饗 車仔麵 超平車仔麵 4餸1麵唔使50蚊

深水埗超平車仔麵 4餸1麵唔使50蚊



拍拖食乜好?目前良心食店買少見少,小編兩個人當然要親身支持出一分力啦!

今次要去SSP鴨記買嘢,所以去咗街頭呢間車仔麵店醫肚先,一去到明明已經2點半,都仲要排隊入,條隊真係排極都仲有香港人犀利!最終我哋等咗半個鐘先有位,等完都3點,啱啱好下午茶,平咗。

小編唔係好食得辣,所以將所有想試但有辣味嘅嘢擺晒隔離嗰碗度,一碗有秘製辣汁,有2隻辣椒仔。

一碗嗰碗叫咗蕃茄濃湯
2餸一麵 $30;3餸一麵 $38;4餸一麵 $46

車仔餸款式超多,我哋2個人叫咗8個餸。有日式豬軟骨+鹵水牛舌+柱侯牛腩+白蘿蔔+豬紅+鹵水大腸+牛筋+陳皮魚蛋。本來見到出面個牌有鴨血,但入面得豬紅,呢樣係唯一失望嘅地方。每碗都有條菜,我哋叫完發覺叫嗰啲顏色睇落偏啡,不過好滋味。

湯底好濃郁,特別蕃茄湯味道好鮮甜,車仔麵嚟講有蕃茄湯底算難得,而秘製辣湯比想像中無咁辣,2隻辣椒Miss A唔多食得辣都食到,鍾意辣嘅人一定要叫大辣先得啦。

豬紅、蘿蔔、雞翼尖向來係Miss A食車仔麵必點嘅餸,貪佢最易入味!豬軟骨肉質軟腍有咬口,牛筋亦淥得好淋,但柱侯牛腩就反而較遜色,有啲韌難嘴嚼。

值得一讚係鹵水嘢,牛舌同大腸都好味,Mr E唔食牛舌,Miss A覺得牛舌好軟嫩入味;大腸只係Mr E話好食,Miss A表示唔食的。

仲有陳皮魚蛋呀,好少見到會仲有得食,魚蛋彈牙,有陳皮味更難得,交換之後一碗可以有7至8樣餸,嘻嘻。

張單仲寫住香港人反抗,真良心店,唔係為生意扮有良心嗰啲,大家識做啦?!

饗 車仔麵
地址﹕深水埗基隆街391號地下
營業時間﹕星期一至四10:30 – 00:00;星期五至六10:00 – 02:00;星期日10:30 – 00:00
電話﹕2985 6777

延伸閱讀﹕番茄師兄炮製足料蕃茄湯 酸酸甜甜勁開胃

延伸閱讀﹕深水埗網紅小店最平29蚊套餐 除咗牛丸仲有咩食?

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈深水埗超平車仔麵 4餸1麵唔使50蚊〉中有 2 則留言

留言功能已關閉。