2020-09-21
超高質雞煲 雞髀肉多 配料抵食

超高質雞煲 雞髀肉多 配料抵食



天氣凍凍哋,又突然想食雞煲打邊爐,Mr E同Miss A去完電腦商場睇嘢,兩個人行行吓搵到呢間雞煲店。環境唔錯,好光猛,鍾意相機食先嘅人可以唔洗打燈或P圖都可以影得靚,正常價錢,交通方便,食到好高質嘅雞煲,好抵食,環境唔錯,適合拍拖去食。

豐鍋招牌麻辣雞煲 (半隻$188)
Miss A唔太食得辣,所以都係叫咗BB辣,而佢真係唔會BB辣變真係小辣,個煲勁多芫荽!Miss A好憎芫荽,好彩Mr E勁鍾意芫荽,即刻掃走晒啲芫荽,雞煲齋睇賣相已感覺好高質!

一睇個煲真係好多舊雞,而且雞肉部份佔好多,唔係好多唔係好食嘅雞骨,雖然Miss A覺得連住骨嘅雞肉反而係最好味,例如雞背,絕對係最滑嘅部份,而今次呢個雞煲食落感覺同樣高質。好少食到真正有雞煲醬味嘅雞煲,要將雞煲醬調到啱啱好其實好巧功夫,雖然愈辣係愈惹味,但我覺得BB辣反而更加食到雞煲醬味,BB辣嘅辣味唔會搶咗雞煲醬嘅鹹味,唔使好辣已經好惹味。

蒿筍片 $38
Miss A話最驚喜係有蒿筍食,打邊爐好鍾意食蒿筍,淥到剛剛好時,啲蒿筍爽脆又鮮甜。

嫩鴨血 $63
打邊爐食辣湯底另一樣要叫嘅係鴨血,不過呢隻鴨血平啲,同新鮮鴨血有分別,當然比新鮮鴨血遜色,賣相同口感似豬紅,只係香港好少有新鮮鴨血食。

自家製鮮蝦木耳雲吞 (8粒 $70)
雲吞值得食,幾有心思同幾足料,雲吞皮唔係厚,餡料亦好充足,真係包咗蝦喺入面,而木耳亦有益。

特級牛柳粒 $88
牛柳粒賣相一流,食落亦超軟腍,入口有油脂香,同時有肉感,粒粒雪花分佈均勻,唔會太肥或太瘦,建議淥3至5分鐘。

若少過3分鐘就太生,3分鐘其實都有啲生生哋偏粉紅,但可以食,入口可能有少少難咬;4分鐘就都仍然有粉紅色,但已唔算生;而5分鐘就最好,剛剛無粉紅色,又未至於好啡色;6分鐘就已經過熟,全啡色,入口已有柴皮同肉絲feel。

烏梅汁 $42/杯
酸酸哋,平時鍾意食梅可以試吓,不過唔係好啱我哋。

水蜜桃梳打 $42/杯
Miss A不嬲鍾意水蜜桃味嘅嘢,所以當然覺得好飲,但一定要攪勻,否剛下面會太甜。

出面原來仲有個小型打卡位,又幾有諗頭,簡單整個彩色霓虹燈天使翼就引到人望過去。

豐鍋雞煲
地址﹕深水埗荔枝角道240號地下A-C號舖
營業時間﹕17:30 – 01:00
電話﹕3619 1133

Please Like & Follow & Subscribe /
歡迎讚好、追蹤、訂閱