2021-01-27

【此黃不同彼黃】無料變有料案內所 全新日式午市套餐最平$47

有料案內所


近一年無得去日本旅行,掛住「家鄉」只能夠搵日式美食醫吓肚止旅行癮,屯門紅橋一帶有一間以「有料案內所」命名嘅日式小店,室內樓底幾高,大大個紅色光管招牌寫有「歌舞伎町井財街」、「大阪固力果跑人」牆身,恍惚兩個人一秒穿越日本大阪!

原本日文「無料」有免費嘅意思,而「有料」就係要錢嘅意思;「歌舞伎町」就係日本東京新宿大型紅燈區之一,同大阪心齋橋道頓堀一樣「無料案內所」林立;而「案內」有指引、介紹意思;至於「無料案內所」即係免費提供指南嘅地方,但係同日本「黃色」成人行業,甚至性服務有關,行過大阪街頭見到嘅「無料案內所」充滿神秘感,雖然對此有好奇心,但都會感到尷尬。屯門井財街呢間餐廳改為「有料案內所」,此「黃」不同彼「黃」,名字的確改得幾吸睛、幾有意思。

小店本來主打甜品,日式梳乎厘班戟、窩夫、奶蓋刨冰都係極受歡迎嘅甜品,不過等候時間比較長。而今年8月加入午市套餐,目前餐牌大多係簡單易煮嘅正宗日式鹹食,滿滿和式風味,拍拖去食2份套餐,人均約$60幾,最平$47,食得飽肚。

深宵食堂日式炒麵 $40 賣相不俗,份量適中,採用簡單材料,加入類似大阪燒嘅醬汁,燒汁味幾香口,麵條幼身,幾彈牙,配少有雞肉、椰菜、紅蘿蔔絲、洋蔥等。

小食有Wasabi明太子章魚燒 $36,一份有8粒,有別於普通章魚燒,內餡豐富,有章魚粒之餘,再加入Wasabi,唔會成口得粉漿,醬汁份量恰到好處,表面放有明太子,芥末辛辣味配合明太子微鹹味,兩者都唔係太搶味。

而半份職人の炸雞 $15 有3件切片雞肉,油份唔算太多,有生菜絲墊底,炸得香口,雞肉剛好係雞扒之類,肉質軟嫩。值得推介係4隻大阪羽根煎餃 $15,屬正宗日式煎餃子,表面一層輕脆兼熱辣辣上枱,大量木魚碎同紫菜底就係煎餃,味道有驚喜。

最欣賞叫飲品少甜真係少甜,只係正常冰粒太多。凍藍蝶豆花玫瑰荔枝梳打 $20 色澤吸引,上層藍調而下層紅調,荔枝味唔會太甜。凍芝士奶蓋蜜瓜四季春 $0 顏色以綠、白為主,青BB好吸引眼球,茶底有茶香,奶蓋味唔多,蜜瓜味好突出。

餐廳牆身上嘅紅色燈牌映得食物都有紅色燈光,而室內播放住廣東歌音樂,聲音頗大,同日本大阪嘅街道一樣咁嘈雜,撇除廣東歌,聲浪的確係神還原大阪街頭!

E.A.Tips﹕

(1)餐廳營業時間已經轉為12:00至01:30,而非12:00至02:00,同區有外賣服務,晚飯時間多人不妨叫定外賣。

(2)可以於門口QR code預先睇餐牌,入座前會俾另外一張QR code落單用,需挑選1款主食、1款小食、1款飲品,小食價錢一致為$15,若主食挑選關西章魚燒$32加1款小食加$0飲品,價錢最低係$47。
(3)井財街好長,位置喺天橋前面。
(4)餐廳採用高枱高櫈,門口會明顯見到著咩鞋,所以著返正常嘅鞋去會較好。
(5)餐廳雖然好環保地用紙飲管,但建議盡量叫走飲管,因為加咗等於無加,紙飲管啜幾吓、攪拌兩吓就淋晒,唔用飲管更環保。

(6)最後一點係想提醒小店,唔好播錯歌,聽到有一首係惠州政協歌手嘅歌曲。

有料案內所

屯門井財街15號金銘大廈地下3號舖
星期一全日休息;星期二至日 12:00 – 01:30
6657 2866

Please Like & Follow & Subscribe /
歡迎讚好、追蹤、訂閱