梅窩瀑布/銀礦瀑布+沙灘+文武廟
兩個人影吓相,  離島

仙境變人間? 梅窩銀礦瀑布滿佈人群 流水聲變人聲+相機快門聲 50米礦道/隱藏廢棄小屋探秘



梅窩係海陸文通相連嘅離島區,對比長洲、坪洲、南丫島更方便,小島有異國風格,尤其係水清沙幼嘅銀礦灣泳灘,係兩個人散步、曬太陽、玩水、甚至拍拖睇睇夕陽餘暉嘅好地方,今次帶大家行吓沙灘背後嘅打卡點 – 有梅窩瀑布之稱嘅銀礦瀑布。不過,最近行山人流增多,想影靚相比較困難,今次既然遇上人頭湧湧情況,就同大家直擊報道吓,順便教教大家點樣喺人流滿滿嘅清況下都影到靚相啦!

Like Facebook / MEWE 更緊貼最新資訊,一個Like一個鼓勵,支持原創文章,向Content Farm說不。】

延伸閱讀﹕賣靚啡撐本土 梅窩海邊咖啡店Caffe Paradiso 軟包似upgrade版「豬柳強」?

穿過銀礦灣瀑布公園,就可以澗水行到瀑布前面,呢道銀礦瀑布對比其他瀑布唔算好氣勢磅礡,不過行到過嚟都有透心涼感,當水流配合雨水急速向下流時,就有一瀉千里感覺。瀑布式有個小水潭,穿梭石澗本身係幾美觀,但目前行兩步都會撞到人。

而銀礦瀑布本身係一個洗滌心靈嘅瀑布秘景,分上瀑同下瀑,以自然奇觀同水流清澈而聞名,似足仙景,淙淙流水下瀉甚有力量,離遠觀察都可以感受流水威力。不過,當一個地方曝光之後,人群會馬上洶湧而至,名不經傳嘅KOL、大媽、大叔、一家大細、情侶等齊齊衝去打卡,何況係一個老早已經曝光咗嘅地方。平時小編見多人會避開,今次想作直擊報道,流水震撼聲音都不及人聲同相機聲,想拍攝流水聲音時,每隔5秒都會聽到嘅嘈雜人聲同接連「咔嚓」嘅相機快門聲。

瀑布附近白銀鄉村有一座逾400年歷史嘅文武廟,係全區最古老嘅廟宇,供奉文昌帝、關聖帝,分別象徵文學、武略,可祈求學業有成、金榜題名,同瀑布只係相距幾分鐘腳程。可以經白銀鄉村返回碼頭,順道睇睇有幾分似歐陸風格嘅小屋,對比市區,環境清靜舒服。

原來銀礦灣曾經真係有礦洞!離瀑布只有5mins腳程嘅銀礦洞,係另一個出名嘅地方,早年銀礦灣都係因為銀礦洞而得名,山上本身隱藏鉛礦,而礦石又有少量白銀,以前會有人去開採白銀,所以附近村落叫白銀鄉村,內灣亦叫銀礦灣。

不過,由於後期礦石含銀量太低,加上廠方出現經營不善同資金不足等問題,礦洞停產,令礦洞成廢棄地,留低一個細小銀礦洞遺跡。銀礦洞目前洞穴頗細,其他出入口唔係被政府封閉,就係被山泥堵塞,現時得返一個出入口可以打吓卡,僅高約10呎,闊約7呎。

目前,只能喺洞口窺視內部,行到盡頭會見到有閘口欄住,前後僅約50米深,奇異地貌只係得呢段路,只能夠喺呢條極短路程嘅銀礦洞洞穴探秘,於盡頭輕拍牆身,恍惚聽到流水聲。

已經廢棄嘅礦道,由本來四通八達,變成得返50米左右嘅礦道,銀礦洞內遍佈積水,不過相比人頭湧湧嘅銀礦瀑布,寧願拍拖去銀礦洞走走好過。

延伸閱讀﹕更快到起點方法! 快閃大嶼山路線東梅古道 輕鬆由東涌行到梅窩睇銀礦灣瀑布

走出銀礦洞,繼續沿路直行,會發現一道殘舊小橋同廢棄小屋,場景既有頹廢風格,亦充滿陰森感,有興趣嘅讀者可以兩個人去睇睇。

小編講吓嘢﹕

今次睇瀑布,不單見證到香港人嘅威力,人頭湧湧仍然願意行去打卡,即使水流湍急,唔少女士都願意澗水行石塊,以身冒險為影張靚相或Selfie,非常佩服。Miss A有件事不吐不快,當時為咗避人群,企到最旁邊拍攝細緻相片,位置唔阻礙遊人出入,並非路段,而且Miss A係先企嘅一個,剛好有兩個中年女士喺後面不斷講話,言語間暗示Miss A阻礙兩人影相,當時Miss A只係問號樣,後來Mr E即時向Miss A講話,兩位女士即時無聲出,唔敢再多講幾句⋯大家對影相爭位霸位問題又有無咩諗法?


E.A.Tips﹕

(1)經銀礦灣觀景台、銀礦灣渡假酒店、銀礦灣泳灘,由銀礦灣泳灘公廁、更衣室進入後面隱藏小路,附近都係青蔥草地,沿路行可以直接去到銀礦瀑布,中途分岔路會有指示牌,先轉左,再轉右,直上小坡就會行到奧運徑。直行穿過白銀鄉門牌可以睇埋文武廟,U turn可以直上銀礦瀑布。
(2)雨季不宜行近瀑布,本身已經要澗水或行石塊,落雨水流會更湍急,更危險。
(3)可由中環6號碼頭乘搭渡輪,慢船船程約50至55分鐘,快船則約35至40分鐘,亦可從東涌乘搭大嶼山巴士3M,車程約40至45分鐘,從運輸處網站新大嶼山巴士3M可睇睇收費。
(4)梅窩碼頭附近有單車出租,約$40可租全日,不過唔建議經泳灘去瀑布,反而可以踩經白銀鄉村去瀑布,大多平坦路段,無咁多上落。
(5)白銀鄉村附近不時有牛牛出沒,記得唔好以身犯險,避免接觸牛隻,最好安靜行過就好。
(6)瀑布附近無補給點,最好先喺泳灘或碼頭附近作補給。
(7)銀礦洞洞口又細又暗,最好開著手機電筒作照明用途。
(8)銀礦洞路面濕滑,要小心洞內安全。
(9)由銀礦瀑布向上山方向行約5分鐘,即會見到涼亭,涼亭背後就係銀礦洞。
(10)廢屋附近遍佈惡蚊,最好噴定蚊怕水先行。


銀礦灣瀑布

大嶼山梅窩
24hours

銀礦洞

梅窩
24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


長假期後人氣熱點頓變空蕩蕩巨石陣 30分鐘從炮台山日式庭園登北角後山新手路線紅香爐峰
【野餐隨行】鰂魚涌香港人高水準兩餸飯最平$32 闖北角清靜海邊公園野餐近汽車渡輪碼頭
新田加州花園保留罕見赤紅色殖民時代電話亭 英式小庭園探索圓柱形皇冠郵筒/貴族風時鐘
【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠
大圍舊式茶樓客香邨現已恢復24小時營業 火鍋店616班底接手保留經典糯米包/魚翅餃
非來自台灣?本土製牛肉麵旺角/長沙灣有得食 外賣自取折後$50有找
近屯門碼頭!屯門蝴蝶灣泰國冬蔭功蝦湯奶白變橙紅 估吓一碗有幾多隻蝦?
鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口
【野餐隨行】登紅燈山觀九龍半島!何文田勝利道姊妹店廚房打通 兄弟邦x鮮丼家一舖兩用賣日式丼飯
太子人氣車仔麵湯底鹵汁混腩汁 16款麵底任揀必試低卡蒟蒻麵
薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場
「食街」搵食遊!西貢巷弄7間夏日必去本土小食店 離碼頭僅2分鐘步程
全港7間兩餸飯專門店良心地圖!港九新界遍地開花間間平靚正低至$32!(最新消息﹕5月鰂魚涌有新店)
近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】
【野餐隨行】鴨脷洲海邊歎有料車仔麵 前臨南區純白燈塔眺東博寮海峽3支煙囪 30分鐘輕鬆走完小玉桂山
月前旺角設分店齊齊叫雞!上水鳳鳴居足料無味精雞湯麵濃郁可口 醉雞嫩滑+10款湯底回頭率極高