屯門高尚住宅旁神秘公園沙灘暗藏夕陽靚景小石灘

[sig_post_pv label=””] 個人瀏覽過

屯門唔單止有黃金海岸嘅黃金泳灘、青山灣泳灘、新咖啡灣泳灘、加多利灣泳灘、屯門避風塘，其實5分鐘車程可以去到東鄰小欖一個神秘沙灘，人流稀少，環境清幽寧靜，海旁可觀賞夕陽靚景同無敵海景，空間遼闊，一旁更有小石灘，適合兩個人散步或影吓相。

【Like Facebook / MEWE 緊貼最新資訊，一個Like一個鼓勵，支持原創文章，向Content Farm說不。】

小沙灘叫Little Coffee Beach或青龍尾灘，前臨屯門港，位處康文署旗下滿佈翠綠林蔭嘅青龍公園海岸，但屬非正式泳灘，公園前臨沙灘，跨過矮牆即達。由沙灘位置可直視大嶼山、東涌、赤鱲角機場同港豬澳人工島，不過享受陽光與海灘都幾寫意。小沙灘人跡罕至，冬暖夏涼，沙灘美景與君同賞、拍拖沙灘漫步都相對其他熱門沙灘有氣氛。

公園綠樹成蔭，背後亦係高尚住宅，跨過矮牆後進入沙灘，沙灘唔大，由左行到右都唔夠200米，可望到青龍路直入嘅龍珠島，另一邊更可行到一個小石灘，景色優美，企定定聽吓海浪聲都咪話舒服。

沙灘沙粒算適中，唔太粗糙，但又唔算幼細；而沙灘正對港豬澳同人工島，水質上亦唔需要太有期望，不過目前水質望落都可以接受，少人就無乜垃圾遺留沙灘同海洋。

從入口左邊會見到有小徑、廢屋，沙灘路上不時有貝殼、玻璃碎痕跡。一旁小石灘滿佈礁石，石上有少少青苔，不時見到零星釣魚客，但只適宜日光時間同潮退時候行過去。

延伸閱讀﹕【假日好去處】屯門海景跳蚤市場掃平貨小欖神秘碼頭睇日落

延伸閱讀﹕半島大廚製牛骨湯屯門台菜小店試業驚喜連連

E.A.Tips﹕
（1）乘搭巴士53號或者小巴43B, 140M，可以於龍珠島站落車，只需沿青龍路入瑜翠道行5至10分鐘即達；又或乘搭巴士52X,53,61A,61M,252,252B,252X,261B,962,962B,962E,962N,962S,A33,N962於嘉和里村落車；自駕可從青山公路大欖段、青山公路掃管笏段中間迴旋處轉入青龍路，沿途會經過The Drake、蟠龍半島，再轉入瑜翠道即達。
（2）沙灘係非正式泳灘，無救生員當值，亦無防鯊網等安全設施，所以唔建議落水。沙灘、小石灘位置偏僻，若要落水或行石灘，就要自行注意個人安全問題。
（3）青龍公園位置正對瑜翠園，門口有停車位同公廁。
（4）沙灘係唔少附近居民放狗嘅地方，所以要留意沙灘上隨時有地雷。
（5）沙灘內有唔少牆上或樹上告示，記得要遵守，做個有質素嘅本地人。