愉景灣小歐洲度假風情大嶼山稔樹灣菲人村旁藏長沙欄無人沙灘

愉景灣向來係香港大嶼山一大海灣，區內環境恍如外國，加上聚集大量外藉人士，令海灣上有如小歐洲，充滿異國風情，而愉景灣海陸相通，不單可以由中環經海路進入，亦可以從東涌或欣澳陸路進入，交通上相當方便，令唔少拍拖情侶都會選擇愉景灣作週末好去處，兩個人可以於海灣內感受度假感，尤其去吓大白灣沙灘。不過，早早已經出名嘅愉景灣大白灣沙灘一望而知人頭湧湧，夏天絕對要見縫插針，如果唔需要落水，只係曬吓太陽或者散吓步、望吓海，編輯建議行完少少找尋一個無人沙灘，環境清靜得多。

由愉景灣渡輪碼頭或巴士總站起步，只需走5至10分鐘就可以去到愉景灣街渡碼頭，折返小路，可沿指示牌進入稔樹灣小路，路口可見一個堆滿垃圾嘅沙灘，編輯當然唔係講呢個沙灘啦！事實上，近街渡碼頭嘅小沙灘並非因遊人於沙灘遺留垃圾，而係因海浪將垃圾捲入沙灘內，導致沙灘遍佈垃圾，至於來源係邊度，編輯不便詳述，沙灘垃圾數量之多並非用丟可以做到。

從路口開始走，只需步行約10分鐘就可以到達稔樹灣村，沿途都為石屎路，並且可隨時回望愉景灣風景，異國情調之社區有如關島，西方低密度豪宅建築同古樸小村落有好大對比。如果沿路前行，可以去到聖母神樂院碼頭，甚至梅窩銀礦灣方向，不過今次Relax，就帶大家走入村內鮮為人知嘅小沙灘。

其實稔樹灣村本來係潮汕藉人士聚居之地，有逾60年歷史，高峰人口曾經有300人居佳，目前村落古色古香，仍有古老漁村感覺，不過現時就演變為菲藉、印藉人士聚首地方，村落由菲藉、印藉傭工租住，沿路會不斷聽到菲人菲語，甚至菲律賓歌曲，更有唔少超級市場手推車，假日就會遍佈於愉景灣工作嘅菲傭、印傭，似足菲藉、印藉人士家鄉，小村落一秒變成港版「菲人村」，恍如抵達菲律賓一樣。

經過天后廟後，繼續向前走，先會見到西藏彩旗、農地，甚至果樹，同時望海岸風景，絕對係少人步行嘅海邊小徑，穿越稔樹灣村之後就可以到達長沙欄沙灘。而長沙欄村落比較少人，而村屋亦較少，對出沙灘人跡罕至，沙灘內有唔少碎石、貝殼，沙粒並非乾沙，但又唔係海浪邊濕潤泥沙，屬於沙粒唔會輕易走入鞋籠內、亦唔會被海水黏滿鞋邊嘅質感。整條步道至沙灘都相當舒暢，走到沙灘盡頭可以見到一堆經海蝕風化嘅大石，亦可眺望愉景灣風景，環境相對大白灣沙灘舒適。

延伸閱讀﹕銀礦灣東灣頭起步 2小時穿梭梅窩愉景灣瞰高空180度景觀神樂院/純白教堂打卡探索長沙欄稔樹灣小村落

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 進入沙灘記得自己垃圾自己帶走。

❷ 由中環3號渡輪碼頭乘搭渡輪可以進入愉景灣，價錢上比較貴，但就較方便，船程僅25分鐘；而於東涌可乘搭巴士路線DB01R，由青嶼幹線收費廣場去欣澳後，可乘搭DB03P,DB03R，可到達愉景廣場巴士總站或愉景北商場。

❸ 長沙欄沙灘並非康文署正式泳灘，無救生設備，所以唔建議落水。