【區區有小店】錦田4間打卡秘店 2間高水準街坊小店菜式超正宗

 

 

 

 

新界錦田有唔少營地,吸引愈來愈多人洶湧而至,而錦田區內到底有乜好食?唔少人都會揀CoHee Studio,其實錦田重有4間鮮為人知嘅良心小店,有3間都位於錦田公路市中心位置,間間有水準又可以打卡,絕對值得情侶拍拖兩個人去探訪吓!

(1)帶記餐廳

位於錦田公路嘅帶記餐廳,係最靠近市中心嘅一間,不過只係喺KOK KOK隔離,小店由80年代起屹立至今,係錦田區內一間真街坊店。小店為街坊茶記,裝潢比較陳舊,充滿歷史痕跡,比較低調,但午餐有足足16款選擇,包括意粉、天使麵。而編輯想特別推介周末限定嘅鮮茄湯麵套餐、新鮮漢堡包餐,前者蕃茄蓉十足,係以新鮮蕃茄打出茄蓉,無花巧調味,而後者係手打牛肉漢堡包,有厚實感,而且鮮嫩有肉汁。

延伸閱讀﹕錦田街坊茶記爆汁牛漢堡 低調高手製超濃蕃茄湯

(2)KOK KOK

而位於帶記餐廳旁邊嘅KOK KOK,就係一間泰國菜餐廳,菜式正宗,留意到廚房係泰國人主理,款款菜式正宗又有水準!尤其係濕炒河粉,醬汁均勻,河粉軟硬適中,黏上醬汁有濕潤感,肉類份量適中,配菜亦夠清新,確實有當地食泰國菜嘅感覺。

延伸閱讀﹕錦田隱世正宗泰國菜 平價濕炒河粉極惹味

(3)錦田匯動青年館 COFFEE LAB BY COUNT.DOWN

至於另一間同樣位處錦田公路嘅係COFFEE LAB BY COUNT.DOWN,咖啡館座落錦田匯動青年館內,有別於一般文青咖啡店,並無顯示任何價錢,反而由客人自由定價,收益用作挑選更優質咖啡豆,非常特別!咖啡店為實驗小店,由實習中嘅年輕咖啡師主理,充當店長,學習管理咖啡店、沖調咖啡、控制成本等。室內有少量座位,室外亦有小花園座位,可以打吓卡。菜式以輕食、咖啡為主,款式唔多,包括牛油果酸種麵包、蛋沙律牛角包、迷你撻法式鹹批、焦糖布丁、紐約芝士蛋糕、抺茶紅豆芝士蛋糕,而咖啡則帶有微微堅果香味。

延伸閱讀﹕全部自由定價! 秒到日式鄉郊 錦田市中心咖啡館秘點似世外桃源

(4)Muse Furniture Lab

呢間係4間當中離錦田市中心最遠嘅一間特色小店,位置近郊,原為古董傢俬舖,結業又重開,副業係咖啡店,內有一個歐陸風情嘅私家大花園、型格黑色小屋同華麗感小屋可以打卡,包含翠綠草原、鞦韆、盆栽,地方偌大,充滿田園風同度假風,悠閒非常。店內有唔少食品、飲品可擇,包括自家製法式可麗餅、期間限定梳打特飲,重有各款意粉、蛋糕甜品。

延伸閱讀﹕2021年人氣打卡店! 元朗近郊復古傢俬舖重開 型格咖啡店連歐陸風小花園 歎自家製法式可麗餅/櫻花冰蜜桃梳打




Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!