荃灣香草吉列石燒牛外脆內軟 $35即升級套餐

[sp_html5video category=”1745″]

荃灣向來多嘢食，呢排抗疫期間好多餐廳都少咗人流，呢間日料店主打當然係日本料理，睇餐牌有鍋物、燒肉、壽司刺身等，CP值唔差，價錢好公道。只不過小編兩個人都覺得壽司、刺身、鍋物四圍都有，想食吓啲特別嘅嘢，所以叫咗個招牌吉列牛、小食拼盤，貪方便，一次過可以試勻幾樣嘢。

初見香草吉列牛 $128 配白飯、溏心蛋 +$35仲可以升級套餐

套餐包含刺身、湯或沙律、飲品，湯係味噌湯或南瓜湯，小編揀咗南瓜湯，因為平時食日料通常係味噌湯，嘢飲簡單少少要咗杯是日精選花茶，當日係菊花茶。南瓜湯值得推介，味道好濃，有南瓜味，質感超Creamy。而刺身亦不過不失，厚度OK算厚切，吞拿魚同三文魚每樣2件。

主菜係香草吉列牛，表皮以香草完全包裹嘅牛肉，睇落已經好靚，仲有一開二嘅溏心蛋，醃過但唔鹹。石燒牛嘅牛肉上枱時仲係生嘅，要將一塊又一塊肉片自行擺上爐上面，用石燒方式將牛肉燒熟。記得燒之前將細碟上嘅脂肪當油咁搽喺石上面，之後就可以放牛肉上去燒，只需幾秒就已經足夠。

配埋白飯就剛剛好，牛肉煎完之後油脂香滿滿，比較油膩，白飯自然係最好嘅配搭啦！表皮沾滿香草，入口有啖啖香草香味，加上吉列脆炸過，煎完後入口外脆內軟，表皮鬆脆，肉質軟腍，Miss A覺得唔需要蘸汁同落鹽已經好夠味。

精選小食拼盤 $98

本來想試吓個明太子雞翼$58，但見到小食拼盤有4樣嘢都係$98，有蜜糖同茄汁可以蘸，所以直接叫拼盤一次過試晒4樣，每樣有2件，適合拍拖情侶兩個人享用。炸明太子釀雞翼唔需要蘸醬，入口好香，似燒完又炸，但無燶到，明太子味釀喺雞翼當中，好似唔太鹹，雞鎚無骨，懶人最啱食！

而日式鐵板煎餃子亦煎得好香，本身小編唔多食餃子都覺得佢幾好味，皮唔厚，發覺蘸蜜糖原來幾好味。至於炸和風一口芝士亦值得推介，成粒都係芝士，炸完之後芝士喺炸粉入面呈流心狀，一口咬落去，芝士可以拉絲出嚟。最後有炸和風甘栗紫薯餅，呢樣都係驚喜之一，小編覺得紫薯向來香甜，炸完後表皮鬆脆食落唔太厚粉，入面紫薯軟淋淋，仲有粒粒栗子，層次好豐富。