2020-12-06

屯門小店歎脆卜卜BB乳鴿 嫩滑多汁好過去酒樓

留民料理


如果唔事前上網睇評價,自己捐窿捐罅搵食,從偏遠嘅地理位置,往往都可以搵到毫不起眼而有驚喜嘅小店。屯門一間小店喺兩年半前開業,以Fusion菜同串燒為主打,食材中西合璧,煮法款款有異,學廚近20年嘅老闆以巧手炮製無國界料理,當中有一款更加係日本得獎菜式,令人齒頰留香!

小店以留民料理命名,留民取自同音流氓,睇落幾有創意,據悉同老闆自身背景有關,後來學廚,曾為大集團行政總廚,其後跳出嚟開餐廳,成為留民料理大廚兼老闆。

室內座位唔多,大概只有十零廿個座位,餐廳人數唔多,反而大廚會更尊重每個客人,對待客人亦熱情招呼同詢問評價。裝潢亦巧花心思,不單門面滿滿日式居酒屋風格,室內如是,天花掛起林林種種國家國旗,暗示主打fusion菜,仲有日本海報同大廚到日本參賽嘅相片,室內放滿清酒、掛起燈籠、放有屏風等亦有和式風格。燈光暖黃,入門有溫馨感,環境甚舒適,適合拍拖去撐枱腳。

小店招牌菜式係日式生炸BB乳鴿 $78,係大廚嘅得獎菜,亦係最得意嘅作品,菜式曾喺400位參加者中突圍,勇奪2018年的世界鴿王美食大賽特金獎。乳鴿擺盤方面有心思,絕對神還原一隻乳鴿,最啱兩個人開心Share,連鴿頭都有,睇落似一隻向上飛嘅乳鴿,而乳鴿翼同乳鴿髀就需要自己用刀切開。據悉,大廚將BB乳鴿先醃製一晚,翌日將原隻生炸,故目前品嚐到嘅乳鴿比坊間酒樓嘅乳鴿表皮更香脆,聞落有酥炸香,食落有啖啖微甜感,而且有更輕微嘅酒香味,同時肉質嫩滑,醃製得好入味,豐腴肉汁亦得以保留,入口有鹹香味但唔會太鹹。乳鴿上枱時以炸蒜墊底,不單令整體賣相更好,炸蒜亦有吸取油份作用,令乳鴿唔會太油膩。

前菜試試日式海葡萄配蟹籽 $48,蟹籽普遍,但海葡萄一般比較少食,質感類似,同樣有咬口,有幾分脆口,海葡萄比蟹籽帶有較重鹹味,建議食之前將海葡萄同蟹籽先撈勻,味道會更均勻。最頂撤入木魚絲,底部更有檸檬墊底,可令海葡萄減輕鹹味,微酸感更清爽,而拌碟嘅沙律菜亦夠爽脆,全部撈勻更fresh,相當開胃。

小食叫一碟脆炸白鯧魚仔 $88,炸法有幾分似椒鹽九肚魚,賣相吸引,白鯧魚肉質嫩滑,魚肉細緻,又無咩細骨。酥炸後入口外脆內軟,略帶鹹味,既可享受魚皮香脆感,亦可以品嚐啖啖肉。特別配搭特製醬油,極惹味,不過醬油偏辣,唔食辣就要留意。

仲有叫咗一款主菜,就係鹿兒島A5和牛膏燴飯 $168,話明和牛膏,當然唔係食和牛肉,但入口飯粒軟滑又creamy,粒粒煙韌,黏滿和牛膏奶香,滿滿油脂香,的確有和牛燴飯嘅感覺。和牛膏燴飯亦包含香菇粒、翠肉瓜粒、蔬菜粒、香蔥粒等,層次感豐富。

e.a.tips
(1)唔需要問店員攞餐牌,因為餐牌全部寫晒喺牆上。

交通﹕巴士53/61M/A33均可抵達,比港鐵屯門站轉輕鐵三聖方向列車更方便快捷,巴士腳程僅2至3mins,輕鐵腳程需約5至10mins。

延伸閱讀﹕蝴蝶灣爆餡牛角包 入口酥脆 層層剝落超療癒

延伸閱讀﹕半島大廚製牛骨湯 屯門台菜小店試業驚喜連連

留民料理

地址﹕ 屯門青山公路351號彩華花園地下1號舖
營業時間﹕ 18:00 – 01:00
電話﹕ 9810 1551
地址﹕ 屯門青山公路351號彩華花園地下1號舖
營業時間﹕ 18:00 – 01:00
電話﹕ 9810 1551

Please Like & Follow & Subscribe /
歡迎讚好、追蹤、訂閱

       

2 thoughts on “屯門小店歎脆卜卜BB乳鴿 嫩滑多汁好過去酒樓

Comments are closed.