【區區有小店】世外桃源小島風情 嚴選全港4大離島隱藏版打卡Cafe

 

 

 

 

長洲、南丫島、梅窩、坪洲係全港嘅4大離島,每個離島都有唔少小店,今次編輯就為大家推介每個離島一間隱藏版嘅離島打卡Cafe,最啱情侶周末拍拖兩個人去放空吓!

(1)梅窩﹕ Caffe Paradiso

位於梅窩嘅Caffe Paradiso,車船均可抵達,小店靠近碼頭、巴士站,由外國人經營,以意大利名命名,菜式種類繁多,包含輕食、咖啡,甚有水準。咖啡味有淡到濃,略有餘韻,更有唔同品種咖啡可擇。而蘇格蘭白軟包、意式香脆夾包等,質素好高,白軟包挺身,表皮微脆而內裏軟熟,而夾包則夠脆卜卜,兩者於本地都係比較少見嘅輕食。

延伸閱讀﹕賣靚啡撐本土 梅窩海邊咖啡店Caffe Paradiso 軟包似upgrade版「豬柳強」?

(2)坪洲﹕Secret Cafe

坪洲內有一間海邊小型咖啡店叫Secret Cafe,只有小黑板、小櫃台,一般人比較容易走漏眼,因為年輕人的確只係喺屋企門口開設。只係提供3款飲品,包括2款咖啡,以紙杯盛載,好有家庭式感覺。

延伸閱讀﹕只有3個選擇 坪洲極神秘嘅海邊咖啡店Secret Cafe

(3)長洲﹕島中坊研樹下之店

而長洲嘅島中坊研樹下之店,就係一間似文青咖啡店嘅小店,店內既有售賣飾物、帆布袋等手作,將工作室同咖啡店融合。小店亦有提供輕食,以窩夫、奄列、牛角包、梳打、All Day Breakfast等為主,包括有奄列、日式便當等,價錢合理,無論鹹甜點都幾受歡迎。

延伸閱讀﹕賣飾物嘅木系文青咖啡店 長洲島中坊研歎小清新Brunch

(4)南丫島﹕Lala Mama’s Cafe and Grocery

至於南丫島內嘅Lala Mama’s Cafe and Grocery,就係最鮮為人知而收得最埋嘅一間,同時係最有離島人情味嘅一間小店。位於小巷內,令小店似與世隔絕,甚為隱蔽,而室內以木系為主設計,一端有大面木牆櫃,擺放大量精品,簡樸而有格調,中央更有一張可作麻雀枱嘅木枱。身處小店當中,可一邊品嚐輕食,一邊放空,輕易感受離島慢活之感。店內菜式即叫即整,人手極少,所需時間稍長,但出品不俗,既有葷食,店主亦提供多款素食,而最特別係每款輕食當中都有一件法國小麵包,入口外脆內軟,有獨特酵母味,比平常硬身嘅法國麵包的骰,較軟身,容易入口。

延伸閱讀﹕南丫島隱藏版咖啡店 Lala Mama’s真放空慢活之家



Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!