2021-01-27

港版黑沙海灘打卡 5分鐘直上龍鼓灘瞭望台睇超靚夕陽

龍鼓灘+中華白海豚瞭望台


論及屯門睇日落嘅好地方,除咗白泥,龍鼓灘亦係屯門日落靚景地,最啱兩個人拍拖去影吓相,而龍鼓灘沙灘更加係本地少有嘅黑沙海灘,幼細黑色沙粒非常獨特,可媲美澳門黑沙海灘,目前連澳門都去唔到,唯有頂住癮先啦。

龍鼓灘位處屯門西面海岸邊陲,原本叫花香爐,有5000至6000年歷史,靠近龍鼓洲,背靠青山,面向踏石角,附近有唔少大型發電廠,最出名係BBQ場地。沙灘空間唔大,本來無乜值得去,但沙灘內滿佈本地少有嘅黑色沙粒,相當特別。於呢個港版黑沙海灘影吓相,黑色沙粒襯托下令膚色更突出。

沙灘狹長,呈半月狀,視野廣闊,左面為青山,背後為皇帝巖、菠蘿山,右面可遠眺澳門、珠海。本來係背山面海好地方,不過龍鼓灘同時發電廠林立,導致空氣質素一般。

龍鼓水道曾經係中華白海豚出沒地方,所以沙灘背後一座小山丘建有中華白海豚觀景台。只需沿樓梯直行5mins,即可以登上觀景台頂端,只係比沙灘略高,所望景觀已遼闊得多,可以觀賞無敵沙灘夕陽景。從觀景台可望到天上一片晚霞雲彩,黃昏日落時份似足一幅圖畫。

延伸閱讀﹕半島大廚製牛骨湯 屯門台菜小店試業驚喜連連

延伸閱讀﹕屯門隱密小路登頂望青山「孖煙囪」 龍鼓灘皇帝巖俯首日式景象

E.A.Tips﹕

(1)從龍鼓灘巴士總站過對面龍鼓灘村公所、停車場、天后古廟只需1min,穿過龍鼓灘海邊BBQ,即可到達沙灘位置,而沿沙灘右邊方向繼續行走,約2至3mins會見到小橋延伸出馬路,前面左邊會有樓梯直上龍鼓灘中華白海豚瞭望臺,上樓梯腳程僅5至8mins。

(2)由於附近發電廠林立,旁邊亦有BBQ場地,龍鼓灘沙灘環境惡劣,水質亦差,不單無救生員駐守,亦缺乏防鯊網,其實唔適宜落水,所以建議最多喺沙灘散吓步、影吓相就夠。

(3)乘搭輕鐵巴士K52或綠色小巴44號均可到達龍鼓灘,Call Uber往返屯門市中心同龍鼓灘大概係$70。

(4)謹記愛護環境,自己垃圾自己帶走。
(5)要做足防曬準備,避免曬傷。

龍鼓灘中華白海豚瞭望臺

屯門龍鼓灘136地段附近
24hours

Please Like & Follow & Subscribe /
歡迎讚好、追蹤、訂閱

       

One thought on “港版黑沙海灘打卡 5分鐘直上龍鼓灘瞭望台睇超靚夕陽

Comments are closed.