2021-10-21

【3低本地遊】曾擠身全球最型格社區3甲!深水埗歎高水準健康跑友餐 探索草根小區兼輕鬆上山睇日落

個人瀏覽過





香港係一個有獨特色彩嘅地方,今次行程以「3低本地遊」為主旨,意指低成本、低碳、低難度,主要介紹香港本地遊,以零團費開心自己周圍遊,並且加插黃店元素,編輯將會幫你諗埋兩個人拍拖行程,周末可以輕鬆區區自遊行。

首個行程會先以本土色彩濃厚嘅深水埗為目的地,深水埗上年曾經打入外國雜誌《Time Out》公佈嘅2020年「全球 40 個最型格社區」排行榜3甲位置,涵蓋食物、生活、文化、藝術、社區精神等方面,僅次於榜首嘅西班牙巴塞隆拿、第2位嘅美國洛杉磯市中心,成功擠身第3名!深水埗獨特嘅城市風貌,既受本土人士追捧,亦吸引世界各地遊客,區內由歷史悠久嘅小社區,搖身一變成為文青藝術熱點,將新舊文化融合,大街小巷充斥舊式建築同文化之餘,亦加入新式創意小店。官方本地團曾一度因團費昂貴而鬧得熱烘烘,今次編輯就幫大家挑選「3低本地遊」,一嘗深水埗社區遊,可真實了解本地人同草根階層嘅生活,即刻睇吓Budget同行程啦!

第一站﹕南昌公園晨運散步

南昌公園係靠近深水埗嘅公園,擁有五塊大草坪,既係情侶秋天野餐好地方,又係附近居民晨運、散步之地,小朋友更加可以盡情放電。春季期間,園內會種植海量黃花風鈴木,到時滿屏鮮黃色,清麗脫俗,略帶英氣,係唔少人打卡地方。春天可以賞花,秋天可以野餐,南昌公園甚至係唔少龍友拍攝寫真嘅地方,一年四季都受區內居民歡迎。

延伸閱讀﹕南昌公園黃花風鈴木盛開 滿天黃花鮮艷不俗氣

第二站﹕跑緣嚐專業跑友餐

深水埗內嘅食肆大多非常貼地,多數可以放心一試,其中有一間以跑步為主題嘅餐廳,包含跑步餐,受區內跑友歡迎,老闆為基督教牧師,主張健康養生,同唔少客人一樣熱愛跑步,店內有眾多馬拉松跑手選手布、獎牌、獎杯,不時更會現身分享跑步心得。餐點最特別嘅係飛毛腿套餐,以兩隻無賀爾蒙雞下髀炮製,自由配搭香草蜜糖、香辣或黑椒黑芝麻口味,可配搭黃薑飯或意粉,伴有沙律。雞髀原汁原味,相當健康,表皮烤得香脆,少量調味已夠香口,雞肉則肉汁豐腴,脂肪唔多,啖啖嫩滑雞肉,令肚子唔再有空虛感。

延伸閱讀﹕深水埗低調跑友部落結合跑緣 超健康「飛毛腿」醫肚兼學養生跑

第三站﹕體驗本地特色商場

講到香港特色商場,絕對非西九龍中心莫屬!西九曾一度出現海報風波,外牆因掛起6幅巨型「Good Girl」系列漫畫少女作品而被爭議,由本地漫畫插畫家林祥焜繪畫嘅漫畫少女連標語宣傳海報,有4位漫畫少女雖然穿起Bikini泳裝,但已經獲得淫褻物品審裁處通過,配上字句「Hello my Love」、「Make your dreams happen」、「好時光」、「Focus on the good」、「不忘初心」、「放肆」後,被建制人士投訴。湊巧地,商場更換海報,將幾幅漫畫少女下架,林祥焜指商場因颳風浪卡襲港,避免傷及途人而將海報先拆除。直到上月下旬,西九重新將6幅海報掛起,改以另一漫畫家甘小文接力創作,疑向原作致敬,雖然無咗標語,但無損「不忘初心」嘅本土核心價值,絕對係近期值得一遊嘅特色商場。另外,深水埗向來薈萃地踎小食嘅小社區,唔單止有腸粉、豆腐花,亦有好多平價美食小店,當中西九龍中心8樓Food Court就係平價美食集中地,行商場嘅同時可以買少少小食醫吓肚!

延伸閱讀﹕西九跪低? 「不忘初心」泳裝漫畫少女被下架 繼續撐同路人 (最新消息:新海報上場!)

第四站﹕最抵電子用品地掃貨

高登電腦中心、黃金電腦商場係深水埗區內地標之一,最大特色係購物商場既充滿懷舊感,亦主要售賣各種平價電子用品,包含手機、電腦同其他電子用品同科技產品配件,方便大家隨時掃貨。到底點分「高登」同「黃金」?其實無咩太大分別,高登電腦中心靠近欽州街,而黃金電腦商場則靠近福榮街,可以從四面八方進入,由福華街、桂林街、福榮街同欽州街任何一個出入口進入,外牆有大型立體壁畫,好易認。商場原本其實係一個時裝批發市場,目前變成一眾電玩迷嘅天堂,場內一間又一間小店開得密密麻麻,各種遊戲、周邊產品、設備應有盡有,價格有高有低,最好先貨比三家啦!

地址﹕九龍深水埗欽州街94A號(高登電腦中心)/ 九龍深水埗福榮街146至152號(黃金電腦商場)

第五站﹕書店x咖啡店素食主義

行完又食是常識吧?過咗3點3,當然係去歎返個下午茶啦!如果下午茶唔想食太Heavy,就可以挑選素食下午茶,深水埗區內有一間全純素蛋糕店moono,與合舍二合為一,一邊係書店,另一邊係Cafe,打造純素甜品,無添加蛋、奶、人造色素,部份亦不含麩質、牛奶,包含純素卷蛋糕、純素Macaroons、純素法式撻,更有期間限定玄米茶Latte、焙茶Latte,有別於一般Latte,茶味、咖啡味香濃,清新又醒神。

延伸閱讀﹕深水埗超輕盈100%純素甜點 限定玄米茶溝Latte似足日式抺茶

第六站﹕上嘉頓山睇日落

深水埗嘉頓山係全港其中一座最易行嘅小山丘,亦係區內唔少居民晨運、睇日落嘅好地方,係零難度兼唔需要多少體力嘅小山丘。位置介乎深水埗同石硤尾之間,只需15mins,爬上樓梯即可輕易到達山頂位置,從90米高山頂環瞰全區市景。嘉頓山因接近嘉頓麵包廠房,旁邊晨運徑就被約定俗成叫做嘉頓山,西面向大埔道,北面則向澤安邨。黃昏時份,亦係觀賞夕陽之地,最啱情侶拍拖上山影吓相。從嘉頓山高點可俯視最有本土特色嘅舊式唐樓同公屋,等5、6點樓宇燈光逐步亮起時,場面更震撼。除咗日落靚景外,嘉頓山亦係睇夜景嘅好地方,沿美荷樓旁邊樓梯直上,即可輕易到達嘉頓山山頂。

延伸閱讀﹕全港最易行嘅山 深水埗嘉頓山連睇日落兼夜景

第七站﹕歎超濃郁蕃茄湯麵

行完上山,當然要返落山醫吓肚啦!區內必食嘅良心小店以番茄師兄為佼佼者,蕃茄湯底吸引程度唔係言語可以輕易描述,故門口不時大排長龍,重點係兩個人156蚊埋單,的確幾抵食!當中,「犇犇有禮」配拉麵78蚊一碗,可以5蚊自由挑選加配菜一款,蕃茄湯底味道濃郁,偏杰身,蕃茄料多,酸甜味重,夠開胃,全無味精比較難得。拉麵掛湯,麵質軟硬適中,雖然唔算高質。牛肉有牛面頰、牛坑腩、崩砂腩,件件稔身,切得大大塊,軟嫩入味,筋位唔多,肉質唔黐牙。加10蚊可叫支有機豆漿,無糖調味好清甜,食完蕃茄麵飲豆漿重好過飲水。更環保之處係使用過膠紙做餐牌,客人用水筆劃完,入單後可即庴抺走,下一個繼續用,方便之餘又環保。

延伸閱讀﹕番茄師兄炮製足料蕃茄湯 酸酸甜甜勁開胃

Budget(以兩個人計算)﹕
南昌公園 ——————————————— $0
午餐﹕跑緣 ——————————————— $166
西九龍中心 ——————————————— $0
電腦商場 ——————————————— $0 (掃貨另計)
下午茶﹕moono ——————————————— $200
嘉頓山 ——————————————— $0
晚餐﹕番茄師兄 ——————————————— $156
總數 ——————————————— $522

    

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!

ΔPlease Like & Follow & Subscribe /
歡迎讚好、追蹤、訂閱


【3低本地遊】周末穿梭舊工廠/壁畫村兼上山探險打卡 荃灣西海旁歎咖啡睇日落 $650行程包早午晚餐下午茶
隱藏版藍田後花園打卡 穿梭五桂山茅湖山直通將軍澳
赤柱唯一!市集背後街坊小店 每日推出限時午餐益自己友
【3低本地遊】錦田慢活文青遊 必食2間街坊店 探訪城中古村連2日1夜懶人露營地
大角嘴定食版海南雞飯 霓虹燈牌現4款招牌菜式
【3低本地遊】原為客家村落? 秘道探索柴灣戰時遺跡 體育館藏迷你定食屋
【3低本地遊】小西灣前身有料到? 百呎小店有水準 闖入軍事建築遺址
【3低本地遊】何文田歎平價和牛丼 連走4條山徑超簡單路線 邊條路線先係紅燈山?
【3低本地遊】油麻地激厚蛋吐司早餐/石燒牛晚餐 上空中花園兼漫遊紅磚屋打卡
全港5間本土中式點心酒樓 沙田富東閣超抵食「一盅兩件」下午茶 邊間有加大版糯米雞?邊間雞札重有火腿魚肚?
厚切魚生款式眾多 太子日式丼飯外賣店離始創僅1分鐘步程
岩石媲美東平洲馬屎洲!暢遊荔枝莊地質步道+攀登雞麻峒/蛇石坳 深涌閒遊全港最大草地打卡 兩條路線任揀!
山頂加設欄杆!格仔山重修還原紅白格仔 老虎岩石屋活化探索昔日寮屋區
新蒲崗廣場泰日餐廳Crossover 隨時邊食丼飯邊歎冬蔭公
躲藏大角嘴舊商場 微舖獨沽一味只賣越南包
Bakso代表乜?西貢人氣餐廳高水準印尼菜 招牌牛丸粉/牛骨湯飯湯底牛味濃郁

撰文﹕Miss A ;攝影﹕Mr E, Miss A;設計﹕Mr E

View all posts by 撰文﹕Miss A ;攝影﹕Mr E, Miss A;設計﹕Mr E →