2020-12-06

荃灣平價日料店前菜有驚喜 必食清爽牛柏葉冷盤

意壽司


    小編去荃灣做完嘢後去搵食,發覺疫症期間好多食店都幾冷清,只有少數食客,不過呢排多數食店都特別注重衛生,試咗呢間日料店,兩個人甫入門口就有店員幫客人量體溫,枱面亦放有消毒用品俾客人使用。

    胡麻冷柏葉 $30
    本來無叫呢道菜,但店員推介呢款前菜,係一款採用牛柏葉製嘅前菜,覺得幾特別,好少食以牛柏葉製嘅冷盤。牛柏葉佐以胡麻汁,醬汁酸酸甜甜,將牛柏葉蘸上胡麻醬汁,入口開胃醒神,拍拖間中試吓啲新嘢都好。而想特別提一提墊底嘅一堆青瓜絲,一般冷盤好少會連墊底伴菜都食得,但愛食青瓜嘅Mr E就話青瓜絲本身配胡麻汁已經好配合。

    帶子蟹膏刺身 $65
    小編覺得蟹膏同帶子刺身本來就鮮甜味美,而將兩者融合後,帶子刺身夾住內餡,內餡係一坨蟹膏,兩者都好新鮮,蟹膏微鹹,加上微甜嘅帶子刺身,入口好爽甜,想食完一啖又一啖,係另一碟好好嘅前菜。

    唐揚單骨雞翼 $35
    每碟有8隻,將雞翼變單骨雞翼,更容易入口,單骨雞翼比雙骨雞翼更易入味。雞翼以脆炸方式表達,入口外脆內軟,好香口惹味,感覺有幾分似M記嘅脆香雞翼,但佢比較juicy。雞翼佐以韓風醬汁,Miss A詢問係咩醬汁嚟,原來係一款自家製嘅韓風醬汁,入口帶酸甜味,配搭脆炸嘅雞翼,食落無咁油膩。

    鵝肝和牛粒石頭飯 $72
    石頭鍋飯伴以鵝肝同和牛粒,感覺好矜貴!飯面舖有一片片鵝肝同一粒粒和牛粒,鵝肝煎過,顯得表皮略帶輕脆,而內裏仍然軟滑,和牛粒有牛味,好香口,肉質軟嫩,輕輕嘴嚼就OK。鍋飯更特別添加鵝肝蓉伴炒,令飯粒都帶有些微特別嘅香味,將鍋飯伴勻後,不難發現鍋底有唔少飯焦,鍋底飯焦薄脆,脆卜卜似足食米通。

    意壽司-心意之日本料理

    地址﹕ 荃灣海壩街26號地下
    營業時間﹕ 11:00 – 22:30
    電話﹕ 2997 1117
    地址﹕ 荃灣海壩街26號地下
    營業時間﹕ 11:00 – 22:30
    電話﹕ 2997 1117

    延伸閱讀﹕荃灣香草吉列石燒牛外脆內軟 $35即升級套餐

    延伸閱讀﹕慢活歎Brunch 南豐紗廠小店撐本地品牌手沖咖啡

    Please Like & Follow & Subscribe /
    歡迎讚好、追蹤、訂閱