琭玥玖

粉嶺川味米線啖啖魚肉 碗碗辣湯有水準



由上年8月開業嘅粉嶺琭玥玖,主打川味米線,可任揀BB辣、小辣或中辣,甚至加餸,價錢算親民,有網民批評水準參差,但今次記者實試覺得水準唔錯,兩個人想食川菜可以試吓。

小店裝潢上唔太起眼,隱藏小路兼似瑟縮於一角,但據稱由前警總飯堂經理打骰,小店黃到金,琭玥玖紀念6.9.。室內以開放式廚房設計,透明度高,類似車仔麵檔模式,煮食過程唔複雜,但座位唔多,只係拍拖去總算方便。

水煮魚或酸菜魚都係川菜必食菜式其中之一,酸菜魚米線 $58 挑選BB辣比較容易入口,表面有芫荽點綴,底層有大量酸菜,酸菜味比辣味稍重,無花椒八角嘅味道。最意外係魚肉份量超多,舖滿米線表面,魚肉滑嫩,有魚味,而且無骨,類似魚柳,可以食到尾都啖啖肉,吸收少少酸辣湯味,米線亦算順滑彈牙,稍嫌未夠軟稔。

每日限量10碗* 嘅麻辣蝦皇米線 $69,小辣已經有足夠辣味,辛辣味比麻香味稍重,亦唔難入口,似乎採用幾種辣椒、香料熬成湯,大概中辣係適合極嗜辣之人。碗內有5至6隻大蝦,雖然係雪藏蝦,蝦味較少,但煮得都爽口彈牙,而配料就有芫荽、芽菜、韭菜、腐皮等,有幾分似譚仔米線,麻辣湯底幾大路吓,味道唔錯。

冷泡茶有3種,包含四季春茶、玫瑰烏龍茶、鐵觀音 $16,以可便攜膠樽盛載,方便循環再用,樽口有隔層,避免飲到茶葉,不過隔層未夠密,加上茶葉浮面,不時會飲到茶葉。玫瑰烏龍茶入口清新,玫瑰味略帶幽香,茶味解渴。

* 根據官方FACEBOOK資料於28/8/2020顯示

延伸閱讀﹕蝴蝶山有蝴蝶? 晨運路線眺新界北風景

延伸閱讀﹕沙頭角邊境遊! 賞紅樹林/蘆葦花田/童話村夢幻場景 一文輕鬆遊走鹿頸鳳坑谷埔

延伸閱讀﹕粉嶺神秘壁畫村 每個角落都有藝術感


E.A.Tips﹕

(1)堂食或外賣都需要先於店外落單俾錢,最後落單時間為21:00。

(2)餐廳無八達通等電子支付系統,需要俾Cash。

(3)室內座位僅10零個,堂食有機會可等候,外賣會比較方便,不過堂食貌似會比較足料。

(4)唔建議搭港鐵,距離實在太遠,巴士路線73,73A,76K,270A,270B,270P,273A, 273D,277X,278P,278X,373,678,978,N73 都可到達華明總站,過對面即到花都廣場;小巴路線501K,501S亦可到達偉明街花園,靠近花都廣場。


琭玥玖

粉嶺百和路88號花都廣場地下9號舖
11:30 – 16:00、18:00 – 21:30
9664 6939

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!