2021-08-03

營地草原睇牛牛! 屯門冷門路線新手爆林睇白色波波 走桃坑峒圓墩望三橋尋客家古蹟

大欖角天后廟> 大欖角機場多普勒天氣雷達站> 桃坑峒標高柱> 圓墩郊遊徑> 民安隊圓墩營地> 圓墩村古屋>大欖涌郊野公園>青龍灣石灘

個人瀏覽過



爆林路線向來係行山高手嘅路線,若只係新手行山,又或拍拖行山,高級爆林路線就未免過於複雜,想兩個人嘗試爆林又怕迷路、複雜同辛苦,不妨試吓以下呢條簡單爆林路線,路段既少人行,又適合新手,重可以搵吓地面仰望山上嘅巨型白色波波,更可以通往被稱為千島湖嘅大欖涌水塘、神秘嘅桃坑峒,甚至行到圓墩歷史舊村草地睇一群牛牛,沿路可直通青龍頭、深井方向。

由屯門公路轉車站為起點,步行到大欖涌天后廟後沿小路上山,路段為通往大欖角機場多普勒天氣雷達站嘅捷徑,上山路線清晰,但有爆林感覺,適合新手行走,編輯探路當日見到有小朋友沿呢條路線行去大欖角機場多普勒天氣雷達站同大欖涌方向,可見路段並唔困難。沿路回望可俯視大欖角,亦可遠眺赤鱲角機場、人工島,不過亦要留意路段始終係山路,留意個人安全。

於屯門公路可仰視山上嘅白色波波,步行約15至20分鐘,即可到達位處屯門大欖涌頂端嘅大欖角機場多普勒天氣雷達站,即可近距離睇白色波波,以白色球形設計嘅雷達站極吸睛,其實係特別為機場服務嘅多普勒天氣雷達,由2014年尾啟用,另一個位處水警基地附近。

據香港天文台資料顯示,雷達站係用作探測對流風暴引起嘅微下擊暴流同風切變,雷達站離機場有12公里,可確保飛機升降安全。雷達站位置可清晰望向赤鱲角機場跑道、升降區,景觀遼闊,可見全海景致,黃昏時間亦可望日落。而雷達站附近更有一堆狗尾草,狀似芒草,打卡影相亦非常適合。

雷達站底就係屯門公路,對面係大嶼山方向,同時雷達站離千島湖唔遠,可沿大欖涌路直搗千島湖,不過今次編輯嘗試行另一邊更神秘嘅路線,走向桃坑峒、圓墩方向,從Google Map可以睇到路線為綠色虛線,事實上係山路爆林路線。山路依山而建,蜿蜒曲折,不過路線尚算明顯,皆因舊時山友已將路段行出嚟,而且絲帶一條接一條,沿山脊走,可以容易搵到桃坑峒、圓墩方向。

此路線可從另一個方向眺望千島湖,睇水塘主壩景,亦可見桃坑峒,路段雖然樹蔭充足,但沙路、碎石繁多,山路比較跣腳,屬中級爆林路線,新手就唔太適宜,要有有經驗山友帶領。

桃坑峒高約344米,由雷達站經桃坑峒行到圓墩,需時約1至2小時,若行到青龍頭就要2至3小時,中段有一個賞景位置,頂端可享270度景觀,從此路段環迴視野,可望三橋,包括汀九橋、青馬大橋、汲水門大橋,亦可回望屯門、大欖涌,近望青山公路深井、馬灣、青龍頭。

走向下行山路接返圓墩郊遊徑,似足從青山腹地返回地面,由非官方行山徑駁回官方行山徑,到達水泥路即可以感覺到山路已經稍為安全。向右邊路段走約5分鐘,即可見到民安隊圓墩營地,內有無敵大草地,活動空間充足,亦可打卡影吓相,黃昏時暖調昏黃光線更有質感,都可算係一個大欖後花園。

      

從營地向前行,即可找尋圓墩古村,目前已改為民安隊訓練營地,而圓墩古村有逾百年歷史,係以前古代商人竭腳地方。圓墩古村被古物諮詢委員會於2010年評為香港三級歷史建築,故一排圓墩村就予以保留,幾座古老客家村屋設計簡樸,窗框陳舊,內有村前屋,古鐘甚有特色。

對出有一大片綠油油大草地,環境清幽,草地上有牛群靜靜地食草,旁邊有少數人野餐,人有人野餐,牛有牛食草,河水不犯井水,約19隻牛分別同本地人各自悠閒生活於青翠草地之上,令圓墩古村似足神秘世外桃源。

營地四通八達,從幾條路都可以走到古村、草地,位置海拔高約230米,位處荃灣青龍頭山上,佔地約20公頃,可容納200人露營,內有營舍、行政樓、圓墩博物館、圓墩古村屋,更有射箭場、籃球場、營火場、停車場、草地足球場、荷花池、吊橋、泳池。荷花池小橋流水,但為人工湖,穿過去即可離開。

圓墩營地有一道吊橋,係石屎橋,從吊橋旁邊小路行下行,可走向青龍頭,密林小徑比較崎嶇不平,需時約30分鐘。沿路遍佈林蔭,叢林茂密,不時可見竹林隧道,走出山路接駁引水道,即可返回大欖郊野公園燒烤場,同時接駁青龍頭龍如路。

繼續走約20分鐘,穿過屯門公路橋底,會見到近圓墩村、帝華軒嘅青龍頭小巴站。龍如路呢條圓墩村就係由70年代搬到山下嘅圓墩村村民,村口亦有圓墩村牌坊。再向海旁走約10分鐘,經青山公路青龍頭段或深井段,可以去到青龍灣石灘方向,介乎大欖、深井之間,一邊可返回屯門、元朗,另一邊則可去深井、荃灣。


E.A.Tips :

(1) 乘搭巴士線263, 52X, 53, 59X, 61M, 68A, 962 , 258D,960,234A,302,於屯門公路轉車站落車,過對面馬路大欖涌村,轉右會經過海事訓練學院,仰望可見白色波波,前行3分鐘可達大欖涌天后廟,沿小路上山,5分鐘會見到背後景觀幾開揚,再前行10分鐘山路,可到達大欖角機場多普勒天氣雷達站。若經大路走,就更安全,但所需時間就比較長,至少要1倍時間,慢走要2至3倍時間,由海事訓練學院起步,經海事訓練學校、大欖涌消防局,沿大欖涌路直行,車輛可能會稍多,再轉入小路,路段較迂迴,會經過舊有水務設施,沿路直行到尾即可見到大欖角機場多普勒天氣雷達站。

(2) 從大欖角機場多普勒天氣雷達站另一邊小路離開,可以行返去石屎路,沿路直出,步行約10分鐘,會到達分岔路口,前面有水務設施,右邊有山徑,但山徑入口佈滿墓地,至於繼續前行就係返回大欖涌消防局方向。

(3) 由大欖角機場多普勒天氣雷達站行去圓墩郊遊徑,中途可以經過桃坑峒,唔經過都要行1小時山林。

(4) 頭段為初級爆林路線,簡單易行,適合行山新手嘅拍拖情侶;而中段山路就係中級爆林路線,相對危險度較高,裝備充足同有經驗先行走就較安全。

(5) 若從另一邊作起點,亦可乘搭巴士路線52X,53、小巴路線96, 96M到青龍頭村站落車,從龍如路步行約20分鐘可由小欖自然教育徑作起點。

(6) 呢條路線可以連表大欖涌水塘,即千島湖,同埋大棠紅葉,一邊有山路,另一邊有石屎路。

(7) 山路崎嶇,必須特別小心安全,要裝備充足。

(8) 愛護環境,謹記自己垃圾自己帶走。

(9) 勿餵食草地牛隻,或影響牛隻生活。


(10) 有一段山路會經過墓地,要專重仙人,忌大聲吵鬧。

(11) 所有路段皆為山路,不時要手腳並用,要避免入黑、落雨前後行走,同時帶備頭燈等照明、手套等工具。

(12) 桃坑峒至圓墩路段行山人士極少,編輯於沿路2個位置僅各遇到1個行山友,人流極少,建議要約多啲朋友行會比較安全。


大欖角機場多普勒天氣雷達站

大欖

桃坑峒標高柱

桃坑峒
24hours

圓墩郊遊徑

大欖郊野公園
24hours

民安隊圓墩營

圓墩

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!
ΔPlease Like & Follow & Subscribe /
歡迎讚好、追蹤、訂閱

       

深水埗大南街咖啡店共享空間 設計藝廊真係值得睇?
【英國偽旅行】本地4個必去英式庭園 英國文學作品場景/海拔最高公園/法定古蹟遍佈港九新界
【美國偽旅行】穿越邁亞密探索海量棕櫚樹 港版千島群島景觀開揚 爽歎美式口味漢堡Comfort Food
【歐洲偽旅行】本地挪威式小花園/城堡打卡 歐式別墅前臨靜謐沙灘 無敵海景盡曬日光浴
青馬橋底睇日落!青衣西草灣賞景打卡秘地 細山步行徑近三支香談心好地方
【意大利偽旅行】穿越「東方威尼斯」 感受香港水鄉小島風情 兩大賞景地眺黃昏夕陽
錦田高埔村天空之城離市中心僅1公里 No Boundary姊妹店HOLA Chill住歎加料厚多士
【澳門偽旅行】迷你葡萄牙羅卡角海岬/倒模路環彩虹屋打卡 歎地道澳門豬扒包兼暢遊黑沙海灘
【泰國偽旅行】港島迷你泰式小屋打卡 海邊恍若峇里島度假 歎過江龍正宗船麵
驚現男團Mirror/Error主題月餅!中秋黃金月餅巡禮2021最完整名單!即睇港九新界連網店月餅預訂攻略!
【台灣偽旅行】遊走新界3大壁畫村 歎地道肉焿湯/台式牛肉麵
【日本偽旅行】全港5個本地「日式庭園」 秒到鳥居/神社/繪馬/動漫場景打卡
超隱秘!素肉骨茶湯底!荃灣巷弄素食車仔麵$50有找 24款純素/蛋奶素車仔餸任揀
消失的「萬壽無疆」? 旺角懷舊東方色彩工業風咖啡店五金味重
入場有限制!大埔慈山寺偽旅行驚現仿日本神社御手洗 必睇全球第2高巨型純白觀音像
瞰鋼線灣景色!穿梭山頂至薄扶林水塘尋港版《千與千尋》場景 新哥德式風格大學堂/伯大尼教堂打卡 薄扶林村都有秘地?