【區區有小店】粉嶺4間良心麵店 川味米線/北海道拉麵/泰國船麵/港式粉麵任揀

 

 

 

粉嶺食店有好多,良心小店如是,今次就揀吓區內4間麵店,分別挑選中式、日式、泰式、港式比大家選擇,間間價錢相宜,情侶拍拖兩個人去食都只係$100左右。

(1)琭玥玖

第一間係以川味米線為主嘅琭玥玖,既有酸菜魚米線,亦有麻辣米線,無論酸辣定麻辣,辣度可自選,亦可加餸,每碗價格合理,比如酸菜魚米線$58有一碗。每碗米線份量充足,配料更豐富,如有大量酸菜魚片,舊舊啖啖肉,食極重有。至於麻辣米線更有幾分似譚仔麻辣米線,香中帶辣,辛辣味比麻香味重,以幾種辣椒、香料熬成湯,容易入口。

延伸閱讀﹕粉嶺川味米線啖啖魚肉 碗碗辣湯有水準

(2)雄泰

第二間係主打泰國菜嘅雄泰,裝潢似泰國餐廳同港式大排檔Crossover,而價錢同當地一樣咁平,難怪人流唔少。菜式以泰式湯粉飯為主,主食介乎$40至$45,小食就係$25至$32,當中以牛湯粉性價比最高,湯頭呈深啡,濃郁惹味,但並非重香料味,有牛味,加上蔥花、炸蒜就更香口。配料有牛腩、牛柏葉、牛丸,軟嫩有咬口。

延伸閱讀﹕粉嶺聯和墟平價泰國菜 必食超濃船河湯底牛湯粉

(3)爵士拉麵

至於英文名以Jazz Ramen命名嘅嘅爵士拉麵,由日本北海道血統少女創立,拉麵湯底由豬骨湯底熬製,加咗胡椒粉。而當地拉麵比其他地方拉麵清淡,所以拉麵湯頭入口無咁濃郁,鹹味唔重。呢間拉麵店似足日本鄉郊嘅拉麵店,有鄉村風格,而非大城市內嘅拉麵店。每碗拉麵最平$45至$50都有,材料簡單,配料只有蟹柳、日式醬油蛋、海草、粟米,只係無叉燒。

延伸閱讀﹕粉嶺正宗北海道風味拉麵 最平45蚊碗超抵食【有片】

(4)良之冰室

至於良之冰室就係4間當中最新嘅一間,以街坊茶餐廳為藍本,價錢合理,一般午餐約$45。小店立場係4間當中最鮮明,食物有好多款式,令人花多眼亂。由茶記ABC餐到大排檔炒粉麵飯,以致港式、川菜、潮式打冷菜、星馬菜等都有,甚至雞煲、烤魚、水煮魚亦有!

延伸閱讀﹕粉嶺聯和墟茶記大雜燴 良之冰室百搭菜式共冶一爐



Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!