3小時長征港版萬里長城！華山軍路連綿芒草上水紅橋新村行到粉嶺坪輋壁畫村黃昏坪洋白茅草原打卡

[sig_post_pv label=””] 個人瀏覽過

被稱為「五岳」之一嘅華山，海拔高約千幾二千米，地勢險要，步行上山甚艱難，萬里長城則同統一六國嘅秦始皇有關，連接燕、趙、秦嘅舊城牆，連綿萬里，歷史悠久嘅萬里長城目前位於大灣區，而香港「上水華山軍路」可算係「港版萬里長城」，結合華山同萬里長城。沿途山過山、嶺過嶺，蜿蜒山路迂迴曲折，「上水華山軍路」乍看來狀似迷你版萬里長城！

有人會由虎地坳起步，但其實由上水紅橋新村起步，以粉嶺坪洋村作結，山路連綿約8至9公里，位於香港新界北面一帶，連接上水、粉嶺，無需要走泥路，只走石屎路都可以走完呢條華山軍路。「華山」原本被稱為「大嶺」，走「上水華山軍路」，需要跨過長甫頭、杉山、馬頭嶺、松山等山頭，遠睇似足「港版萬里長城」般。

延伸閱讀﹕【2021賞花地圖】單車路橫越梧桐河入口有童話風粉嶺廢村秘地賞木棉花

走上華山軍路，一邊可回望梧桐河、上水一帶風景，另一邊可望落馬洲、深圳一帶景色，甚至遠眺深圳梧桐山，前行更可望華山靶場、皇后山，另直視亦可見廣播電視發射塔，景觀開揚，沿途更可找尋著名嘅大嶺祈雨碑、香港皇家軍團(義勇軍)軍徽等具歷史價值地方，不過就要抄小路，離開大路先會搵到。

延伸閱讀﹕皇后山隨時行足2小時？教你2分鐘去到印度廟

不過，縱然只係沿石屎路行走，亦可望遼闊風景，華山軍路更可望連綿芒草，風吹起時更壯觀。沿路每個山嶺都可見芒草遍佈，雖然要征服幾個陡峭山坡，但華山景觀的確令人難忘。

經文錦渡路從紅橋新村起步，先經杉山，再經華山，然後經馬頭嶺、松山，逐步爬升每座山，起伏不少，只要跨過四座山就可完成華山軍路，最後向下行可返回粉嶺坪輋方向，路段由港英時代建造，最高點低於海拔170米，全程需時約3小時。

華山軍路全程並唔算太長，但人流比其他山峰少幾十倍，可避開鬧市人群，記者走完全程見到嘅人唔多過10個，路段算係上山放鬆吓嘅好地方。初段、尾段皆比較容易步行，但部份軍路非常陡斜，斜幅甚大，向上而行比較花氣力，最好有心理準備。離開松山後就係下行路段，可以向下山雞乙公廁(2)為路標，經過下山雞乙即可到達大埔田方向，沿途為鄉郊景色，最後可以出返坪輋路馬路，出口位置為九記士多。

倘若仍然意猶未盡，可以順道探訪位於新界北部打鼓嶺嘅坪輋壁畫村，沿坪原路走進，第二個路口進入後，即可見到一幅又一幅彩色壁畫、卡通圖案，加上全新畫上嘅萌爆Emoji，色彩繽紛，恍如「港版彩虹眷村」，充滿藝術感。據悉，坪輋村曾面臨清拆，村民為保衛家園、引起社會關注，將村內加入各種壁畫，最終村落得以保留。

延伸閱讀﹕粉嶺神秘壁畫村每個角落都有藝術感

而繼續沿坪原路走，可直入坪洋村，經過坪洋村鄉公所，以三鄉亭為路標，涼亭背後就係一片片人氣十足嘅白茅草田！3月盛開，配合黃昏夕陽光線，將小草染成金黃色，背光即可拍攝金黃色效果，放眼金黃草原非常壯觀，絕對係拍拖打卡好去處，難怪近年被稱為人氣景點！

事實上，茅草、芒草同屬「禾本科」植物，一般芒草生長於高山位置，而茅草則生長於開闊平原位置，呢條路線可以上山睇連綿芒草，落山睇遍佈田野嘅浪漫白茅草，絕對值得拍拖遊覽。

延伸閱讀﹕粉嶺聯和墟平價泰國菜必食超濃船河湯底牛湯粉

E.A.Tips :

(1) 若由上水作起點，可乘搭巴士路線70K, 73K或小巴路線59K到文錦渡紅橋新村貨倉車場附近，或由上水市中心步行到梧桐河畔，沿梧桐河走到紅橋新村；若有粉嶺作起點，可乘搭巴士路線79K或小巴路線52K到粉嶺坪輋九記士多落車。

(2) 路段全為石屎路，加上坪洋村草原比較多蚊，謹記最好穿著長褲同做足防蚊措施。

(3) 進入坪輋村、坪洋村要保持安靜，自己垃圾自己帶走，打卡都唔好騷擾村民。

(4) 路段會經過唔少村屋，內有狗隻，怕狗要搵人陪先好。

(5) 上水華山軍路有唔少墓地，要保持安靜，勿騷擾先人。

(6) 坪洋村白茅草位置靠近粉嶺三鄉亭，只需要定位三鄉亭就可以搵到，穿過鄉公所，涼亭後面就係白茅草打卡位。

(7) 走上水華山軍路前，要注意路段練靶場有無掛紅旗，大嶺練靶場範圍係嚴禁進入，若封路、懸掛紅旗或亮紅燈，即係代表目前有練靶活動，謹記切勿亂闖練靶場範圍。不過，最好都係出發前於政府新聞公報、電台新聞或附近村落民政事務署報告板Check清楚解放軍練靶時間，以免有意外發生，據政府新聞公報資料顯示，星期一至六08:00-21:00都可能會用作射擊練習，星期日就大多數可通行。

(8)坪洋村係著名影黃昏茅草景嘅好地方，但人流比較多，而華山軍路沿路都有好多芒草，人流比較稀少，走完全程加埋都無遇到10個途人。

(9) 影相還影相，勿隨意採摘、踐踏芒草同茅草！

(10) 唔建議揸車上山，會破壞郊野原有嘅寧靜同乾淨環境；揸車嘅話，萬勿將車駛到茅草位置，要將車輛泊於石屎地上，唔好駛入沙泥地，皆因車輛駛過時會將泥沙掀起，令途人會吸入泥沙，兩步路都唔願意行就唔好去影茅草啦，謹記唔好做個自私嘅人！

(11) 上水華山軍路全程雖為石屎路，但樹蔭唔多，記得要做足防曬措施，而酷熱天氣或落雨時候，難度會倍增，必須預備足夠糧水。

(12) 落山會經過鄉村小路，謹記唔好喧嘩，勿騷擾村民。