2021-01-27

錦田街坊茶記爆汁牛漢堡 低調高手製超濃蕃茄湯

帶記餐廳


帶記餐廳
{"popup_fix":"false"}

年頭去錦田搵食,搵到一間正宗泰國菜餐廳,當時人流唔多,以附近居民為主;年尾再去錦田,該餐廳變成排隊店,唔少情侶拍拖去食。原來錦田大馬路上除咗嗰間泰國菜,隔離其實重有一間被忽略嘅好食店,值得兩個人去試一試!

延伸閱讀﹕錦田隱世正宗泰國菜 平價濕炒河粉極惹味

同樣位處錦田大馬路嘅帶記餐廳,正正喺KOK KOK旁邊,兩間都係同路人,不過後者裝潢較新潮,而前者則明顯比較陳舊,由門口招牌已經可以見到充滿歷史痕跡,兩間有強烈對比,令後者更毫不起眼。步入店內,貫徹低調作風,店內同一般茶餐廳無分別,但食物水準就超越唔少餐廳。

翻查資料,帶記冰室由80年代初已經存在,裝潢並無改變,屬錦田區內一間街坊小店。餐廳有別於一般茶記,午餐足足有16款任揀,以意粉、天使麵為主,價錢貼地,即叫即製,不過記者大力推介嘅係店內周末套餐,兩款都令人驚喜。

第一款係鮮茄湯麵套餐 $32,以蕃茄濃湯配通粉,可揀米粉或麵,甚至烏冬、出前一丁,配有牛油多士,可另加配料,每款$4,可揀火腿、煎蛋、雞肉腸、餐肉或蟹柳。一睇就知廚師對煮食認真,蕃茄湯布粒粒蕃茄肉,由新鮮蕃茄打出蕃茄蓉,蕃茄味唔會好酸,僅有微微酸甜味,無花巧調味,並非輕易煮得出嚟,屬真正濃郁蕃茄湯,食嗰刻會知道大廚係一個高手。

另一款係新鮮漢堡包餐 $40,只限星期六、日朝早11:00後供應,招牌漢堡包以新鮮免治牛肉、蕃茄、生菜,配合自家製醬汁炮製,可另加配料芝士或什菇,每款$4。牛肉係有手打感覺,好厚身,有結實感,入口新鮮軟嫩,好Juicy,比連鎖店嘅質素高十倍。漢堡包餡料亦豐富,鮮蕃茄同生菜夠爽脆,重有另外加入嘅芝士香,芝士片呈微溶狀態,配合醬汁更惹味。

除咗餐牌上嘅傳統飲品,重有4款可以試試嘅特飲,跟餐加$10,包括有涼粉紅豆冰荔枝梳打,最啱女士飲用嘅桂圓紅棗黑糖薑茶,重有桂花酒釀(荔枝味)。當中,涼粉紅豆冰夠消暑,入口冰涼,涼粉清爽軟滑,紅豆微甜,而且煲得夠淋,將紅豆、涼粉同時放入口中,清涼嘅涼粉配合軟綿嘅紅豆粒粒,夠晒爽甜。

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】

延伸閱讀﹕錦田百年樹屋被颱風吹冧 平湖雙池塘天空之鏡日落勝地

延伸閱讀﹕驚現小黑羊! 錦田古村逢吉鄉有段故 鄉郊小路滿佈農莊露營地

E.A.Tips﹕

(1)室內無咩冷氣,夏天去要有所準備,秋冬天去就無問題。

(2)電視機下方寫住重有9吋Pizza賣,每份只係$48,有5至6款配料。

(3)蕃茄湯唔加配料會更食到原味感覺,但漢堡包加入芝士或什菇就更香口惹味。

(4)位置靠近錦田市中心郵政局,穿過錦田紅磚屋、錦田壁畫村,去到錦田公路行1min就會見到。

帶記餐廳

元朗錦田大馬路217號地下
星期一 08:00 – 18:00;星期二全日休息;星期三至日、公眾假期 08:00 – 18:00
2442 1622

Please Like & Follow & Subscribe /
歡迎讚好、追蹤、訂閱

       

One thought on “錦田街坊茶記爆汁牛漢堡 低調高手製超濃蕃茄湯

Comments are closed.