近錦田公路！城門新村全新花漾Cafe 唯美日韓風x小清新定食推介

[sig_post_pv label=””] 個人瀏覽過

最近錦田有一間全新開業嘅Cafe，隱藏於巷弄之間，但位置又靠近錦田公路，非常方便。室內採日韓式小清新風格，以原木、乾花為主調，配合日式定食、花茶、咖啡，絕對係少女打卡好地方，亦適合拍拖情侶醫吓肚、影吓相。

新店開業僅約一個月，據年輕老闆所講，前身為一間工程公司，但已經搬出去，遂將原址放租，最後老闆租用作Cafe之用。而「Chit Chai Pastry」原為Studio，據其官方IG顯示，本身小店原為製作蛋糕，而農曆新年亦曾推出手工茶香桃花酥禮盒，可見小店對炮製甜品有一手。店名「Chit Chai」有指要放慢腳步、放鬆心情好好享受嘅意思，最特別係官方有一句「Partnered with We Make Sweet」，似乎甜品係小店嘅招牌作品。

位置為清靜小區，但有別於正對錦田公路、同屬同路人嘅泰國菜餐廳KOK KOK、港式茶餐廳帶記，小店於裝潢上更花心思，門面以粉色花花設計，地上有石仔路，加上位於巷弄之間，有如日本街道內嘅嘅小店。而室內採日韓風格，佈滿白色窗簾，內有大量鮮花、乾燥花草，花漾設計絕對令人少女心爆發，有如去咗一轉旅行。花漾本身就指似花一般綻放嘅時候，意味青春歲月、花樣年華。

延伸閱讀﹕錦田隱世正宗泰國菜平價濕炒河粉極惹味

延伸閱讀﹕錦田街坊茶記爆汁牛漢堡低調高手製超濃蕃茄湯

編輯當日剛好有唔少花茶都無貨，唯有嚐試其他飲品，當中比較特別嘅有印度香料奶茶$48、2種月亮牛奶$58，包括有粉紅月亮、魔幻藍月亮，簡單嚟講即係玫瑰、蝶豆花口味。為配合現場花漾環境，今次挑選玫瑰烏龍湯力$48、玫瑰梳打$48，前者烏龍茶味唔太重，Tonic Water味道比較重，天然苦味稍稍蓋過茶香味，而玫瑰花香味反而可以顯現出嚟，加上杯內有玫瑰花瓣，攪勻後略帶香甜味；而後者則比較穩陣，以玫瑰花糖漿、玫瑰花乾配搭梳打水，略帶酸甜味，入口較香甜，清爽感覺適合夏天飲用。

店內主食唔多，有4款日式美食，特別推介日式定食，當中有鹽燒鯖魚定食$68、海老天丼定食$88，亦有日式咖哩豬扒飯$88、日式燒雞扒胡麻冷烏冬$78。每份都有一碗麵豉湯，定食會配上一碗白飯，麵豉湯內有豆腐、海帶，有麵豉香，鹹味適中。

海老天丼定食有5隻天婦羅大蝦，香脆可口，脆漿唔厚，蝦肉爽口，另亦有脆炸冬菇、青椒、茄子作配菜，醬汁為天婦羅提鮮，而旁邊有少量白蒜，幾清甜。至於日式燒雞扒胡麻冷烏冬則較清爽，烏冬麵條爽滑彈牙，配上胡麻醬更惹味，雞扒肉質嫩滑，醃製後再烹煮唔會太鹹，冰涼感適合熱焫焫嘅初夏食用。

當日限定甜點$38至$68，甜品的確好精緻，當日嘅甜品係焗玉（肉）桂蘋果芝士蛋糕$48，一件蛋糕旁邊佈滿食用花瓣，色彩豐富。蛋糕入口唔太甜膩，芝士味好搶，味道濃郁，蛋糕內有蘋果粒，比較清甜，唔太突出，但令蛋糕更有咬口，反而肉桂味最初唔太明顯，嗒落先發現頂層酥香中有啖啖肉桂香，烘托芝士蛋糕嘅獨特味道。

E.A.Tips﹕

(1) 於大欖隧道巴士總站轉乘巴士路線251B，可以於錦田郵政局落車，車程僅約15分鐘。

(2) 由錦上路交通交匯處為起點，經過盈匯坊，再穿過錦田紅磚屋、錦田壁畫村，於錦田公路轉右，沿Kok Kok、帶記餐廳方向走，於兩間餐應中間小路直入，1分鐘即達Chit Chai Pastry Studio。

(3) 無需要走入城門新村內，因為店舖其實靠近錦田公路、錦田郵政局。

(4) 小店一般營業時間為星期一至五12:00-18:00、星期六及日則為11:30-18:00，
而預約時段亦分Time Slot，包括星期一至五12:00、14:00、16:00，星期六⁣11:30、13:30、15:30，星期日14:00、16:00，⁣公眾假期11:30、13:30、15:30⁣，
平日必須預先於Whatsapp Book 位，或者官方IG都得，週末就有限度開放Walk-in座位。

(5) 最好Book位時諗定多過1個時段選擇，皆因比較容易Full Booking。

(6) 留意小店只接受4人以下預訂。

(7) 多人時每個時段用餐時間會限時2小時。

(8) 店內最低消費為一份餐點，一般人均約$100，兩個人則約$200。

(9) 只要點任何食品或甜品，飲品都有半價優惠，除咗甜品Madeleine。