[sp_html5video category=”1659″]
呢棵位於青松觀附近嘅大樹,本來係一棵普通嘅樹,小編兩個人路過發現呢個影相位,最特別嘅係樹上竟然好自然地聚集一群野鴿,包括白鴿,畫面真係極震撼,最啱拍拖觀賞!
由天橋位置睇,樹上滿滿停留嘅野鴿,場面壯觀,可以近距離睇白鴿。而且不斷有野鴿飛到樹枝上,亦有野鴿由樹枝上飛走,繼續喺空中飛翔,來來回回唔知幾多次,似足將呢棵樹當作中途站停留休息一樣,似足一棵「千鳥樹」,拍拖嚟睇幾浪漫㗎!
超近距離睇白鴿
翻查一下風水學,原來有種講法白鴿係代表好兆頭,「白鴿眼」即係白鴿飛臨係因為佢哋睇得上呢個地方,係一個好意頭、好風水。
留意到樹下有拜神用嘅神位,加上靠近青松觀,難度呢棵樹本身有靈氣,吸引飛鴿喺樹上停留,順便吸取靈氣?而白鴿向來象徵和平,如果真係有靈氣,小編期望大半年爭取民主嘅示威活動可以得到空前成功,濫暴、濫捕者可受制裁,令香港得到和平。
位置喺青田路同震寰路交界,由青松觀去青田遊樂場必經嘅天橋,可以近距離睇到樹上白鴿。
E.A.Tips﹕
- 千祈唔好餵飼白鴿,以免白鴿飛近人群對衛生造成影響。
- 保持安靜,人有人行,鴿有鴿休息,大家河水不犯井水。