西九龍中心不忘初心

西九「不忘初心」泳裝漫畫少女被下架 (最新消息:新海報上場!)

 

 

 

 

近月,深水埗西九龍中心外牆掛有一系列漫畫作品,6幅以「Good Girl」為主題嘅巨型漫畫少女連標語宣傳海報由本地漫畫插畫家林祥焜繪畫,6幅海報中有4位漫畫少女穿起Bikini泳裝,配上各種宣傳字句,包括「Hello my Love」、「Make your dreams happen」、「好時光」、「Focus on the good」、「不忘初心」、「放肆」,結果受到爭議。一個禮拜前,該漫畫少女系列被建制派控訴,聲稱收到幾10宗家長投訴指漫畫少女「衣著暴露」、「姿勢不雅」、「感到不安」、「影射不良意識」等,並促請西九龍中心拆除相關海報,聲稱會發起網上聯署、去信淫褻物品審裁處,本來西九龍中心無回應建制要求,但日前西九龍中心疑似「跪低」,記者再訪西九龍中心時已發現海報「被消失」。

記者質疑,海報中只係漫畫少女穿上泳裝,並非真人,而且亦唔係好暴露,比起平時沙灘見到嘅泳裝少女同早前水泉澳村大媽裸體浸浴更密實,屬真正健康性感,尺度唔過份。若有人覺得漫畫少女有問題,點解唔向康文署投訴沙灘嘅泳客同浸浴大媽係「衣著暴露」、「姿勢不雅」、「令人感到不安同尷尬」呢?重有三色電視台經常播放女藝員暴露片段搶收視,平時啲內衣廣告、纖體廣告用嘅亦係真人宣傳,更露骨,如果係「正義」就應該逐個投訴。翻查資料,得知該漫畫少女系列海報作品已經一早獲得淫褻物品審裁處通過。

近日記者行過西九龍中心,已發現外牆嘅漫畫少女海報被下架,翻查資料得知插畫家林祥焜指西九龍中心係因為颱風浪卡襲港,避免海報被強風吹爛同傷及途人,所以先拆除,但強調並非有人「成功爭取」,更指遲啲會再有驚喜嘅廣告海報上架。

除咗好「出名」嘅空姐牛肉飯拍烏蠅(只係當日所見,戴返頭盔先),西九8樓Food Court好多間小店都排晒長龍,今次試吓Food Court內嘅泰式美食味力曼谷,主打係海南雞飯、冬蔭功等,但記者反而叫咗泰式蝦醬炒飯$45、泰式濕炒牛河$45,價錢合理,外賣亦免加錢。

泰式蝦醬炒飯味道唔錯,飯粒炒得乾爽,配料有海量肉鬆、蛋絲、蔥花、蝦乾等,飯量充足,好頂肚。蝦醬鹹味唔算重,有少少鹹香味,容易入口。

泰式濕炒牛河就比較失望,齋睇份量充足,賣相幾靚,既有大大塊牛肉,又有海量蔬菜同河粉,但牛河濕得嚟無咗濕炒感,味道偏重味,醬汁偏鹹,薑味亦好重。對比上次錦田嘅一間正宗泰國菜,的確太大對比,食過嗰間泰國人煮嘅濕炒牛河後,原來真係返唔到轉頭。不過呢間河粉幾多,偏幼身,只係唔太掛汁同唔夠香口,但都係一份飽肚嘅菜式。

炒嘢都配有西洋菜蜜同薑片雞湯,可以加$10叫埋青檸梳打,菜蜜純粹潤喉,跟餐雞湯反而比牛河有驚喜,感覺無味精,真係有雞件同雞味,重有好重薑味,貌似落足料。

(25/10更新)插畫家林祥焜早前就預告有驚喜俾大家,截至10月25日00:45,果然有網民發現西九龍中心外牆已掛上3幅全新插畫,記者翌日再到西九龍中心視察,發現的確已掛上幾幅全新插畫,海報中原先嘅漫畫少女只係容貌有變,同樣身穿建制人士所講嘅性感bikini泳裝,只係無咗幾句標語。翻查一下,原來該全新少女漫畫「肥婆四」、「哨牙珍」係嚟自另一位本地漫畫家甘小文,今次接力創作,似乎向原作林祥焜致敬。西九龍中心今次公關水準極高,記者發現原先「不忘初心」少女漫畫背後係黃色底,新插畫改為藍色底,若建制人士唔一視同仁投訴,則代表當初嘅投訴只為政治考量,對人不對事。

味力曼谷

深水埗欽州街37號西九龍中心8樓8F03-04號舖

延伸閱讀﹕番茄師兄炮製足料蕃茄湯 酸酸甜甜勁開胃

延伸閱讀﹕深水埗超平車仔麵 4餸1麵唔使50蚊

(更新自:2020-10-25)

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!