近年，唔少網紅入長洲一定會去呢間網紅打卡店，長洲角酪主打透心涼嘅乳酪飲品，仲有相當足料嘅大杯水果茶，每一杯都卡-able！最特別嘅係有一面寫住長洲嘅鐵路牆，超有人氣，入長洲都有地下鐵，而且唔需要怕呢個長洲鐵路站隨時會話封就封！
室內設計以藍白色為主，裝潢貫徹網美風格，粉色系列同Tiffany Blue色調超適合打卡，加上一面長洲鐵路站嘅藍白色牆身，以藍白紙皮石舖砌，神還原地下鐵鐵路牆，網紅們周末入長洲都會去長洲角酪打卡，拍拖入長洲時不妨兩個人去歎返杯冰凍茶飲啦。
據悉，該店乳酪以子母奶製，自家發酵，唔會留過夜，而水果茶亦特別每日由果欄攞貨，然後自家製成果蓉，原材料保持新鮮，難怪客人一個接一個。
點選一杯水果四季春 $40，透明杯內透視超多水果材料，有柚子、士多啤梨、奇異果、火龍果、百香果、檸檬、橙、西瓜，非常足料，相比坊間水果茶，水果份量的確係難得地咁多。四季春茶底好清香，有啖啖回甘味，超解渴！再配合水果香甜味，兩者平衡，容易入口，甜味有別於一般茶飲，並非糖漿死甜感覺，甜度被稱為「好似你咁甜」，玩味十足，冧爆。
E.A.Tips﹕
（1）下晝人流極多，建議等黃昏後近入夜時間先去，尤其限聚令6點後禁堂食，再無堂食嘅人，就可以即時買到茶飲，縮短等候時間。
（2）茶飲即叫即整，所以本身都需要等一等。
延伸閱讀﹕長洲小店到此一遊 到底係台式定港式？
延伸閱讀﹕長洲高空觀景文青遊 登小長城睇怪石抖抖氣
延伸閱讀﹕賣飾物嘅木系文青咖啡店 長洲島中坊研歎小清新Brunch
長洲角酪
長洲新興街78號地舖
星期一至六 12:30 – 22:00；星期日 11:00 – 20:00
5682 4638
在〈下一站長洲！長洲角酪網紅人氣店 鐵路牆打卡唔使怕封站〉中有 6 則留言
留言功能已關閉。