沙頭角邊境遊！賞紅樹林/蘆葦花田/童話村夢幻場景一文輕鬆遊走鹿頸鳳坑谷埔

去戶外都嫌多人？以下呢條郊遊路線人跡罕至之餘，路段平坦易行，梯級唔多，沿海而走，毋須辛苦上山，風光如畫，飽覽紅樹林海岸，位置靠近邊境，亦可以欣賞無遮擋日落靚景，客街村莊附近仲有片地金黃嘅蘆葦花田，環境同紅樹林一樣夢幻有童話Feel，青山綠水，可暫時遠離繁囂，來回都只係2至3hours，值得兩個人拍拖閒遊。

【Like Facebook / MEWE 緊貼最新資訊，一個Like一個鼓勵，支持原創文章，向Content Farm說不。】

由粉嶺轉乘小巴直達鹿頸，沿路即可以直踩至鳳坑、谷埔，通通靠近新界東北區邊境禁區，正對沙頭角、深圳鹽田區，補靠八仙嶺郊野公園、船灣郊野公園，沿路會經過鹿頸村、雞谷樹下、鹹坑尾，觀賞紅樹林濕地等天然靚景，鹿頸附近有客家老圍村落、碼頭，亦有紅樹林、濕地、石灘等，生態豐富，親親大自然之餘，亦有觀賞價值。沿鳳坑家樂徑行，大多數路段為平坦石屎路，只有少量山路，沿路風景優美，無論親子遊定情侶遊覽都非常適合。

前段既有攀騰嘅植物牆，亦有紅樹林，仲有石灘，紅樹林既可抵受海浪，亦可吸收水中有害物質，對攝影嚟講，環境亦好夢幻，令人心曠神怡，值得打吓卡。鹿頸、鳳坑村都可以喺潮退時睇到紅樹林靚景，沙頭角對岸已經係滿佈高樓大廈嘅深圳，對比強烈。

沿海邊小徑繼續前行，吊燈籠徑可輕鬆散步行入鳳坑、谷埔，不時會見到牛隻，仲可以欣賞童話感滿滿嘅鳳坑村、谷埔，內有夢幻嘅蘆葦草，媲美芒草，同紅樹林一樣好IG-able，可以呃Like。沿途綠草如茵，路段同樣有唔少樹蔭，唔算太曬，走一段約20至30米嘅樓梯後，即抵達神秘嘅鳳坑村，小村落隱藏山谷之下，老屋遍遍，不過鳳坑村有指示牌係禁止非村民入內，甚至加裝鐵絲網，將魚塘同村屋同遊人分隔，只能遙遠觀賞。

鳳坑村碼頭有一個白色小燈柱喺海邊，有幾分歐陸感，亦係打卡熱點，有船隻泊岸時會更有感覺。而前面亦會見到鳳坑村海岸正對小島水浸咀排，等潮退時可以見到一個小沙洲，仲會見到小白鷺企喺小島之上，似足海中小島，但潮漲時會幾乎被海水淹沒。而谷埔村亦係有逾400多年歷史嘅客家老圍，各座破舊小屋只有單層，已荒廢嘅啟才學校亦係逾80年歷史嘅三級歷史建築，曾被用作公祠。校舍對出土地遼闊，會見到生長於濕地或沼澤嘅蘆葦花田，秋天滿目金海，非常夢幻。附近亦會見到有好多蠔殼，據悉居民會喺此處挖蠔。

回程時最好為黃昏時份，潮退時睇完濕地後，潮漲時可以睇日落，隨時可見到一個無遮擋嘅日落靚景，正好為一日遊作結。

E.A.Tips﹕

（1）由粉嶺小巴總站乘搭56K小巴路線，直接於鹿頸總站落車，車程約30分鐘，落車會見到對面係BB開心茶座，見新壆亭涼亭後向入面繼續行，見到新娘潭路路牌後，可沿海岸向前行，直至見到發記士多路牌，轉入鳳坑家樂徑，中段分岔路口記得向左行，必須沿海行先可行到末端。再沿吊燈籠徑行，會到達鳳坑村同鳳坑村碼頭，附近會見到盈佳茶座，繼續行到尾會見到谷埔同谷埔碼頭，附近會見到山水豆腐花小店，整條路段可隨時沿路折返。
（2）留意56K小巴尾班車係夜晚19:30，上車位置都係返回新娘潭路鹿頸停車場前面位置，每班車大概等20至30分鐘，最好唔好最遲先走，因為小巴等候人數唔少，隨時要等1小時先上到車，18:00左右都要等第3班車到19:00先上到車，全程$9.3，詳情可參閱56K小巴路線同時間表。沿鹿頸路行返出去沙頭角公路大概要30分鐘，再等候相關巴士如78K路線。
（3）亦可以揸車直入鹿頸，新娘潭路小巴總站旁有涼亭，新壆亭隔離有鹿頸停車場，或者去到鳳坑家樂徑前嘅雞谷樹下村口泊車位置，兩者相距5至10分鐘腳程。
（4）鹿頸、鳳坑村都有公廁，亦有士多補給。
（5）想睇紅樹林就記得先留意潮汐進退時間。
（6）打卡還打卡，最緊要唔好騷亂村內居民，見禁止指示牌亦唔好再向前行啦。
（7）記得帶備充足食水，打卡時唔好影響大自然生態，同時自己垃圾自己帶走。