半島大廚製牛骨湯屯門台菜小店試業驚喜連連

[sp_html5video category=”3414″]

四圍去影吓相嘅好處，就係不時會搵到特色美食同試業新店，今次捐窿捐罅搵食去到屯門。2020年捱咗大半，仍然未有得去旅行，近排興Flycation，不過小編去旅行嘅行程入面，最憎就係搭嗰程廉航機，諗唔通有咩咁值得俾錢原機去原機返。無得去旅行，又掛住台灣，唯有食吓台灣菜先，喺屯門發現一間目前仍然試業中嘅台式餐廳，牛肉麵湯底令人印象深刻。

【Like Facebook / MEWE 緊貼最新資訊，一個Like一個鼓勵，支持原創文章，向Content Farm說不。】

以木玥巷命名嘅台式餐廳，貌似一間日式Cafe，但揭開餐牌竟然係台灣菜！翻查資料，餐廳前身係一間叫赤羽居酒屋嘅日本餐廳，9月中旬易手，轉為台灣菜餐廳。餐廳主打台灣小食同經典菜式，亦有創意特飲，價錢同份量都合理，午市套餐介乎$48至$72，屬一般Cafe價錢，兩個人食剛剛好。加上裝潢以木系為主調，播住台灣歌，燈光柔和，亦有偌大窗戶透入陽光，室內唔大，大概只得10張細枱，但座位尚算闊落，幾舒適，拍拖去食都好適合。

台灣菜當中，紅燒牛肉麵 $58都算係經典菜式，價錢唔貴，份量屬正常水平。平時紅燒牛肉麵嘅湯頭都係刻意調校得好濃兼微辣，部份香港人煮嘅牛肉麵食完會口渴，今次湯頭唔算好濃，但都偏向深啡色，但有燉煮出嚟嘅牛味，而軟身嘅紅蘿蔔同無渣嘅白蘿蔔嘅微微鮮甜味可以滲透湯頭內，有些微回甘味，唔搶味，牛肉湯底飲得出並非一般港店炮製嘅質素，好奇心驅使下問問店員，得知牛肉麵係由前半島酒店大廚炮製，並以大量牛骨熬煮湯頭，難怪係有啲與別不同感覺。

牛肉麵材料包含牛腩、牛肋條、牛腱，肉質軟腍，有肉香同少量軟筋位，大舊有厚度，剛剛有微黏感而唔會黐牙，有啲膠質咁，容易入口，旁邊另配有炸蒜、酸菜伴碟，可加可唔加，加咗無太大分別，只係添加少少層次。至於麵條質感相對無太大驚喜，偏幼身，都有微微煙韌彈牙感，質感較軟身，可掛湯。

另一樣寫明推介嘅係黯然銷魂安格斯滷肉飯 $62，翻查資料，官方稱為滷肉蓋飯，而且聲稱同其他地方唔同嘅係因為唔用豬肉，改用安格斯牛肉，飯底係安格斯滷肉飯。碗飯賣相不俗，頂頭完整一塊煎蛋，旁邊係滷肉同兩舊似軟骨嘅肉，將半生熟嘅煎蛋蛋漿同飯粒融合，蛋香味就會同滷肉香混合。牛肉唔肥，比較乾爽，有牛香，肉味濃，但無咩油膩感，呢點係幾有驚喜。旁邊有鹹菜，既開胃又解膩，配搭上唔錯。兩舊軟骨嘅肉略帶黏稠感，入口鹹中帶甜，有膠質感，黏附唔少滷汁，入口嫩滑。

小食當中，本來想試試五目魚餅 $42，原來係一塊有醬汁嘅煎魚餅，不過我哋最後都係揀返鹽酥雞 $42。同台灣酥炸嘅鹽酥雞差唔多，炸粉有少少偏厚，但炸得金黃酥脆，有酥香感，唔算太乾，雞肉唔嚡口，但整體唔算太突出。旁邊有少少椰菜沙律，配搭鹽酥雞無咁肥膩。反而配搭特製醬汁就幾特別，感覺似黑醋，酸酸甜甜，蘸咗無咁膩，幾開胃。

一般咖啡或茶就係套餐包埋，特飲就可以半價，木玥黃金水果茶（菠蘿）$42，半價$21，而玫瑰蜜桃果茶$36，半價$18。水果茶的確好抵飲，尤其係水果茶，金黃色為主調，採用酒杯式盛載，比茶飲更大杯，內含鮮菠蘿片、西瓜、青檸、西柚、梨、熱情果、百香果等，入口酸甜，好Fresh，高身匙羹可以逐舊水果吉住嚟食，夠酸爽，適合飯後飲，同時打卡一流！水果茶嘅茶底唔算濃味，只係清清哋，果香比茶味重，好順口，無咩澀味，冰量幾多。另一杯果茶係熱飲，啖啖玫瑰花香配搭蜜桃香甜味，雖然係罐頭蜜桃，但份量幾多，茶底亦清香甘甜。

E.A.Tips﹕
（1）餐廳幾偏僻，相對較清靜，位處轉角位，靠近紅橋、菁雋，唔建議搭輕鐵，搭巴士啦！
（2）可以揸車去，隔離就係咪錶位，方便泊車。
（3）從室內可以輕易望到室外環境，但從室外就唔容易望到室內環境，即使坐窗邊都會有私隱度。
（4）建議避開食飯時間，唔好太多人，三五知己就夠，即使試業期間都好多人吓，遲吓應該會更多人排隊。
（5）餐廳無加一，試業期間指定時間有8折優惠，詳情請留意官方Facebook。
（6）午市套餐包一般咖啡或茶，特飲就半價。

延伸閱讀﹕屯門小店歎脆卜卜BB乳鴿嫩滑多汁好過去酒樓

延伸閱讀﹕【此黃不同彼黃】無料變有料案內所全新日式午市套餐最平$47