2021-05-17

【黃店巡禮】屯門市中心小確幸! 3間鮮為人知街坊小店人均$60有找

【黃店巡禮】屯門市中心 3間 小確幸


屯門市中心嘅良心小店數量多少可圈可點,當中有唔少都係街坊店,但$50樓下嘅小店唔多,今次編輯為大家推介吓其中3間市中心嘅小確幸,拍拖兩個人去分分鐘$100有找!

(1)CHI Tachinomi

由中環碼頭開到屯門市中心嘅CHI Tachinomi,係一間日式居酒屋,仿照日式屋台模式,雖無海景,只有熙來攘往嘅街景,但室內尚可感覺到日本旅行時嘅感覺。當中有低至$55嘅大阪牛肉飯、$68嘅細鰻魚飯 Unagi,牛肉飯以日式慢煮頂級牛肉配越光米,牛肉黏滑有腩筋,略帶牛脂,有肉汁,唔嚡口,燒汁香甜,而鰻魚飯醬汁濃稠,鰻魚軟嫩而豐厚,略帶焦脆。

延伸閱讀﹕屯門市中心小確幸 日式居酒屋歎超水準牛肉飯

(2)水飯鏜

水飯鏜雖然係三間當中水準比較低,但就係三間當中最有本地味道嘅小店,而價錢低至$45,最特別係每日有唔同菜單,有新鮮感。款款菜式好大眾化,似飯堂、茶記,每碟飯嘅飯量充足,唔講美觀度,只講飽肚感,受居民歡迎,男仔都夠食,女仔可能會覺得過多。

延伸閱讀﹕屯門版水飯房?本地食堂風涼水冷 每日餐單不一 快餐最平$45

(3)芝味屋

至於三間當中離市中心稍遠嘅芝味屋,以芝士為主要材料,菜式夠晒邪惡,係芝士迷必食嘅餐廳!$50有找嘅芝士焗雞扒飯既有大塊雞扒,更有兩種芝士,包括Cheddar Cheese、Mozzarella Cheese;而溶岩芝士安格斯牛肉煙肉漢堡更加係賣相一流,厚實牛肉配搭海量芝士汁,編輯覺得芝士汁蘸薯條有驚喜。

延伸閱讀﹕飯麵款款芝味濃 屯門小店安格斯漢堡爆多芝士極邪惡

     

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ Please Like & Follow & Subscribe /
歡迎讚好、追蹤、訂閱