2020-12-02

皇后山隨時行足2小時? 教你2分鐘去到印度廟

皇后山印度廟


去皇后山搵唔到印度廟?皇后山印度廟隱居山上,有人去幾次都搵唔到印度廟,有人去一次就搵到,到底印度廟係咪真係咁難搵?皇后山軍營同印度廟其實真係同一個地方嚟!據悉,位處榕山閣以南嘅一座一層高舊營房前身係警犬隊基地警官食堂,即將會被用作公屋山麗苑業主委員會辦事處,皇后山印度廟則被劃於屋苑地界外,慶幸獲得保留。今次帶大家一次過行晒皇后山軍營同印度廟,趁重有機會就探訪吓皇后山印度廟。行上軍營分分鐘要用2小時,但如果只係去印度廟,其實2分鐘已經輕易到達,最啱兩個人去打吓卡!

皇后山印度廟本身係粉嶺軍地,60年代由駐守尼泊爾踞喀兵(Gurkhas)建造,據稱係供奉毀滅之神濕婆(Shiva),直到1996年踞喀兵撤走,印度廟隨即被荒廢,到10年前被評為三級歷史建築。無論印度廟定軍營,從Google地圖都可以見到位於小山頂上,而且全被綠色大樹包圍,從外面難以見到印度廟確實位置,令印度廟有種神秘又神聖嘅感覺。

唔少人行好耐都搵唔到印度廟,事實上只需沿鐵絲網最外圍走,即使見分岔路都毋須向上走,右邊會持續見到施工地盤,步行約100米後,向左望一望,印度廟即映入眼簾,腳程只係2分鐘。

整座印度廟以灰、綠色設計,呈六角形,上面有六個皇冠狀尖頂,貌似由多個三角形組成。翻查資料,原來蓮花狀建築亦係印度教中象徵神聖嘅蓮花,本來叫蓮花廟,目前叫皇后山軍營印度廟(Hindu Temple, Burma Lines)。走入印度廟,內部有六面,其中一面有神壇,可供崇拜之用,而每一面都設有門戶同小窗,每面分別髹上藍、橙紅色,天窗更偏黃色,非常搶眼!倘若有陽光照射,恍惚會有一道神聖之光,可為印度廟添上幾分神秘宗教色彩。印度廟建築設計獨特,情侶拍拖去影相留念會感覺到印度廟帶有幾分神聖、浪漫,值得一去。

睇完印度廟,回程時不妨從分岔路口向上走,去皇后山軍營睇一睇,軍營只係喺印度廟附近,近在咫尺,空間甚廣,據悉同維園差唔多大,軍營內有一座又一座有煙囪嘅綠色營房,大概有約20座,軍營內佈滿花草樹木,附近可以見到有已拆卸嘅籃球架同操場,綠色平房內,一室頹垣敗瓦,好有廢墟感。

皇后山軍營依山而建,原本係駐港英軍營房,90年代曾俾皇家香港警務處使用,後來改建為辦公室或警察單位用途,包括警犬隊同警察搜查隊,警犬隊等遷出後就變成警察訓練之用,最終同樣被荒廢同丟空。

E.A.Tips﹕

(1)從粉嶺市中心小巴總站乘搭52B綠色小巴,總站係鶴藪、流水響水塘,於布格仔路落車,車程僅約20mins。落車位置隨時會見到大唐狗,怕狗要特別留意。
(2)沿布格仔路直入,會經過地盤、廢車場、鐵皮廠同村屋,直至見到鍾記士多指示牌,轉右向公廁方向,公廁後可到達皇后山印度廟入口處;而另一個入口處可以喺布格仔路休憩處前面轉右,會搵到小路入去,會經過舊狗房,即警犬訓練地方,該路段時間比較長,約15至20mins。基本上整個軍營同印度廟都被鐵絲網重重包圍,路段係非官方行山徑,要去影相就要自己諗方法啦!
(3)軍營同印度廟位置都雜草叢生,而且超多蚊,印度廟附近更加係惡蚊滋生地方,建議必定要噴定蚊怕水,兼著長袖衫褲,因為即使著晒長衫長褲,仍然可以被惡蚊咬到!
(4)印度廟係一個歷史遺跡,打卡還打卡,記得要好好保護,唔好隨便破壞。
(5)皇后山軍營路段比較複雜,容易迷路,所以一定要做足準備功夫,可以跟山友們嘅絲帶路行,又或者自製一條絲帶路作記認,行嘅時候要不時回望,記住去程路線,以免回程搵唔到路。
(6)山上隨時有蛇出沒,建議等蛇冬眠之後先行上山。
(7)布格仔路不時有地盤嘅大貨車經過,行過要小心大貨車。
(8)去印度廟嘅路段雖然唔長,但泥土鬆軟,步行時要特別小心,同時要小心旁邊地盤會有碎石墜落。

皇后山印度廟

新界北區粉嶺軍地沙頭角公路
24hours

皇后山軍營

新界北區粉嶺軍地
24hours

延伸閱讀﹕蝴蝶山有蝴蝶? 晨運路線眺新界北風景

延伸閱讀﹕粉嶺聯和墟平價泰國菜 必食超濃船河湯底牛湯粉

延伸閱讀﹕綠意盎然 流水潺潺 「香港小桂林」流水響水塘最啱野餐露營

Please Like & Follow & Subscribe /
歡迎讚好、追蹤、訂閱

       

3 thoughts on “皇后山隨時行足2小時? 教你2分鐘去到印度廟

Comments are closed.