島中坊研樹下之店

賣飾物嘅木系文青咖啡店 長洲島中坊研歎小清新Brunch



今年夏天,無得去旅行,唯有留喺香港,行吓離島都係一個好選擇。長洲人氣店「島中坊研」以賣飾物、帆布袋等手作揚名,長洲島內有兩間分店,一間靠近東灣海灘,另一間就靠近天后廟對出空地,樹下之店靠近電影《喜劇之王》收陀地一幕位置。

呢間100%長洲製造嘅小店同時以咖啡店、workshop形式開舖,據悉由兩位本地設計師開設,咖啡店並以窩夫、奄列、牛角包、梳打、All Day Breakfast等輕食為主,既可睇睇手作飾物、布袋、寄賣品,甚至搜羅自各地嘅擺設、書本等,亦可坐低歎返個Brunch或下午茶,享受吓島上悠閒感覺,寫意非常,絕對值得拍拖閒遊兼兩個人歎返個Brunch!

兩間分店裝潢相似,純白色調配木質傢俬,一室和諧樸實感,文青味十足,今次小編走訪嘅樹下之店既有室內座位,亦有室外座位,室內有冷氣,室外有風扇亦唔算太熱,外面有自然風反而更舒爽,加上自然光影相更好。咖啡店內食物款式唔少,價錢幾親民,而且足料夠飽肚,套餐大概價錢僅$34至$88,好多人都會點甜品,當中以窩夫最受歡迎,不過小編比較鍾意其他選擇。

奄列套餐 $42 配有奶油多士,有8款餡料任揀,小編揀咗芝士、蘑菇,呢個配搭係比較惹味同穩陣,海量蘑菇夾於金黃色煎蛋內,加上微溶嘅芝士,啖啖芝士鹹香味幾邪惡吓!芝士同蘑菇作奄列餡料非常配合,奄列煎得恰好,香甜又酥香感重嘅奶油多亦可以轉牛角包或法包,唔夠飽肚嘅話,仲可以另加粉麵,尚算抵食。

必食之選有滑蛋蒲燒鰻魚便當 $78,鰻魚平舖日式便當盒內,相當肥美,鰻魚表面灑有大量柴魚片,下面係軟滑炒蛋,最底係珍珠米飯。鰻魚淋上帶有香甜味嘅醬汁,鹹中帶甜,的確幾惹味,如果醬汁再濃少少更好。

每份套餐都會包嘢飲,蜜桃紅茶熱情果綠茶係其中跟餐飲品,小店似乎好支持環保,採用不銹鋼飲管。蜜桃紅茶並非茶包類,雖然唔係新鮮蜜桃,只係罐裝蜜桃,但至少唔係糖漿飲品,配搭紅茶好fresh同解渴。而熱情果綠茶亦同樣冰凍,但杯內冰粒好少,果茶香甜,夏天飲好清爽。如果唔介意加錢,可以試吓自家製糖漬檸檬梳打,屬人氣之選。

E.A.Tips﹕

(1)從長洲碼頭步行過樹下之店,腳程大概只係5至10分鐘。

(2)如果睇手作,建議行沙灘店;如果食嘢,就去樹下店,因為樹下店人流多時根本睇唔到店內任何手作。

(3)叫一個All Day Breakfast嘅價錢,可以叫一份奄列套餐加一份牛角包/法包套餐或飛碟套餐或沙律套餐。

(4)枱面膠袋可以盛載口罩,最好自己將垃圾放入膠袋內,保持衛生。

(5)長洲有2間分店,一間靠近東灣沙灘,另一間就位處天后廟對出空地旁邊,大樹之下。

(6)疫情期間送餐飲,外賣訂單滿$100仲送沙律或雪糕一份。

(7)若為外送需加$8,部份長洲地方未能送到,如大貴灣、長貴邨、雅寧苑、西灣、山頂。

(8)凡滿$30可獲印花乙個,蓋滿10個印花可獲得布丁乙客。

(9)小店為一間頗有人氣嘅長洲良心店,最好避開食飯時間,否則需要等候較長時間。
(10)Like埋Facebook仲有片睇㗎!

延伸閱讀﹕長洲小店到此一遊 到底係台式定港式?

延伸閱讀﹕長洲高空觀景文青遊 登小長城睇怪石抖抖氣

延伸閱讀﹕長洲避人流!樹下藏韆鞦 離島人先知道嘅秘密沙灘

延伸閱讀﹕下一站長洲!長洲角酪網紅人氣店 鐵路牆打卡唔使怕封站

延伸閱讀﹕南丫島隱藏版咖啡店 Lala Mama’s真放空慢活之家

島中坊研

長洲中學路16號地下
星期一 11:30 – 17:30;星期二全日休息;星期三至日 11:30 – 17:30
5722 4252

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!