[sig_post_pv label=””] 個人瀏覽過
長洲內嘅良心小店，數目係幾個離島當中排第一，足足有19間咁多，編輯先挑選當中4間貼地嘅小店，等讀者們更容易選擇，情侶拍拖兩個人都可以隨時輕易挑選同路人小店。
（1）火車頭酸辣小窩
第一間係以酸辣米線為主打嘅火車頭酸辣小窩，編輯特別推介蕃茄濃湯米線，既可自選一菜、一肉、一粉，湯底有濃郁蕃茄味，茄蓉十足，包括蕃茄、車厘茄，超重茄味，只係茄味蓋過豬骨湯味。其他湯底有豬骨湯、芫荽皮蛋湯、胡椒豬肚湯、酸辣湯、麻辣湯、香辣湯，湯底都夠足料。
延伸閱讀﹕蕃茄濃湯海量茄蓉！ 長洲火車頭酸辣小窩餸菜自由配搭
（2）長洲角酪
另一間係一間網紅店，已經被打卡打到舖天蓋地，特別係藍白色嘅地下鐵鐵路牆，配搭招牌乳酪飲品或水果茶，杯杯都IG-able，顏色夠Sharp，而且材料豐富，玩味十足，只係價錢偏貴。
延伸閱讀﹕下一站長洲！長洲角酪網紅人氣店 鐵路牆打卡唔使怕封站
（3）到此一遊
而每日最早開檔嘅到此一遊，係可以保證周末早入長洲都有嘢食嘅一間，菜式價錢夠親民，編輯只係疑惑到底係台灣菜定港式美食。菜單中有中式、西式、日式、越式、泰式、馬拉式、港式美食，多元化程度似足大雜燴，最特別係餐牌有動漫卡通，幾得意。
延伸閱讀﹕長洲小店到此一遊 到底係台式定港式？
（4）島中坊研樹下之店
至於島中坊研樹下之店就係另一間幾多人食嘅文青Cafe，小店以窩夫、奄列、牛角包、梳打、All Day Breakfast等輕食為主，最平$34。小店室內有唔少手作飾物、布袋、寄賣品，另一間分店係島中坊研海灘店，靠近東灣泳灘，裝潢同樣以純白配木系設計，和諧樸實。
延伸閱讀﹕賣飾物嘅木系文青咖啡店 長洲島中坊研歎小清新Brunch
