2021-01-27

女人街半自助式石燒牛扒 200g都夠食

牛極 半自助式 石燒牛200g都夠食


    呢排好似好興石燒牛扒,小編兩個人分別都有朋友喺食飯時被揀試食石燒牛扒。

    旺角比較就腳,拍拖行完街去食飯都好適合,最後揀咗呢間平平哋嘅石燒牛。甫入門就有自助售賣機,自己揀完食咩先,再俾埋錢。再等店員叫先入座,基本上最平$80就有,而且係半自助模式,麵豉湯沙律白飯都係任食自取,醬汁都有幾款,胡麻沙律汁就係蘸沙律用,鍾意蒜味亦可喺牛扒度加蒜蓉,自家製燒肉汁同辛味燒汁就係蘸牛扒用。不過Miss A覺得辛味燒汁就有啲辣,所以食得辣嘅人先好蘸,BBQ汁蘸肉就好惹味,仲有少少芝麻香。

    有好多款扒任揀,有牛肩扒澳洲扒西冷扒牛柳甚至和牛,兩個人食已經好足夠。

    石燒牛扒上枱時只係一成熟Rare Only,石燒到攝氏300度,需自己喺火山熱石上煎熟牛扒,如果舊石唔夠熱可以叫店員換過塊,建議切成細細塊逐舊逐舊去煎,因為好快就會熟,熟得滯牛肉質感會韌。

    牛肩扒 Top Blade Muscle 180g $80
    煎到5至7成就夠,牛肩扒肉質軟腍,入口有豐腴肉汁,加上少少調味料調味更香,牛肩肉本身比較嫩身,有啲筋位,好夠牛味,咬落油脂香滿滿。180g對女仔其實已經好夠,女士之選!

    牛柳 Tenderloin 200g $110
    食肉獸必點嘅牛柳,200g大大舊都夠食,男士基本都夠,不過部份男士可能300g或400g先夠。牛柳比較厚身,食落好有肉味,比起牛肩當然無咁嫩咁豐富油香,但煎5至7成後,其實都好軟腍,加少少調味料已經好足夠。

    每張枱都有BBQ香料/鹽/胡椒,可以試試。其實加幾粒鹽吊一吊味已經好夠,鍾意可加少少胡椒香,不過BBQ香料比BBQ醬好似遜色咗少少,BBQ香料味道無咁重無咁惹味,不過適合食牛又唔想咁重味嘅人。

    值得一提煎多5分鐘就會變晒色,牛柳都仲有少少粉紅,但牛肩就變晒啡色,成舊已過熟同開始變韌,所以一定要睇住時間逐舊去煎。

    牛極
    地址﹕旺角通菜街78號地舖
    營業時間﹕12:00 – 23:00

    延伸閱讀﹕Cafe Paradise超抵石燒牛 100蚊樓下有交易

    延伸閱讀﹕熱力充足 太子100蚊內食石燒牛

    延伸閱讀﹕平價情人節大餐 女人街歎生蠔+石燒牛扒

    延伸閱讀﹕【有片】銅鑼灣吉列牛超軟嫩 忌廉烏冬勁Creamy

    延伸閱讀﹕荃灣香草吉列石燒牛外脆內軟 $35即升級套餐

    延伸閱讀﹕屯門$200樓下石燒牛扒 套餐價有湯+果汁+前菜+雪糕

    Please Like & Follow & Subscribe /
    歡迎讚好、追蹤、訂閱

           

    2 thoughts on “女人街半自助式石燒牛扒 200g都夠食

    Comments are closed.