。

第四站﹕蘆鬚城泳灘

南丫島向來多山地,所以遊覽小島通常都係同行山路線有關,但今次編輯就帶大家走一段夏日路線,經過樹蔭林道,前往一個隱蔽小沙灘。只要一直沿南丫島家樂徑走,經神風洞前行一小段路,就會到達第二個分岔路口,右邊為通往榕樹灣方向,而左邊先係今次行程選擇,只需要依左邊前行約10分鐘步程,就可以到達今次行程目的地蘆鬚城泳灘。



而「蘆鬚城」之名原來係因為有傳該地長滿蘆兜,即蘆鬚,故附近村落就叫做「蘆鬚城村」,而小沙灘位置近蘆鬚城村,故此被官方稱為蘆鬚城泳灘,你大概估唔到呢個名不經傳嘅小沙灘,原來係康文署正式泳灘,等同於洪聖爺灣沙灘,而蘆鬚城泳灘更早於1972年被政府刊憲。

蘆鬚城泳灘基本上係南丫島中心點,靠近蘆鬚城村,經過第二個分岔路口後,會見到一間已經荒廢嘅蘆鬚城學校,一直前行至第三個分岔路口,會有指示牌,只需要向左邊繼續前行,中途會經過蘆鬚城村旱廁。前往蘆鬚城泳灘小路遍佈林蔭,前端一直為瀝青路,但末端有一小段路為沙泥路,只要穿過少量草叢林蔭小道,盡頭就會見到「蘆鬚城泳灘」指示牌,沿樓梯下行,沙灘景色盡入眼簾,踏入沙灘,你就會發現一個海岸秘地。

相對於榕樹灣嘅洪聖爺灣沙灘,位於索罟灣嘅蘆鬚城泳灘離南丫島發電廠遠,水質方面亦較好,據環境保護處環保署環境保護互動中心資料顯示,蘆鬚城泳灘水質極佳,由1986年實施泳灘水質監測計劃起,至今一直維持於「一級」良好水平,只係大雨過後有機會受地面逕流、泳灘腹地內排放影響,兩三日後落水就無問題,而泳灘內海水嘅大腸杆菌含量,亦同樣由1986年至今保持良好狀態。

蘆鬚城泳灘離洪聖爺灣泳灘有幾公里遠,人流相對少,恍如一個鄉村海濱沙灘、海岸線上嘅海水浴場,顯得更為純樸自然,寧靜舒適,環境靜謐。更值得留意嘅係,蘆鬚城泳灘正對西面,可直接觀賞夕陽餘暉靚景,而且位置並無遮擋,唔會見到南丫島發電廠三支標誌煙囪。大家到沙灘迤嘅同時,亦可以順道欣賞金黃色光線消失於地平線之上,畫面唯美而壯麗,恍似世外桃源,可能係全個南丫島最靚嘅沙灘!


E.A.Tips :

❶ 由中環或香港仔都可以經渡輪或街渡前往南丫島,中環船票價錢為$23.1至$32.5,香港仔船票則為$12.5至$18.7,中環船程約35至40分鐘,香港仔船程約30分鐘。

❷ 來往中環至南丫島渡輪時間表﹕https://hkkf.com.hk/%E8%88%AA%E7%8F%AD%E8%B3%87%E8%A8%8A/%E4%B8%AD%E7%92%B0-%E8%87%B3-%E7%B4%A2%E7%BD%9F%E7%81%A3/,來往香港仔至索罟灣渡輪時間表﹕https://www.ferry.com.hk/chi/service.htm。

❸ 中環4號碼頭為南丫島渡輪位置,而香港仔街渡碼頭則近魚市場、珍寶海鮮舫小碼頭,可以經香港仔海濱公園前往。

❹ 蘆鬚城泳灘救生員當值時間為09:00至18:00,假日則為08:00至19:00,而11月至3月則無救生員當值。

❺ 巴士路線2,4X,15,25,94,94X, 511,722,780,780P,962A、小巴路線6,22S,22X,54,54S 均可到達中環碼頭,電車站則可以於機利文街站落車,離碼頭約10分鐘步程。

❻ 來往中環渡輪會停泊於索罟灣二號碼頭,靠近公廁,而來往香港仔嘅渡輪則會停泊於前面近郵筒及警崗嘅碼頭。

❼ 蘆鬚城泳灘內有更衣室、洗手間,而沖身位置則與大嶼山下長沙泳灘一樣,位於外面,無分男女。

❽ 蘆鬚城泳灘內亦有燒烤爐設施,亦有小食亭,只不過唔係成日開門,而樓下嘅汽水機亦等同陳列品,所以最好都係自備飲料、食物。

❾ 謹記愛護環境,切勿遺留垃圾於沙灘上,岸上有垃圾桶,但最好都係自己垃圾自己帶走。

❿ 溫馨提示,如果以正確讀音計,索罟灣應該係讀索「古」灣,因為「罟」係讀「古」。

❿ 於蘆鬚城泳灘離開時,只需要原路折返就可以啦,不過最好睇清楚船期表時間,因為上一程船同下一程船之間有機會相距45分鐘。

❿ 索罟灣碼頭附近亦可以觀賞日落,碼頭位置可能會被遮擋,天后廟對出會比較清楚,而沙灘更加係最佳賞景地方,回程亦可以順道觀賞呢。

索罟灣渡輪碼頭

  • 南丫島

索罟灣天后古廟

  • 南丫島索罟灣濱海

神風洞

  • 南丫島索罟灣家樂徑
  • 24hours

蘆鬚城泳灘

  • 南丫島索罟灣蘆鬚城泳灘
  • 24hours
  • 2982 8252

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


旺角$48越南版海南雞飯 同價海量湯粉似足二人份量
【野餐隨行】慈雲山8月新店外賣自取平過堂食 肉醬意粉多料到滿瀉套餐$40有找 公園自製High Table歎高汁炸雞/Pizza
一餐麻甩與斯文兼備!元朗隱藏版料理店躲藏小巷賣日本魚生飯 與潮州滷味店僅相隔15秒步程
西貢林蔭秘道登小堤壩眺榕樹澳漁排 水浪窩闖企嶺下賞紅樹林尋港英時代郵箱
香港西端舂坎角泳灘賞絕美夕陽餘暉 海水清澈見底完勝赤柱沙灘 西環兒時回憶傳統餅店月餅預告【野餐隨行】
香港仔偽築地帆船野餐有遮蔭 鯨魚主題小店賣魚市場直送龍躉漢堡 揭人氣日本餐廳5大問題疑不尊重客人【野餐隨行】
【野餐隨行】長洲掃街掃盡6間小店!小島必揀經典魚湯/魚燒/大魚蛋 北端沙灘海旁自製迷你Party
【野餐隨行】元朗國公園大草地歎超靚韓式吐司 款款內餡含400次滑蛋
30分鐘內輕鬆登邊陲白虎山 探索英屬香港麥景陶碉堡 蓮麻坑一路之隔眺香園圍口岸
新手路線扯旗山VS高階路線奇力山!最高登山點360°環抱港島靚景 同遊山頂空中花園連百年古蹟歷史建築物
陳舊藍屋搵唔到入口?筲箕灣隱藏版炸雞Pizza即叫即製正過連鎖店 高水準脆意雞10間分店竟淨1間!
全港3間分店!油麻地樓上泰國菜用App買外賣享9折優惠 芒果糯米飯宛如當地水準
【野餐隨行】北角潮州飯店高水準鹵水鵝片 尋海旁小型狗公園野餐
蕃茄濃湯海量茄蓉! 長洲火車頭酸辣小窩餸菜自由配搭
石壁快閃遊!全港最大水塘三甲探索監獄前皇冠郵筒/古老石刻 貝澳超長淺灘遍佈水牛
葵涌點心燉湯專門店同區2間分店!10款足料燉湯+11款黏軟蒸飯任揀