2021-01-27

屯門隱密小路登頂望青山「孖煙囪」 龍鼓灘皇帝巖俯首日式景象

皇帝巖


屯門龍鼓灘係大多數人影日落嘅地方,不時人山人海,其實除咗沙灘附近,背後重有一道隱密小徑可以兩個人輕鬆上山,從高空飽覽整個龍鼓灘景色,由俯視角度會發現龍鼓灘原來有幾分似日本鄉村風格,路段簡單,屬拍拖閒遊之選。

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】

位處龍鼓灘沙灘背後嘅小山丘叫皇帝巖,位處龍鼓灘村,又名皇帝岩、宋王洞,最高點有一舊大石,上面從右到左刻有「皇帝巖」3隻紅色大字。有傳南宋末年元兵入主中原,宋帝昺南下避開元兵,經過香港時曾匿藏大石內,所以叫皇帝巖。

從北朗村村口直行到尾,沿路會一直有路牌指示皇帝巖方向,途中會經過天然士多、劉氏宗祠等,大概只係行5至10mins。當見到連續幾間60至70年代建築嘅房屋,大概係廢棄村屋,刻有「福自天來,天降吉祥」等字句,行多1min就會搵到末端有一道山腳小路。旁邊係廢棄田地、引水道,小路會見到唔少蕉葉、蝴蝶。

沿樓梯直上,樓梯旁邊不時會有幾張長椅,可以休息,山路梯級路段全為石屎樓梯,而且有欄杆,只需直行上頂端就會見到刻有皇帝巖嘅大石。大石內可以棲身,樓下有紀念碑描述宋帝昺事蹟、文天祥作品《過零丁洋》。另外,亦有指東江游擊隊曾以皇帝巖作抗日基地,歷史再多一重層面。

由最頂端平台清風舒爽,既可環瞰龍鼓灘全景,更可眺望沙洲及龍鼓洲海岸公園,亦可遠眺伶仃洋,更加可以從高空欣賞日落靚景。從平台位置俯瞰龍鼓灘,可近望兩支打孖上嘅青山發電廠煙囪(編按﹕孖煙囪?),樓宇整體比較矮小,環境有幾分似日本鄉村感覺。

皇帝巖背靠青山,遠望更有菠蘿山,青山綠水,位置偏僻,遠離市中心,人流比較少,心境更平和,絕對好過去人頭湧湧嘅山丘。

延伸閱讀﹕港版黑沙海灘打卡 5分鐘直上龍鼓灘瞭望台睇超靚夕陽

延伸閱讀﹕飯麵款款芝味濃 屯門小店安格斯漢堡爆多芝士極邪惡

E.A.Tips﹕

(1)從龍鼓灘巴士總站位置出發,巴士總站於龍鼓灘村公所對面,近龍鼓灘北朗村村口,只得K52輕鐵巴士路線、綠色小巴44號可以到達,否則就要Call Uber或自駕,Uber往返屯門市中心同龍鼓灘大約係$70。

(2)上山路段滿佈樹蔭,不過就有少少蚊。

(3)樓梯級幾陡斜,落樓梯比上樓梯更危險,要特別小心。

(4)從山腳行上山頂,上樓梯只需5至10mins。

(5)如果有充足裝備,又夠膽行嘅話,可以去埋肥豬石、十字星石室同花香爐頂。

皇帝巖

龍鼓灘村
24hours

Please Like & Follow & Subscribe /
歡迎讚好、追蹤、訂閱

       

3 thoughts on “屯門隱密小路登頂望青山「孖煙囪」 龍鼓灘皇帝巖俯首日式景象

Comments are closed.