梅窩銀礦灣>東灣頭>長沙欄>稔樹灣>愉景灣
兩個人影吓相,  新界

銀礦灣東灣頭起步 2小時穿梭梅窩愉景灣瞰高空180度景觀 神樂院/純白教堂打卡 探索長沙欄稔樹灣小村落

瀏覽次數:463
個人瀏覽過





梅窩、愉景灣皆為本地著名度假小鎮,遍佈歐陸風情,有山有水,環境清靜,景色怡人,適合拍拖兩個人短遊。唔少人都會於週末專程乘搭渡輪或巴士分別進入兩地,其實要來往梅窩、愉景灣,一條路線就可以到達,同一日可以同時遊覽兩個小鎮,非常悠閒,有時間更可以再遊覽欣澳㗎!

今次路線由梅窩出發,徒步走到愉景灣,2小時即可完成,路段全為石屎路,輕鬆易行,朝早玩完梅窩,下晝可以玩埋愉景灣。從山頂位置更可望遼闊景觀,既可以回望銀礦灣,觀望愉景灣,亦可以超近距離俯視坪洲,亦可遠眺喜靈洲、周公島,甚至青衣、西環。

從銀礦灣泳灘起步,走到最末端即可見東灣頭公廁,進入旁邊山路可直上東灣頭,初段上斜後,沿愉景灣、神學院指示牌轉上登山天梯,雖然稍花氣力,但上山路段總算寬闊易行。

走上一半,已經可回望梅窩海景,可作休息點,走過30分鐘,路段少有山路,大多有欄杆,為石屎路,於山坳找尋路線上頂端涼亭,而涼亭右邊則為一座無名小山嘅賞景位,靠近狗虱灣,沿清晰山路走入小草坪,可以望更遼闊景觀,180度景觀一覽無遺,山腳有狗虱灣政府爆炸品倉庫,靠近萬角咀。

於山頂觀景位大概高250米,可以超近距離俯瞰坪洲,亦可俯視下一個目的地熙篤會聖母神學院,同時可眺望有周公島之稱嘅Sunshine Island、喜靈洲,眺望更可見青衣、西環。

折返涼亭,往右邊下行路段走去,可直接通往熙篤會聖母神學院,中途可見The Monastery往修院嘅指示牌,大概20分鐘即可到達Pax Intrantibus小庭園,通過淺藍色調永援聖母橋可到達熙篤會聖母神學院教堂。整個神樂院依山而建,近海邊,曾飼養乳牛、以生產十字牌牛奶聞名。



Pax Intrantibus為聖母亭,以中式瓦頂配西式十字架裝飾,設計中西合壁,容許遊客進入;而聖母神學院又稱熙篤會神學院,一般唔開放予公眾。教堂於1950年興建,屬大嶼山天主教隱修院,曾經歷國共內戰,據資料顯示,神樂院隱修士稱當初院長同十幾位隱修士歷盡艱辛,最終南下建院,同時認為香港會否落入中共之手為未知之數。

返回愉景灣大水坑山路,從通往聖母神樂院碼頭嘅下山路段,10分鐘步程可見樹上釘上14個十字架、耶穌像,代表14站苦路,象徵耶穌受難,而盡頭可見沙灘、碼頭白色燈塔。

沿十字架路走,中段見指示牌可插入通往稔樹灣小路,只需步行約20分鐘,就可到達稔樹灣村,可近距離望愉景灣嘅高樓。由聖母神樂院碼頭走到稔樹灣村,中間會經過長沙欄。事實上,長沙欄望落唔大,但海灣比稔樹灣大,村屋唔多,但似乎比較大規模,同樣有村民居住,有村屋之餘亦有耕地;而稔樹灣村則古色古香,似漁村部落,據知村內被唔少菲律賓藉傭工租住,編輯現場所見的確有唔少菲藉人士出入,稔樹灣村同愉景灣則只有一條馬路之隔。

Discovery Bay Plaza旁邊為大白灣沙灘,路線末端更有純白夢幻感滿滿嘅海濱白教堂,往往吸引唔少情侶前往打卡。純白故堂以三角形屋頂同玻璃結構設計,夠晒特別,配合周邊環境,恍如身處外地,感覺一秒穿越關島。


E.A.Tips :

(1) 中環6號、3號碼頭乘搭渡輪可到達梅窩、愉景灣,而梅窩、愉景灣之間亦有街渡可以到達;於東涌乘搭大嶼山巴士3M,可到達梅窩碼頭;乘搭巴士路線DB01R可來往愉景灣至東涌,而DB03R則可來往愉景灣至欣澳,由欣澳步行到迪欣湖可轉乘巴士路線R8,前往青馬收費廣場轉乘其他巴士路線到市區。

(2) 愉景灣大多數都屬私人屋苑,而稔樹灣、長沙欄皆為村屋,同樣有唔少居民居住,經過時謹記保持安靜。

(3) 整條路線支路唔多,基本上沿海旁而走,而且多為石屎路段,比較輕鬆,不過前段東灣頭樹蔭唔多,後段下山路先多樹蔭,仍要做少少防曬措施,亦要準備充足糧水。

(4) 大水坑熙篤會聖母神樂院為宗教地方,要尊重宗教,唔好破壞路段上嘅十字架等,同時要保持安靜,注意要將聲量降低!


(5) 記得自己垃圾自己帶走。


(6) 到達愉景灣後,由愉景灣渡輪碼頭行到海濱白教堂路段為暗斜,所需約30分鐘,若唔想行,可以乘搭往愉景北商場巴士代步。


(7) 熙篤會聖母神學院於疫情期間暫停開放。


梅窩銀礦灣泳灘

地離島大嶼山梅窩東灣頭路
24hours

大嶼山長沙欄

Cheung Sha Lan, Lantau Island, N.T.
開24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


長假期後人氣熱點頓變空蕩蕩巨石陣 30分鐘從炮台山日式庭園登北角後山新手路線紅香爐峰
【野餐隨行】鰂魚涌香港人高水準兩餸飯最平$32 闖北角清靜海邊公園野餐近汽車渡輪碼頭
新田加州花園保留罕見赤紅色殖民時代電話亭 英式小庭園探索圓柱形皇冠郵筒/貴族風時鐘
【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠
大圍舊式茶樓客香邨現已恢復24小時營業 火鍋店616班底接手保留經典糯米包/魚翅餃
非來自台灣?本土製牛肉麵旺角/長沙灣有得食 外賣自取折後$50有找
近屯門碼頭!屯門蝴蝶灣泰國冬蔭功蝦湯奶白變橙紅 估吓一碗有幾多隻蝦?
鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口
【野餐隨行】登紅燈山觀九龍半島!何文田勝利道姊妹店廚房打通 兄弟邦x鮮丼家一舖兩用賣日式丼飯
太子人氣車仔麵湯底鹵汁混腩汁 16款麵底任揀必試低卡蒟蒻麵
薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場
「食街」搵食遊!西貢巷弄7間夏日必去本土小食店 離碼頭僅2分鐘步程
全港7間兩餸飯專門店良心地圖!港九新界遍地開花間間平靚正低至$32!(最新消息﹕5月鰂魚涌有新店)
近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】
【野餐隨行】鴨脷洲海邊歎有料車仔麵 前臨南區純白燈塔眺東博寮海峽3支煙囪 30分鐘輕鬆走完小玉桂山
月前旺角設分店齊齊叫雞!上水鳳鳴居足料無味精雞湯麵濃郁可口 醉雞嫩滑+10款湯底回頭率極高