兩個人醫吓肚,  和你Taste,  港式

番茄師兄炮製足料蕃茄湯 酸酸甜甜勁開胃



    今次Mr E同Miss A去咗呢間良心食店,兩個人忍唔住去幫襯懲罰吓佢!

    本身我哋都已經好鍾意蕃茄湯底,蕃茄湯不嬲可以配搭好多嘢食,而呢間蕃茄湯定其他嘢都好足料!Mr E同Miss A心靈相通,揀咗「犇犇有禮」配拉麵 $78一碗,加一款配菜都係加$5。

    點單係用過膠嘅紙,之後用水筆俾客人自己剔 ,
    入完單就抺返佢,方便又環保。

    碗碗都真係有蕃茄喺啲湯底度,蕃茄湯絕對係重點!蕃茄味好濃,唔係稀到水嗰種,有少少杰身,食之前飲幾啖,酸酸甜甜好開胃。

    食完再飲埋啲湯都仲得,感覺真係無味精,可以放心飲晒佢,啲牛同拉麵好掛湯,索晒蕃茄湯超惹味,無味精底下啲蕃茄湯都仍然想飲完一啖又一啖。

    呢碗「犇犇有禮」入面真係有3款牛,款款都好新鮮,牛面頰、牛坑腩、崩砂腩聽到都覺得吸引,每樣都唔只得一塊,而且係大大塊!舊舊肉質軟嫩,又無咩筋位,好易嘴嚼。拉麵都係掛湯嘅,黐到蕃茄湯, 麵質剛剛好,唔會太硬或太淋。

    值得一提係佢支有機豆漿,跟餐都係+$10,飲落好清甜!無後加糖嘅味,好原始feel。食完碗蕃茄湯拉麵,再飲返支無糖豆漿好舒服,真係飲豆漿好過飲水,仲有佢好環保。

    小店最適宜就係拍拖去食㗎啦!

    番茄師兄
    地址﹕深水埗基隆街255號地舖
    營業時間﹕12:00 – 15:30;18:00 – 22:00
    電話﹕9165 0670

    延伸閱讀﹕深水埗超平車仔麵 4餸1麵唔使50蚊

    Δ 版權為E.A.Two 兩個人醫吓肚所有,歡迎轉貼連結,勿全篇文章轉載

    Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!