2021-02-25

賣靚啡撐本土 梅窩海邊咖啡店Caffe Paradiso 軟包似upgrade版「豬柳強」?

Caffe Paradiso


Caffe Paradiso
{"popup_fix":"false"}

梅窩係同時連接海陸交通嘅離島區,聚集唔少外國人,不過良心店少之又少,遠離繁囂嘅同時,記得要記得本地人嘅初心,唔好因為宣傳多就去幫襯,盡可能幫襯返同路人,係最基本、最低程度可以做到嘅事。梅窩嘅良心店有2間,不過其中1間標明係寵物友善餐廳,小編怕狗,所以去咗另1間小店。

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】

小店座落碼頭附近,名叫「Caffe Paradiso」,係意大利文,「Paradiso」有Paradise、天堂嘅意思,店內有外國人主理,重有2位本地人。翻查資料,老闆早年曾接受BBC訪問,提到自己喺梅窩開咗間Coffee Shop,直指本地人生活忙碌,忙工作,自己只係踩單車出入,工作同休息並重,甚至曾指想請多啲人幫手。

咖啡店食物同飲品種類繁多,當中咖啡水準確實不俗,由淡飲到濃,有微微咖啡餘韻,比起連鎖式嘅咖啡店,小島咖啡更用心,層次豐富,亦較有人情味。Iced Mocha 冰凍朱古力咖啡 $39,有濃郁朱古力味,爽滑冰涼;而Tanzanian Peaberry Cappuccino 坦桑尼亞泡沫咖啡 $35,更加香濃,表面係厚厚泡沫,可以自行加上可可粉,底層係坦桑尼亞咖啡,質感柔滑,入口比一般咖啡苦澀,怕苦就需要加糖,不過好醒神,咖啡味連泡沫飲,第一層咖啡味比較輕,後來咖啡味愈來愈重,有層次,有少少黑加侖子味慢慢慘出,好特別。

首選係Hot Breakfast Bread Rolls,口味多多,揀咗煙肉、煎蛋、芝士蘇格蘭白軟包 Bacon, Egg and Cheese Roll $69, 食一份都夠飽。煎蛋生熟度掌控得剛好,有蛋香,煙肉微鹹,芝士可拉絲,蛋香混合芝士香好濃郁,軟包表皮微脆,好挺身,包夠厚,餡料豐富,內裏勁鬆軟,令人難忘!白軟包其實有幾分似後面連鎖店又名「豬柳強」嘅豬柳蛋漢堡,不過用心整嘅包明顯高質得多,唔係硬過柴皮嘅麵包,比最近好Hit嘅古早味蛋糕更鬆軟,食落好飽肚。

試埋好特別嘅Italian Panini 意式香脆夾包,Fresh toasted panini with sun-dried tomato bread,荷蘭芝士、蘑菇、青椒及水橄欖 Dutch Gouda Cheese, Mushroom, Green Pepper and Olives $59,夾包烤焗過,聞落有芝士香,表皮脆卜卜,有咬口,內餡將各種材料混合,芝士可拉絲,而芝士味唔會好膩,青椒同水橄欖等帶有清新感。

室內面積細小,座位唔多,只得2枱同戶外幾枱,適合兩個人拍拖遊時坐低歎返個Tea,對住海景歎杯啡的確幾寫意,可以消磨吓周末時間。連接地下至閣樓,有一道樓梯,樓梯內有一幅又一幅掛畫,營造出一道藝術走廊,老闆介紹係Art Gallery,的確似一個小型藝術廊,重有部份書籍同香港社會運動有關呢!

延伸閱讀﹕仙境變人間? 梅窩銀礦瀑布滿佈人群 流水聲變人聲+相機快門聲 50米礦道/隱藏廢棄小屋探秘

延伸閱讀﹕南丫島隱藏版咖啡店 Lala Mama’s真放空慢活之家


E.A.Tips﹕

(1)位置靠近梅窩碼頭同巴士站,喺麥當勞McDonald’s後面小街,中國熊China’s Bear酒吧小食店舖轉彎就會見到。
(2)老闆係外國人,點餐時要用英文,不諳英文嘅朋友要留意,可以搵本地店員落單。
(3)店外座位可面對海旁,會比較Chill;不過室內就比較有私隱,而且行埋店內地下至閣樓嘅小型Art Gallery會比較方便。
(4)要預備充足Cash,唔見有Credit Card機。
(5)素食朋友都可以去,因為有全素餐供應。
(6)小店曾參與梅窩 Farm to Table 農業社區活動,亦有售賣唔少有機產品,有興趣可以睇睇。
(7)雖然無標明係寵物友善餐廳,但戶外座位亦不時有人帶同寵物用餐。
(8)周末營業時間上,Google寫16:00,Openrice寫18:00,但實際上親自問到先知係17:00,所以要留意唔好咁晏啦!


Caffe Paradiso

大嶼山梅窩銀運路3號梅窩中心地下及閣樓8號舖
星期一至五 08:00 – 16:00;星期六至日 08:00 – 17:00
2984 0498

Please Like & Follow & Subscribe /
歡迎讚好、追蹤、訂閱

       

2 thoughts on “賣靚啡撐本土 梅窩海邊咖啡店Caffe Paradiso 軟包似upgrade版「豬柳強」?

Comments are closed.