芝味屋

飯麵款款芝味濃 屯門小店安格斯漢堡爆多芝士極邪惡



隱藏喺屯門居屋屋苑內嘅良心圈小店芝味屋,原先於大角嘴開外賣店,其後先後於屯門景峰花園附近金邦商場、翠寧花園開設堂食店,其後又於藍田開設外賣店,同樣以芝士為主題,大多數菜式都加入芝士,絕對係芝士迷必去嘅餐廳!

甫踏入餐廳,世界時鐘即映入眼簾,裝潢唔算複雜,燈光充足,比西餐廳Casual、比茶餐廳舒適,但又唔係文青咖啡店風格,拍拖簡便食吓飯會好適合。

延伸閱讀﹕屯門小店歎脆卜卜BB乳鴿 嫩滑多汁好過去酒樓

芝士焗雞扒飯 $49,連小食$66,雞扒舖滿飯面,表面有一層厚身微溶芝士,大概係Cheddar Cheese、Mozzarella Cheese,烤焗過後,有少量焦香,芝士鹹香味更突出,同時逐漸溶於雞扒同白飯內。雞扒夠大塊,舖滿大部個器皿,雞扒肉質算軟嫩,唔嚡口,芝士味份量夠多,拉起雞扒或白飯時都可以輕易有芝士拉絲效果,夠吸睛。不過,白飯同芝士就較分明,兩者似乎未融合到,配意粉可能會掛汁。

2隻蜜糖芥末雞翼似即炸,雞翼表面有少量蜜糖芥末醬,稍甜,雞皮微脆,雞翼有肉汁,唔太乾。雞翼雖然唔大隻,但醬汁幾開胃,夠可口。除咗蜜糖芥末雞翼,重有芝士薯條、韓式拉絲芝士餃子、焗韓式芝士金沙骨都係小店招牌貨色。

賣相一流嘅溶岩芝士安格斯牛肉煙肉漢堡 $72,入口微鹹,安格斯牛肉好厚實,有牛味,唔韌、唔嚡口,夠足料,只係有少少乾,肉汁豐富啲會更好。漢堡內有安格斯牛肉之餘,亦有生菜、蕃茄、洋蔥等,麵包表面淋上一層厚芝士汁,望落的確有溶岩感覺。

漢堡同時配搭薯條,雖然配上茄汁,芝士汁比茄汁更適合配薯條。不過,薯條唔夠香脆,部份偏淋身,而薯條蘸漢堡底部嘅芝士汁係一大驚喜。普通凍飲加$3,凍檸茶、凍啡杯杯都幾大杯,兩個人食套餐都幾抵食。

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】

延伸閱讀﹕停車場上蓋搖身變IG打卡位 屯門藍調天台運動場藏暗語

延伸閱讀﹕屯門隱密小路登頂望青山「孖煙囪」 龍鼓灘皇帝巖俯首日式景象

E.A.Tips﹕
(1)乘搭巴士61A,61M,260C,60X,60M,61A,61X,61M,62X,269D,260C,263,263A,263C,961路線、小巴44,47S,488S,49S路線均可到達翠寧花園。
(2)餐廳接受信用卡、八達通、Apple Pay或Google Pay埋單。
(3)可以Whatsapp 5420 4977或https://wa.me/85254204977聯絡餐廳詢問餐牌或外賣落單,附近居民滿$100會免費送外賣,部份需付$30至$60。
(4)附近有有咪錶位,可以泊車。
(5)如果由屯門市中心行過去就幾遠,最好都係搭車啦。
(6)小店每個月都有唔同餐牌,每一日亦有唔同款式選擇。

芝味屋

屯門豐安街2號翠寧花園地下19號舖
08:00 – 23:00
5420 4977

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!